ന്യൂഡല്ഹി: ഇന്ത്യയിലെ എല്ലാ ഉപ്പ്, പഞ്ചസാര ബ്രാന്ഡുകളിലും മൈക്രോപ്ലാസ്റ്റിക് അടങ്ങിയിട്ടുള്ളതായി പഠനറിപ്പോര്ട്ട്. വലുതും ചെറുതും പായ്ക്ക് ചെയ്തതും അല്ലാത്തതുമായ ബ്രാന്ഡുകളിലെല്ലാം മൈക്രോപ്ലാസ്റ്റിക് സാന്നിധ്യമുള്ളതായി ചൊവ്വാഴ്ച പ്രസിദ്ധീകരിച്ച പഠനറിപ്പോര്ട്ട് എടുത്തുകാട്ടുന്നു. ടോക്സിക്സ് ലിങ്ക് എന്ന പരിസ്ഥിതി ഗവേഷണ സ്ഥാപനമാണു പഠനം നടത്തിയത്.
കല്ലുപ്പ്, കടല് ഉപ്പ്, ടേബിള് സാള്ട്ട്, പ്രാദേശിക അസംസ്കൃത ഉപ്പ് എന്നിവയുള്പ്പെടെ പത്തുതരം ഉപ്പുകളും ഓണ്ലൈന് വഴി വാങ്ങുന്ന അഞ്ചുതരം പഞ്ചസാരയും പഠനത്തിനായി തെരഞ്ഞെടുത്തു. ഉപ്പിന്റെയും പഞ്ചസാരയുടെയും എല്ലാത്തരം സാമ്പിളുകളിലും മൈക്രോപ്ലാസ്റ്റിക്കിന്റെ സാന്നിധ്യം കണ്ടെത്തിയെന്നാണു റിപ്പോര്ട്ടിലുള്ളത്. നാരുകള്, ഉരുളകള്, പാടകള് തുടങ്ങി വിവിധ രൂപങ്ങളിലാണ് ഉല്പ്പന്നങ്ങളില് മൈക്രോപ്ലാസ്റ്റിക് അടങ്ങിയിരിക്കുന്നത്. 0.1 മുതല് 5 വരെ മില്ലിമീറ്റര് വലിപ്പത്തില് ഇവ കാണപ്പെടുന്നു. നേര്ത്ത നാരുകളുടെയും പാടകളുടെയും രൂപത്തില് അയോഡൈസ്ഡ് ഉപ്പിലാണ് ഏറ്റവും ഉയര്ന്ന അളവില് മൈക്രോപ്ലാസ്റ്റിക് കണ്ടെത്തിയത്.
മൈക്രോപ്ലാസ്റ്റിക്സിനെക്കുറിച്ചുള്ള ശാസ്ത്രീയ ഡാറ്റാബേസിലേക്ക് കൂടുതല് വിവരങ്ങള് നല്കുകയായിരുന്നു പഠനത്തിന്റെ ലക്ഷ്യം.
'മൈക്രോപ്ലാസ്റ്റിക് മൂലമുള്ള അപകടസാധ്യതകള് കുറയ്ക്കാന് സാങ്കേതിക ഇടപെടല് സാധ്യമാക്കുന്നതിലേക്ക് ഗവേഷകരുടെ ശ്രദ്ധ ആകര്ഷിക്കാന് പഠനം ലക്ഷ്യമിടുന്നതായി ടോക്സിക്സ് ലിങ്ക് അസോസിയേറ്റ് ഡയറക്ടര് സതീഷ് സിന്ഹയും അറിയിച്ചു. ''സാമ്പിളുകളിലെല്ലാം ഗണ്യമായ അളവില് മൈക്രോപ്ലാസ്റ്റിക് ഉണ്ടെന്ന കണ്ടെത്തല് ആശങ്കാജനകമാണ്. ഇത് മനുഷ്യന്റെ ആരോഗ്യത്തില് വരുത്തുന്ന ദീര്ഘകാല പ്രത്യാഘാതങ്ങളെക്കുറിച്ച് അടിയന്തിരവും സമഗ്രവുമായ ഗവേഷണം ആവശ്യമുണ്ട്.'' -അദ്ദേഹം കൂട്ടിച്ചേര്ത്തു.
അയോഡൈസ്ഡ് ഉപ്പില് ഒരു കിലോഗ്രാമിന് 89.15 കഷണങ്ങള് എന്ന തോതിലാണ് മൈക്രോപ്ലാസ്റ്റിക് അടങ്ങിയിട്ടുള്ളത്. കണ്ടെത്തിയതില് ഏറ്റവും കൂടുതല് ഇതാണ്. മൈക്രോപ്ലാസ്റ്റിക് ഏറ്റവും കുറവുള്ള ഓര്ഗാനിക് റോക്ക് ഉപ്പില് കിലോഗ്രാമിന് 6.70 കഷണങ്ങള് എന്നതാണു നിരക്ക്്. പഞ്ചസാര സാമ്പിളുകളില് മൈക്രോപ്ലാസ്റ്റികക്കുകളുടെ സാന്ദ്രത കിലോഗ്രാമിന് 11.85 മുതല് 68.25 കഷണങ്ങള് വരെയാണ്. ഏറ്റവും ഉയര്ന്ന സാന്ദ്രതയുള്ളത് നോണ് ഓര്ഗാനിക് പഞ്ചസാരയിലാണ്.
ആരോഗ്യത്തിനും പരിസ്ഥിതിക്കും ഹാനികരമായ മൈക്രോപ്ലാസ്റ്റിക് ആഗോള ആശങ്കയുയര്ത്തുന്ന ഒരു വിഷയമാണ്. ഭക്ഷണം, വെള്ളം, വായു എന്നിവയിലൂടെ മനുഷ്യശരീരത്തില് പ്രവേശിക്കാന് ഇവയ്ക്കു കഴിയും. മനുഷ്യാവയവങ്ങളായ ശ്വാസകോശത്തിലും ഹൃദയത്തിലും മാത്രമല്ല, മുലപ്പാലിലും ഗര്ഭസ്ഥ ശിശുക്കളിലും വരെ മൈക്രോപ്ലാസ്റ്റിക്കുണ്ടെന്ന് സമീപകാല ഗവേഷണങ്ങള് കണ്ടെത്തിയിരുന്നു. ശരാശരി ഇന്ത്യക്കാരന് പ്രതിദിനം 10.98 ഗ്രാം ഉപ്പും പത്തു സ്പൂണോളം പഞ്ചസാരയും ഉപയോഗിക്കുന്നുണ്ടെന്നാണു മുന് പഠനങ്ങള് പറയുന്നത്. ലോകാരോഗ്യ സംഘടന ശിപാര്ശ ചെയ്യുന്ന പരിധിയേക്കാള് വളരെ കൂടുതലാണിത്.
