തൃശൂര്: ലോക്സഭാ തെരഞ്ഞെടുപ്പില് വന് തിരിച്ചടി കിട്ടിയ തൃശൂരില് പോസ്റ്റര് വിമര്ശനം തുടരുന്നു. കഴിഞ്ഞ ദിവസം മുന് എം.പി. ടി.എന് പ്രതാപനെതിരേ പ്രത്യക്ഷപ്പെട്ടതിന് പിന്നാലെ കോണ്ഗ്രസ് നേതാക്കളായ അനില് അക്കരെയേയും വിമര്ശകര് വെറുതേ വിടുന്നില്ല. അക്കരെയിരുന്ന ബിജെപിയെ ഇക്കരെയെത്തിച്ച അനില് അക്കരെ ബിജെപി ഏജന്റാണോ എന്ന ചോദ്യമുയര്ത്തിയുള്ള പോസ്റ്ററാണ് പ്രത്യക്ഷപ്പെട്ടത്.
കെ മുരളീധരന്റെ പോസ്റ്ററുകള് കിണറ്റില് തള്ളിയ അനില് അക്കരയെ കോണ്ഗ്രസില് നിന്നും പുറത്താക്കാനാണ് ആവശ്യം. എം.പി. വിന്സന്റിനെതിരേയും വിമര്ശനമുണ്ട്. എം പി വിന്സെന്റ് ഒറ്റുകാരനാണ് തുടങ്ങിയ ആരോപണങ്ങള് ഉന്നയിക്കുന്ന പോസ്റ്ററുകളാണ് പ്രത്യക്ഷപ്പെട്ടത്. കോണ്ഗ്രസ് ബ്രിഗേഡിന്റെ പേരില് തൃശൂര് ഡിസിസി ഓഫീസിന് മുന്നിലാണ് പോസറ്ററുകള് പ്രത്യക്ഷപ്പെട്ടത്.
നേരത്തേ മുന് എം പി ടി എന് പ്രതാപന് എതിരേയും പോസ്റ്ററുകള് പ്രത്യക്ഷപ്പെട്ടിരുന്നു. വാര്ഡില് പോലും സീറ്റ് കൊടുക്കരുതെന്നും ഡിസിസി പ്രസിഡന്റ് ജോസ് വളളൂര് രാജിവെക്കണമെന്നും എഴുതിയ പോസ്റ്ററുകളായിരുന്നു കഴിഞ്ഞ ദിവസം ഡിസിസി ഓഫീസിന്റെ മതിലില് പ്രത്യക്ഷപ്പെട്ടത്. സാമ്പത്തിക ആരോപണം അടക്കം ഉന്നയിച്ചായിരുന്നു പോസ്റ്ററുകള്.
തെരഞ്ഞെടുപ്പില് ബിജെപി വിജയിച്ചതിന് പിന്നാലെ തൃശൂര് ജില്ലയിലെ കോണ്ഗ്രസ് പാര്ട്ടിക്കിടയില് ആഭ്യന്തര കലാപമുണ്ട്. തൃശൂരില് ബിജെപി സ്ഥാനാര്ത്ഥി സുരേഷ് ഗോപി 4,12,338 വോട്ടുകള് നേടിയപ്പോള് കോണ്ഗ്രസിന്റെ സിറ്റിംഗ് സീറ്റില് കെ മുരളീധരന് ലഭിച്ചത് 3,28,124 വോട്ടുകളാണ്. 2019 ലേതിനെ അപേക്ഷിച്ച് കോണ്ഗ്രസിന്റെ വോട്ടില് വന് ഇടിവുണ്ടായിട്ടുണ്ട്.
