കൊച്ചി: ഐ.എസുമായി ബന്ധമുള്ള തീവ്രവാദ സംഘടനയായ ഹിസ്ബ്-ഉത്-തഹ്രീര്, സാമൂഹിക മാധ്യമ പ്ലാറ്റ്ഫോമുകള് വഴി കേരളത്തിലെ വിവിധ ജില്ലകളില് പുതിയ സെല്ലുകള് സ്ഥാപിക്കാന് ഗൂഢാലോചന നടത്തിയെന്ന് എന്.ഐ.എ. ഇരുവിഭാഗങ്ങള്ക്കിടയില് സ്പര്ധ വളര്ത്താന് വേണ്ടി ഫെയ്സ്ബുക്ക് പേജ് വഴി പ്രചാരണം നടത്തിയെന്നും കണ്ടെത്തി.
കാസിമര് സ്ട്രീറ്റിലെ 'തൂങ്ങ വിഴികള് രണ്ടുവെന്ന' ഫെയ്സ്ബുക്ക് പേജിനെ കുറിച്ചാണ് അനേ്വഷണം. മധുര ഹിസ്ബ്-ഉത്-തഹ്രീര് മൊഡ്യൂള് കേസുമായി ബന്ധപ്പെട്ടു തമിഴ്നാട്ടിലെ പത്തു സ്ഥലങ്ങളില് എന്.ഐ.എ. ഇന്നലെ റെയ്ഡ് നടത്തി. മധുര പാദൂരിലെ കാസിമര് സ്ട്രീറ്റ്, മെഹബൂബ് പാളയം എന്നിവിടങ്ങളിലെ വീടുകളിലും ഇൗറോഡ് ജില്ലയിലെ രണ്ടിടത്തുമാണു ദേശീയ അനേ്വഷണ ഏജന്സിയിലെ സംഘം പരിശോധന നടത്തിയത്. റെയ്ഡ് രാത്രിയും തുടരുകയാണ്.
ലാപ്ടോപ്, മൊബൈല്, ഹാര്ഡ് ഡിസ്ക്കുകള് തുടങ്ങിയവയും പ്രസിദ്ധീകരണങ്ങളും പിടിച്ചെടുത്തു. വന്ഗൂഢാലോചനയുണ്ടെന്നു കണ്ടെത്തിയതിനെ തുടര്ന്നാണു എന്.ഐ.എ. പുനരനേ്വഷണം തുടങ്ങിയത്. 2021 ല് സെന്തില്കുമാര് എന്നയാള് അറസ്റ്റിലായിരുന്നു. വിവിധ മതവിഭാഗങ്ങള്ക്കിടയില് സാമുദായിക ചേരിതിരിവ് ഉണ്ടാക്കുന്ന തരത്തില് ഒരു പ്രത്യേക സമുദായത്തെ അവഹേളിക്കുന്നതടക്കം പോസ്റ്റുചെയ്യാന് 'തൂങ്ക വിഴികള്' എന്ന തന്റെ ഫെയ്സ്ബുക്ക് അക്കൗണ്ട് പ്രതി മുഹമ്മദ് ഇഖ്ബാല് ഉപയോഗിച്ചതായി കണ്ടെത്തിയിട്ടുണ്ട്.
കേരളത്തിലും തമിഴ്നാട്ടിലുമായി ഇൗ ഫെയ്സ്ബുക്ക് അക്കൗണ്ടിനു നിരവധി ഫോളോവേഴ്സ് ഉണ്ട്. സംഘടനാ നേതാക്കളായ ബാവ ബഹ്റുദീനും സിയാവുദീന് ബാഖവിയും അംഗങ്ങളെ റിക്രൂട്ട് ചെയ്യുന്നതിനായി യോഗങ്ങള് സംഘടിപ്പിക്കുകയും കേന്ദ്ര സര്ക്കാരിനെ അട്ടിമറിച്ച് ഇസ്ലാമിക് സ്റ്റേറ്റ് സ്ഥാപിക്കാനുമായി യുവാക്കളെ പ്രചോദിപ്പിക്കാനും തീവ്രമാക്കാനും രഹസ്യ ക്ലാസുകള് നടത്തിയെന്നും എന്.ഐ.എ. ആരോപിക്കുന്നു.
