തൃശൂര്: വയനാട് ലോക്സഭാ മണ്ഡലത്തില് പ്രിയങ്കാ ഗാന്ധി മത്സരിക്കുമെന്ന് ഉറപ്പായതോടെ രണ്ടു നിയമസഭാ മണ്ഡലങ്ങളിലേക്കുള്ള ഉപതെരഞ്ഞെടുപ്പുകളെ സംബന്ധിച്ചു കോണ്ഗ്രസില് ചര്ച്ച സജീവമായി. എം.എം.എല്മാര് എം.പിമാരായതോടെ ഒഴിവുവന്ന ചേലക്കര, പാലക്കാട് നിയമസഭാ മണ്ഡലങ്ങളിലേക്കാണ് വയനാടിനൊപ്പം ഉപതെരഞ്ഞെടുപ്പ് നടക്കുക. ഇൗ മണ്ഡലങ്ങളിലും പ്രിയങ്കയുടെ സജീവ സാന്നിധ്യമുണ്ടാകുമെന്നത് സ്വാധീനം വര്ധിപ്പിക്കാന് സഹായമാകുമെന്നാണു കോണ്ഗ്രസ് നേതൃത്വത്തിന്റെ കണക്കുകൂട്ടല്.
പാലക്കാട് സിറ്റിങ് സീറ്റാണെങ്കില് ചേലക്കര സി.പി.എമ്മില്നിന്നു പിടിച്ചെടുക്കണം. വയനാടിന്റെ കാര്യത്തില് തര്ക്കമില്ലെങ്കിലും മറ്റു രണ്ട് മണ്ഡലങ്ങളെയും അതീവജാഗ്രതയോടെ സമീപിച്ചില്ലെങ്കില് കൈവിട്ടു പോകുമെന്ന ആശങ്ക നേതൃത്വത്തിനുണ്ട്. ലോക്സഭാ തെരഞ്ഞെടുപ്പു ഫലം കേന്ദ്ര സര്ക്കാരിനെതിരായ വിധിയെഴുത്തായാണ് മുഖ്യമന്ത്രി പിണറായി വിജയനും എല്.ഡി.എഫും വ്യഖ്യാനിക്കുന്നത്. അതിനാല്തന്നെ സംസ്ഥാന സര്ക്കാരിനെതിരായ വികാരം നിലനില്ക്കുന്നുണ്ടെന്നു ബോധ്യപ്പെടുത്താന് ഇരു മണ്ഡലങ്ങളിലെയും വിജയം കോണ്ഗ്രസിന് അനിവാര്യമാണ്.
ലോക്സഭാ മണ്ഡലങ്ങളില് വലിയ വിജയം നേടിയതോടെ പ്രതിപക്ഷ നേതാവ് വി.ഡി. സതീശനും കെ.പി.സി.സി. പ്രസിഡന്റ് കെ. സുധാകരനും നില ഭദ്രമാണ്. രണ്ടു മണ്ഡലങ്ങളിലും വിജയം നേടിയാല് ഇരുവര്ക്കും കാര്യങ്ങള് സുഗമമാകും. അതിനാല് സ്ഥാനാര്ഥി നിര്ണയമടക്കം കുറ്റമറ്റ രീതിയില് നടത്താനാണ് കോണ്ഗ്രസ് തീരുമാനം. ഷാഫി പറമ്പില് വടകര ലോക്സഭാ മണ്ഡലത്തില്നിന്നു വിജയിച്ചതിനെ ത്തുടര്ന്നാണ് പാലക്കാട്ട് ഉപതെരഞ്ഞെടുപ്പിനു കളമൊരുങ്ങിയത്. പിന്ഗാമിയെ നിശ്ചയിക്കുന്നതില് ഷാഫിയുടെ നിര്ദേശത്തിന് തന്നെയാകും മുന്ഗണന. യൂത്ത് കോണ്ഗ്രസ് പ്രസിഡന്റ് രാഹുല് മാങ്കൂട്ടത്തിലിനെ ഷാഫി നിര്ദേശിച്ചിട്ടുണ്ട്.
ബി.ജെ.പിക്കു നിര്ണായക സ്വാധീനമുള്ള മണ്ഡലത്തില് പോരു കടുക്കുമെന്നതിനാല് മികച്ച സ്ഥാനാര്ഥിയെന്ന നിലയില് രാഹുലിനുതന്നെയാണ് കൂടുതല് സാധ്യത. എന്നാല്, പുറംജില്ലകളില്നിന്ന് ആരെത്തിയാലും തോല്പ്പിക്കുന്ന പാരമ്പര്യം പാലക്കാട്ടെ കോണ്ഗ്രസുകാര്ക്കുണ്ടെന്ന ആക്ഷേപം ശക്തമാണ്. സതീശന് പാച്ചേനിയുടെയും എം.പി. വിരേന്ദ്രകുമാറിന്റെയും മറ്റും പരാജയങ്ങളില് ഇൗ കാരണവും ആരോപിക്കപ്പെട്ടിരുന്നു. രാഹുല് മാങ്കൂട്ടത്തില് പത്തനംതിട്ട അടൂര് സ്വദേശിയാണ്. ജില്ലയിലെ തൃത്താലയില് വേരുകളുള്ള വി.ടി. ബല്റാമിനും സാധ്യത കല്പ്പിക്കുന്നുണ്ട്.
മന്ത്രി കെ. രാധാകൃഷ്ണന് ആലത്തൂര് എം.പിയായി തെരഞ്ഞെടുക്കപ്പെട്ടതോടെയാണ് ചേലക്കരയില് ഉപതെരഞ്ഞെടുപ്പിനു കളമൊരുങ്ങിയത്. ആലത്തൂരിനെ ലോക്സഭയില് പ്രതിനിധീകരിച്ച രമ്യ ഹരിദാസിനാണ് ചേലക്കരയില് കോണ്ഗ്രസ് മുഖ്യ പരിഗണന നല്കുന്നത്. ചേലക്കരയുടെ മുക്കും മൂലയും അറിയാമെന്നതാണ് പ്രധാന ഘടകം. എന്നാല്, ലോക്സഭാ തെരഞ്ഞെടുപ്പില് തോറ്റ ഏക യു.ഡി.എഫ്. സിറ്റിങ് എം.പി. എന്ന വിശേഷണം വിലങ്ങുതടിയാണ്. തൃശൂര് കോര്പ്പറേഷന് കൗണ്സിലര് ശ്രീലാല് ശ്രീധരന് അടക്കമുള്ളവരുടെ പേരുകളും പരിഗണനയിലുണ്ട്.
ആലത്തൂര് ലോക്സഭാ മണ്ഡലത്തില് ഇത്തവണ ബി.ജെ.പി. വലിയ മുന്നേറ്റം കാഴ്ചവച്ചിരുന്നു. ഇതുകൂടി പരിഗണിച്ചാകും കോണ്ഗ്രസിന്റെ സ്ഥാനാര്ഥി പ്രഖ്യാപനം.
