തിരുവനന്തപുരം; ഡെങ്കിപ്പനി ഒരു തവണ വന്നിട്ടുള്ളവര്ക്ക് വീണ്ടും ബാധിച്ചാല് വളരെ അധികം ജാഗ്രത പാലിക്കണമെന്ന് ആരോഗ്യ മന്ത്രി വീണാ ജോര്ജ്. ഇങ്ങനെയുള്ളവരുടെ ആരോഗ്യനില സങ്കീര്ണമാകുന്നതിന് സാധ്യതയുള്ളതായും മന്ത്രി പറഞ്ഞു.
ഡെങ്കിപ്പനി ബാധിക്കുന്നവരില് ഭൂരിപക്ഷം പേരിലും രോഗ ലക്ഷണങ്ങള് കുറവായിരിക്കും. 5 ശതമാനം പേര്ക്ക് തീവ്രതയാകാന് സാധ്യതയുണ്ട്. അതിനാല് പലര്ക്കും ഒരിക്കലെങ്കിലും അറിയാതെ ഡെങ്കി വൈറസ് ബാധിച്ചിരിക്കാം എന്നാണ് ആഗോള തലത്തില് തന്നെ കണക്കാക്കപ്പെടുന്നത്. ഇവര്ക്ക് ഡെങ്കിപ്പനി രണ്ടാമതും ബാധിച്ചാല് ഗുരുതരമാകാം. ഡെങ്കി വൈറസിന് നാല് വകഭേദങ്ങളാണുള്ളത്. അതിനാല് തന്നെ കൊതുകിന്റെ ഉറവിട നശീകരണം വളരെ പ്രധാനമാണ്. പ്രമേഹം, രക്താതിമര്ദം, ഹൃദ്രോഗം, വൃക്ക രോഗം തുടങ്ങിയ അനുബന്ധ രോഗങ്ങളുള്ളവര്, പ്രായമായവര്, ഗര്ഭിണികള്, കുഞ്ഞുങ്ങള്, രോഗ പ്രതിരോധശേഷി കുറവുള്ളവര് എന്നിവര് പ്രത്യേകം ശ്രദ്ധിക്കണമെന്നും മന്ത്രി പറഞ്ഞു.
