കിര്ഗിസ്ഥാനിലെ ഏഴു വയസ്സുകാരന് സക് ഷാല്ക്ക് ഷെറാലിയേവ് ഒറ്റരാത്രി കൊണ്ടാണ് ആരോരുമില്ലാത്തവനായി മാറിയത്. ഗ്രാമത്തിലെ വീട്ടില് ഒന്നുറങ്ങിയെഴുന്നേറ്റപ്പോള് തന്നെ തനിച്ചാക്കി എല്ലാവരും പോയി. തനിക്ക് ഏറെ പ്രിയപ്പെട്ട അച്ഛനെയും അമ്മയേയും എപ്പോഴും ഒപ്പം കളിച്ചിരുന്ന പെങ്ങമ്മാരേയും മരണം കൊണ്ടുപോയി. കഴിഞ്ഞ ദിവസം ഉണ്ടായ വിമാനാപകടത്തിലാണ് ഉറ്റവരും ഉടയവരുമായി എല്ലാവരും ഇല്ലായതായത്. സക് ഷാല്ക്ക് ഷെറാലിയേവിന്റെ വീട്ടിലേക്ക് ഇടിച്ചുകയറിയ വിമാനം എല്ലാം തകര്ത്തു.
തിങ്കളാഴ്ചയുണ്ടായ വിമാന ദുരന്തത്തില് അയല്ക്കാര് ഓടിയെത്തുമ്പോള് ഒന്നും മനസ്സിലാകാതെ കരയുക പോലും ചെയ്യാതെ ഇരിക്കുന്ന പയ്യനെ കണ്ടെത്തി. ഇതിനകം 26 കാരായ മാതാപിതാക്കളും അഞ്ചും രണ്ടും പ്രായത്തിലുള്ള സഹോദരിമാരും സക് ഷാല്ക്ക് ഷെറാലിയേവിനെ ഏകനാക്കി വിടപറഞ്ഞു കഴിഞ്ഞിരുന്നു. ''വിമാനം പൊട്ടിത്തെറിച്ചപ്പോള് വീട്ടിലെ എല്ലാം തകര്ന്നു. എല്ലാവരും മരിച്ചു. ആംബുലന്സുമായി എത്തിയ പോലീസ് മൃതദേഹങ്ങള് കൊണ്ടുപോയി. ഈ സമയത്ത് ഞാന് ഉറങ്ങുകയായിരുന്നു. അമ്മയെ പോലും നോക്കാതെ ഞാന് ഇറങ്ങിയോടി.'' കരയാതെയാണ് പയ്യന് പറഞ്ഞതെങ്കിലും വിങ്ങലോടെ അല്ലാതെ അയല്ക്കാര്ക്ക് കേള്ക്കാന് കഴിയുമായിരുന്നില്ല.
ദുരന്തത്തിന്റെ നടുക്കത്തില് അയല്ക്കാര് എത്തുമ്പോള് പയ്യന് പൂര്ണ്ണ നഗ്നനായിരുന്നു. അവര് അവനെ ഉടുപ്പിടുവിച്ച് അടുത്തുള്ള ആശുപത്രിയിലേക്ക് ആംബുലന്സില് അയച്ചു. അവന് ഭയചകിതനായിരുന്നു. അവിടവിടായി മുറിവേറ്റു. തലച്ചോറില് നേരിയ ക്ഷതം സംഭവിച്ചിട്ടുണ്ട്. അവന് മനശ്ശാസ്ത്ര വിദഗ്ദ്ധന്റെ പിന്തുണ വേണമെന്നും റേഡിയോ റിപ്പോര്ട്ടില് പറഞ്ഞു. എന്നിരുന്നാലും പയ്യന് ഇപ്പോള് ധൈര്യം സംഭരിച്ചിട്ടുണ്ട്. അവന് കുട്ടിക്കഥകള് പറയുകയും കാര്ട്ടൂണുകള് കാണുകയും ചെയ്യുന്നുണ്ട്. തനിക്ക് ഒരു സൈനികനാകണമെന്നും എന്നാലേ അച്ഛന്റെ മണ്ണ് സംരക്ഷിക്കാനാകൂ എന്നും അവന് റേഡിയോയിലൂടെ പറഞ്ഞു.
ഇനി പയ്യന് ശേഷിക്കുന്നത് മുത്തച്ഛനും മുത്തശ്ശിയുമാണ്. പയ്യനെ ജീവനോടെ കണ്ടെത്തിയപ്പോള് മുത്തശ്ശിക്ക് അനുഭവപ്പെട്ടത് ശക്തമായ രക്തസമ്മര്ദ്ദമാണ്. ഇപ്പോഴും അതില് നിന്നും തിരിച്ചുവരാനായിട്ടില്ല. ദുരന്തം നടക്കുമ്പോള് കുടുംബത്തിലെ എല്ലാവരും കിടന്ന അതേ മുറിയിലാണ് താനും കിടന്നതെന്നും എന്നാല് ഒന്നും ഓര്മ്മയില്ലെന്നും കുട്ടി പറഞ്ഞു. മാതാപിതാക്കളുടെയും സഹോദരങ്ങളുടെയും മൃതദേഹം മുത്തശ്ശിയുടെ വീട്ടില് കൊണ്ടുവന്നപ്പോള് ജീവിതത്തില് ഇനി നീ തനിച്ചാണെന്ന് അവനോട് പറയാന് ആര്ക്കും ധൈര്യം ഉണ്ടായിരുന്നില്ല. അതേസമയം ബോയിംഗ് 707-400 വിമാനം തകര്ന്ന ദുരന്തത്തില് നാലുമാസം പ്രായമുള്ള പിഞ്ചു കുഞ്ഞ് ഉള്പ്പെടെ 35 പേരാണ് മരണമടഞ്ഞത്.
