ന്യൂയോര്ക്ക്/ന്യൂഡല്ഹി: മൈക്രോസോഫ്റ്റ് വിന്ഡോസ് തകരാറിനെത്തുടര്ന്ന് രാജ്യാന്തരതലത്തില് ഐടി അധിഷ്ഠിത സേവനങ്ങളില് തടസം. ഫാല്ക്കണ് ആന്റിവൈറസ് സോഫ്റ്റ്വേറിലെ അപ്ഡേറ്റാണു മൈക്രോസോഫ്റ്റ്് വിന്ഡോസ് ഉപയോഗിക്കുന്ന കമ്പ്യൂട്ടറുകളെ തകരാറിലാക്കിയത്.
വിമാനസര്വീസുകള്, ബാങ്കുകള്, പേയ്മെന്റ് സംവിധാനങ്ങള്, സ്റ്റോക്ക് എക്സ്ചേഞ്ചുകള്, ഐടി കമ്പനികള്, ആശുപത്രികള് എന്നിവയ്ക്കു പുറമേ മൈക്രോസോഫ്റ്റിനെ ആശ്രയിച്ചുള്ള അടിയന്തരസേവന സംവിധാനങ്ങളും പണിമുടക്കിയതോടെ ആഗോളതലത്തില് അനിശ്ചിതത്വം. തകരാര് റിപ്പോര്ട്ട് ചെയ്ത് ആറുമണിക്കൂറിനുശേഷം പ്രശ്നപരിഹാരത്തിനുള്ള ഉദ്യമങ്ങളില് പ്രതീക്ഷാനിര്ഭരമായ പുരോഗതിയുണ്ടെന്നു മൈക്രോസോഫ്റ്റ് വ്യക്തമാക്കിയെങ്കിലും സ്ഥിതി സാധാരണനില കൈവരിച്ചില്ലെന്നു സൂചന.
വിന്ഡോസില് ഉപയോഗിക്കുന്ന ഫാല്ക്കണ് ആന്റിവൈറസ്് സംവിധാനം അപ്ഡേറ്റായതാണ് പ്രശ്നത്തിനു വഴിവച്ചത്. അത് ഇന്സ്റ്റാള് ചെയ്ത കമ്പ്യൂട്ടറുകള് അപ്രതീക്ഷിതമായി ഷട്ട് ഡൗണും റീസ്റ്റാര്ട്ടാകുകയുമായിരുന്നു. പിന്നീട് സ്ക്രീനുകള് നീലവര്ണത്തിലായി 'ബ്ലൂ സ്ക്രീന് ഓഫ് ഡെത്ത് (ബി.എസ്.ഒ.ഡി)' മുന്നറിയിപ്പ് പ്രത്യക്ഷപ്പെട്ടു. ഫാല്ക്കണ് സെന്സറാണ് വില്ലനായതെന്നു വ്യക്തമായതിനു പിന്നാലെ ഇതു ഹാക്കിങ് ശ്രമമാണെന്നു സൂചിപ്പിച്ച് പ്രചാരണം ശക്തമായി. എന്നാല്, ഇക്കാര്യം മൈക്രോസോഫ്റ്റും ക്രൗഡ്സ്ട്രൈക്കും നിഷേധിച്ചു.
കമ്പ്യൂട്ടറുകള് തകരാറിലായി സൈബര് ലോകം ഏതാണ്ട് നിശ്ചലമായതോടെ വിമാനയാത്രികരാണ് ഏറെ ദുരിതത്തിലായത്. ഇന്ത്യയില് ഉള്പ്പെടെ ആഗോളതലത്തില് ലക്ഷക്കണക്കിനു യാത്രക്കാര് വിമാനത്താവളങ്ങളില് കുടുങ്ങി. കമ്പ്യൂട്ടര് മുഖേന ടിക്കറ്റുകള് നല്കാനോ പരിശോധനകള് നടത്താനോ കഴിഞ്ഞില്ല. ഇതോടെ സര്വീസുകള് രാജ്യാന്തരതലത്തില്ത്തന്നെ മണിക്കൂറുകള് വൈകുകയോ റദ്ദാക്കുകയോ ചെയ്തു. അമേരിക്ക, ബ്രിട്ടന്, ഓസ്ട്രേലിയ, ന്യൂസിലന്ഡ്, ജര്മനി, ഇറ്റലി, സ്പെയിന്, ഫ്രാന്സ് അടക്കമുള്ള രാജ്യങ്ങളില് വിമാനയാത്ര ത്രിശങ്കുവിലായി. തിരക്കേറിയ വിമാനത്താവളങ്ങള് ജനസാഗരങ്ങളായി.
ഇന്ത്യയിലെ ഒട്ടുമിക്ക വിമാനത്താവളങ്ങളിലും സ്ഥിതി വ്യത്യസ്തമായിരുന്നില്ല. സ്പൈസ് ജെറ്റ്, ആകാശ് എയര്ലൈന്സ്, ഇന്ഡിഗോ തുടങ്ങിയവയുടെ ബുക്കിങ് ഉള്പ്പെടെയുള്ളവയുടെ സേവനം തടസപ്പെട്ടു. വിവിധ രാജ്യങ്ങളിലെ ഓഹരിവിപണി പ്രവര്ത്തനങ്ങള് തടസപ്പെട്ടെന്ന് വിവരമുണ്ടെങ്കിലും സെന്സെക്സ്, നിഫ്റ്റി തുടങ്ങിയവ സാധാരണനിലയിലായിരുന്നു. ഇന്ത്യ ഒഴികെയുള്ള രാജ്യങ്ങളിലെ വിപണികളില് ഇടപാടുകള് കൃത്യസമയത്ത് നടത്താനാകാതെ പലര്ക്കും വന്തുക നഷ്ടമായെന്നും പരാതി ഉയര്ന്നു.
വിവിധ രാജ്യങ്ങളിലെ ടെലിവിഷന് സംപ്രേക്ഷണവും പ്രതിസന്ധിയിലായി. പ്രവര്ത്തനം താറുമാറായ മാധ്യമസ്ഥാപനങ്ങളില് ബ്രിട്ടണിലെ സ്കൈ ന്യൂസ്, ഓസ്ട്രേലിയയിലെ എ.ബി.സി. ന്യൂസ്, രാജ്യാന്തര വാര്ത്താ ഏജന്സിയായ അസോസിയേറ്റഡ് പ്രസ് (എ.പി) തുടങ്ങിയവ ഉള്പ്പെടുന്നു. അമേരിക്കയിലെ അടിയന്തര സേവന സംവിധാനമായ 911 നു പുറമേ ബ്രിട്ടണ് ഉള്പ്പെടെയുള്ള രാജ്യങ്ങളിലെ ആരോഗ്യസേവന സംവിധാനങ്ങളും മണിക്കൂറുകളോളം നിശ്ചലമായി.
