മൂവാറ്റുപുഴ: സഹോദരങ്ങള് തമ്മിലുണ്ടായ വാക്കുതര്ക്കത്തെത്തുടര്ന്ന് യുവാവിന് വെടിയേറ്റു. കടാതി സഗമം പടിയില് മംഗലത്ത് വീട്ടില് നവീനാ(30)ണ് വെടിയേറ്റത്. സംഭവത്തില് നവീന്റെ അമ്മയുടെ സഹോദരീ പുത്രന് മംഗലത്ത് വീട്ടില് ജുഗല് കിഷോറി(46)നെ മൂവാറ്റുപുഴ പോലീസ് അറസ്റ്റ് ചെയ്തു. 22 നു രാത്രി 11.30 നായിരുന്നു സംഭവം.
ഗുരുതരമായി പരുക്കേറ്റ നവീനെ ആദ്യം മൂവാറ്റുപുഴ ജനറല് ആശുപത്രിയിലും പിന്നീട് എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചു. അടിയന്തര ശസ്ത്രക്രിയയ്ക്ക് വിധേയനായ യുവാവ് അപകട നില തരണം ചെയ്തതായി ആശുപത്രി അധികൃതര് പറഞ്ഞു. സംസ്ഥാന പോലീസിന്റെ കണ്ട്രോള് റൂം നമ്പറായ 112 ല് വിളിച്ചറിയിച്ചതോടെയാണ് മൂവാറ്റുപുഴ പോലീസ് സംഭവം അറിയുന്നത്.
ഉടന് പോലീസ് സംഘം സ്ഥലത്തെത്തി. ഈ സമയം അവിടെ ഉണ്ടായിരുന്ന പ്രതി ജുഗല് കിഷോറിനെ സംഘം കസ്റ്റഡിയിലെടുത്തു. ഇയാള് യാത്ര ചെയ്യാന് ഉപയോഗിച്ച പുതിയ വാഹനവും വെടിവയ്പ്പിന് ഉപയോഗിച്ച പോയിന്റ് 32 പിസ്റ്റളും കണ്ടെടുത്തു. നവീനും ജുഗല് കിഷോറും ഒരു മതിലിന് ഇരുവശത്തുമുള്ള വീടുകളിലാണ് താമസിക്കുന്നത്. കിഷോറിന്റെ വീട്ടിലെ നായ കുരയ്ക്കുന്നതിനെ ചൊല്ലി ഇവര്ക്കിടയില് രാവിലെ വാക്കുതര്ക്കം ഉണ്ടായിട്ടുണ്ട്. നവീനോട് വര്ഷങ്ങളായുള്ള ശത്രുതയും വഴക്കുമാണ് അക്രമത്തിന് കാരണമെന്ന് പോലീസ് പറഞ്ഞു. ഒരാഴ്ചമുമ്പും ഇവര് തമ്മില് വഴക്കുണ്ടായിരുന്നു. സംഭവസമയം കൈയില് കരുതിയിരുന്ന പിസ്റ്റള് കൊണ്ട് നവീന് നേരേ വെടിയുതിര്ക്കുകയായിരുന്നു. വെടിയുണ്ട ശരീരം തുളച്ച് വലതു കൈയില് തറച്ച് കയറി. വിവിധ ഇടപാടുകള് നടത്തുന്ന കിഷോര് ഇടയ്ക്കിടെ നാട്ടില് ഉണ്ടാകാറില്ല. വിദേശത്തുനിന്ന് ഏതാനും ദിവസം മുമ്പാണ് കിഷോര് നാട്ടിലെത്തിയത്.
തുടര്ന്ന് പുതിയ ഥാര് വാഹനം വാങ്ങിയിരുന്നു. ഇതുമായി എവിടെയോ പോയി രാത്രി 11.30 നാണ് തിരികെയെത്തിയത്. രാത്രി വൈകിയാണ് നവീനും വീട്ടില് എത്തിയത്. സ്വന്തം വീടിന്റെ ഗേറ്റിനോട് ചേര്ന്ന് വാഹനം നിര്ത്തിയ കിഷോര് വാഹനത്തില് സൂക്ഷിച്ചിരുന്ന കൈത്തോക്ക് എടുത്ത് നവീനെ വെടിവയ്ക്കുകയായിരുന്നു. നവീന് ആമസോന് സ്ഥാപനത്തിലാണ് ജോലി. കിഷോര് വെടിയുതിര്ത്താന് ഉപയോഗിച്ച തോക്കിന് ലൈസന്സ് ഉണ്ടെന്ന് പോലീസ് വ്യക്തമാക്കി. വിരലടയാള വിദഗ്ധരും സ്ഥലത്ത് എത്തി പരിശോധന നടത്തി.
സംഭവത്തെത്തുടര്ന്ന് ജില്ല പോലീസ് മേധാവി ഡോ. വൈഭവ് സക്സേനയുടെ നിര്ദ്ദേശ പ്രകാരം രൂപീകരിച്ച പ്രത്യേക അന്വേഷണ സംഘത്തില് ഡിവൈഎസ്.പി: പി.എം. ബൈജു, ഇന്സ്പെക്ടര് ബേസില് തോമസ്, എസ്.ഐമാരായ മാഹിന് സലിം, വിഷ്ണു രാജു, കെ.കെ. രാജേഷ്, ദിലീപ് കുമാര്, കെ. അനില്, എ.എസ്.ഐ: പി.ആര്. ദീപമോള്, എസ്.സി.പി.ഒമാരായ മിജു കുര്യന്, പി.എ. ഷിബു, കെ.കെ. അനിമോള്, സി.പി.ഒമാരായ റോബിന് പി. തോമസ് കെ.എം. അന്സാര്, സിജോ തങ്കപ്പന്, രതീഷ്, വി.ടി. രഞ്ജീഷ് എന്നിവരാണ് ഉണ്ടായിരുന്നത്.
