ചൂരല്മല: വയനാട്ടിലെ ദുരന്തത്തില് വിറങ്ങലിക്കുന്ന വാര്ത്തകള്ക്കിടയില് ആശ്വാസത്തിന്റെ ചെറുതരിയുമായി ചൂരല്മലയില് നിന്നും വനംവകുപ്പ് ഉദ്യോഗസ്ഥര്. സൂചിപ്പാറ വെള്ളച്ചാട്ടത്തിന് അടിവാരത്തില് വനത്തില് കുടുങ്ങിയ ആറംഗ കുടുംബത്തെ രക്ഷപ്പെടുത്തി. കനത്തമഴയില് വനത്തിനുള്ളിലായി പോയ നാല് കുഞ്ഞു കുട്ടികളും മാതാപിതാക്കളുമടങ്ങിയ കുടുംബത്തെയാണ് കണ്ടെത്തിയത്.
രണ്ടുദിവസമായി ഇവിടെ കുടുങ്ങിയിരിക്കുകയായിരുന്നു. ഏറാട്ട്കുണ്ട് കോളനിയിലെ കൃഷ്ണനും മക്കളുമാണ് കുടുങ്ങിയത്. കാടിനുള്ളിലെ ഒരു പാറക്കെട്ടിനിടയില് കഴിയുകയായിരുന്ന ഇവര് ഭക്ഷണം ഇല്ലാതായതോടെ കാട്ടിലേക്കിറങ്ങുകയായിരുന്നു. ദുരന്തത്തിന്റെ തെരച്ചിലുമായി ഇറങ്ങിയ വനംവകുപ്പ് ഉദ്യോഗസ്ഥര് അലഞ്ഞുതിരിയുന്ന നിലയില് കൃഷ്ണന്റെ ഭാര്യ ശാന്തയും ഒരു മകനേയും കണ്ടെത്തിയതോടെയാണ് വിവരം പുറത്തറിഞ്ഞത്. യുവതിയെയും മകനേയും ഉടന് തന്നെ ഉദ്യോഗസ്ഥര് പുറത്തെത്തിച്ച് അട്ടമലയിലെ ക്യാംപില് എത്തിച്ചു സുരക്ഷിതമാക്കി.
അതിന് ശേഷം ശാന്ത നല്കിയ സൂചന അനുസരിച്ച് കൃഷ്ണനെയും കുട്ടികളെയും തെരയുകയായിരുന്നു. ഏഴു കിലോമീറ്റര് സഞ്ചരിച്ചും കയര് ഉപയോഗിച്ച് മലയിറങ്ങിയും ദുഷ്ക്കരമായ ദൗത്യം പൂര്ത്തിയാക്കിയാണ് സൂചിപ്പാറ വെള്ളച്ചാട്ടത്തിന്റെ അടിയില് നിന്നും കൃഷ്ണനെയും മൂന്ന് കുട്ടികളെയും കണ്ടെത്തിയത്. എട്ടുമണിക്കൂര് നീണ്ടുനിന്ന ശ്രമകരമായ ദൗത്യത്തിലൂടെയാണ് ഉദ്യോഗസ്ഥര് കൃഷ്ണന്റെയും കുട്ടികളുടെയും അരികിലെത്തിയത്.
ഒരു വശത്തേക്ക് മാത്രം നാല് മണിക്കൂറിലേറെ സമയമെടുത്തു. 10 മീറ്റര് കയര് കെട്ടിയാണ് ഇറങ്ങിയത്. ഉദ്യോഗസ്ഥര് എത്തുമ്പോള് വസ്ത്രംപോലുമില്ലാതെ തണുത്തുവിറച്ച നിലയിലായിരുന്നു മൂന്ന് കുട്ടികള്. കുട്ടികളെ നെഞ്ചോട് ചേര്ത്ത്കെട്ടിവെച്ച് സാഹസീകമായിട്ടാണ് പുറത്ത് എത്തിച്ചത്. പാറമടയിലായിരുന്നു അച്ഛനും അമ്മയും നാലു കുട്ടികളും താമസിച്ചിരുന്നത്.
