തിരുവനന്തപുരം:മലയാളിയായ മുന് ഐ.എ.എസ്. ഉദ്യോഗസ്ഥന് കെ.കൈലാസനാഥനെ പുതുച്ചേരി ലഫ്. ഗവര്ണറായി നിയമിക്കുമ്പോള് കേരളത്തിലെ ഗവര്ണര് സ്ഥാനമോഹികള്ക്ക് നിരാശ. ബി.ജെ.പിയുമായി ചേര്ന്നു നില്ക്കുന്ന പല മലയാളികളും ഗവര്ണറാകുമെന്ന പ്രതീക്ഷയിലാണ്.
കോണ്ഗ്രസ് വിട്ടു ബി.ജെ.പിയില് എത്തിയ പത്മജ ഗവര്ണറാകണമെന്ന ആഗ്രഹം നേതാക്കളോട് പങ്കുവച്ചിരുന്നു. എന്നാല് കൈലാസനാഥനെ മലയാളിയെന്ന പരിഗണനയിലാണു ലഫ്. ഗവര്ണറാക്കിയതെങ്കില് ഇനി ഒരാള്ക്ക് കേരളത്തില്നിന്നും ഗവര്ണര് പദവി കിട്ടാന് സാധ്യത കുറവാണ്.
ഇതുള്പ്പെടെ 10 പുതിയ ഗവര്ണര്മാരെ കഴിഞ്ഞ ദിവസം അര്ധരാത്രിയോടെ രാഷ്ട്രപതി ദ്രൗപദി മുര്മു നിയമിച്ചിരുന്നു. ഗുജറാത്ത് മുഖ്യമന്ത്രിയായിരുന്ന കാലം മുതല് നരേന്ദ്ര മോദിയുടെ വിശ്വസ്തനാണു പുതുച്ചേരി ലഫ്. ഗവര്ണറായി നിയമിതനായ കൈലാസനാഥന്. കോഴിക്കോട് വടകര സ്വദേശിയാണ്. ഗുജറാത്ത് മുഖ്യമന്ത്രിയുടെ ചീഫ് പ്രിന്സിപ്പല് സെക്രട്ടറി സ്ഥാനത്തുനിന്നു കഴിഞ്ഞമാസമാണു വിരമിച്ചത്.
മോദിയുടെ വലംകൈയായ കൈലാസനാഥനെ പൊതുരംഗത്ത് സജീവമാക്കാനാണു ബി.ജെ.പിയുടെ തീരുമാനം. ഈ സാഹചര്യത്തിലാണ് പുതുച്ചേരിയിലെ നിയമനം. മാസങ്ങള്ക്കുള്ളില് കൂടുതല് ഗവര്ണര്മാരെ നിയമിക്കേണ്ടതുണ്ട്. കേരളത്തിലെ ആരിഫ് മുഹമ്മദ് ഖാന്റെ അടക്കം കാലാവധി പൂര്ത്തിയാകും. ഗോവ ഗവര്ണര് പി. എസ്. ശ്രീധരന് പിള്ളയുടെ കാലാവധി ഉടന് തീരും.
ഈ സമയം ഒരു മലയാളിയെ കൂടി ഗവര്ണറാക്കുമെന്ന അഭ്യൂഹമുണ്ട്. ഇതില് പ്രതീക്ഷകാണുകായണ് കേരളത്തിലെ ഗവര്ണര് മോഹികള്. ബി.ജെ പി സംസ്ഥാന നേതൃത്വവും ചില പേരുകള് ഗവര്ണറായി പരിഗണിക്കുന്നതിന് കേന്ദ്ര നേതൃത്വത്തിന് കൈമാറിയിട്ടുണ്ട്. അതിനിടെ ഗവര്ണര്മാരുടെ അടുത്ത മാറ്റത്തില് കൈലാസനാഥന് കൂടുതല് മെച്ചപ്പെട്ട സംസ്ഥാനം കൊടുക്കുമെന്നും അഭ്യൂഹമുണ്ട്.
