ഹൈദരാബാദ്: ആന്ധ്രാപ്രദേശില് വൈഎസ്ആര് കോണ്ഗ്രസ് പാര്ട്ടിയുടെ യുവജനവിഭാഗം നേതാവിനെ നടുറോഡില് ആള്ക്കാര് നോക്കി നില്ക്കെ വെട്ടിക്കൊന്നു. മുന് മുഖ്യമന്ത്രി ജഗന് മോഹന് റെഡ്ഡിയുടെ വൈഎസ്ആര് കോണ്ഗ്രസ് പാര്ട്ടിയുടെ യുവജനവിഭാഗം അംഗം ഷെയ്ഖ് റഷീദാണ് വെട്ടേറ്റ് മരിച്ചത്. ബുധനാഴ്ച രാത്രി ആന്ധ്രാപ്രദേശിലെ പല്നാട് ജില്ലയില് നടുറോഡിലായിരുന്നു സംഭവം.
ഏകദേശം രാത്രി 8:30 ഓടെ, ഗതാഗതക്കുരുക്കിന് ഇടയില്, ക്രൂരമായ ആക്രമണം അരങ്ങേറുന്നതും ക്യാമറയില് പതിഞ്ഞതും. ഷെയ്ഖ് ജീലാനി എന്നയാള് ഷെയ്ഖ് റഷീദിനെ വടിവാളുകൊണ്ട് ക്രൂരമായി ആക്രമിക്കുന്നതാണ് ദൃശ്യങ്ങളിലുള്ളത്. ജിലാനി റഷീദിന്റെ രണ്ട് കൈകളും മുറിച്ച ശേഷമായിരുന്നു കഴുത്തിന് വെട്ടിയതെന്നാണ് ദൃക്സാക്ഷികള് നല്കിയിരിക്കുന്ന ഞെട്ടിക്കുന്ന മൊഴി.
കൊലപാതകത്തിന് പിന്നിലെ കാരണം രാഷ്ട്രീയവൈരമല്ലെന്നും വ്യക്തി വൈരാഗ്യമാണെന്നുമാണ് പോലീസ് പറയുന്നത്. രാഷ്ട്രീയ ലക്ഷ്യങ്ങളുള്ള ഊഹാപോഹങ്ങള് തള്ളിക്കളഞ്ഞതായി ജില്ലാ പോലീസ് മേധാവി കാഞ്ചി ശ്രീനിവാസ് റാവു പറഞ്ഞു. സംഭവം നടന്ന വിനുകൊണ്ട ടൗണിലുടനീളം കര്ശന നിരോധനാജ്ഞകള് നടപ്പാക്കിയിട്ടുണ്ട്. അശാന്തി ഉണ്ടാക്കാനോ സമാധാനം തകര്ക്കാനോ ഉള്ള ശ്രമങ്ങള് കടുത്ത പ്രത്യാഘാതങ്ങള് നേരിടേണ്ടി വരുമെന്ന് പോലീസ് മേധാവി ഉറപ്പ് നല്കി.
