മൂന്നാര്: ദുരിതാശ്വാസക്യാമ്പ് പിരിച്ചുവിട്ടത്തിനേ തുടര്ന്ന് ഗാന്ധി പ്രതിമയ്ക്ക് മുന്പില് പ്രതിഷേധവുമായി വിധവകള് അടക്കം പത്തു കുടുംബങ്ങള്. കഴിഞ്ഞ മാസങ്ങളില് പെയ്ത കനത്ത മഴയില് മൂന്നാറില് പല സ്ഥലങ്ങളിലായി മണ്ണിടിച്ചിലുകള് ഉണ്ടായി. ജൂണ് 25 ന് മൂന്നാര് എം.ജി കോളനിയിലെ ലക്ഷം നഗറില് മുസ്ലിം പള്ളിക്ക് പുറകുവശത്ത് വീടിനു മുകളിലേക്ക് മണ്ണിടിഞ്ഞ് വീണ് വീട്ടമ്മ മരിച്ചിരുന്നു.
മൂന്നാര് കോളനി സ്വദേശി കുമാറിന്റെ ഭാര്യ മാല കുമാര് (38) ആണ് മരണപ്പെട്ടത്. ഇതേത്തുടര്ന്ന് സമീപത്ത് റവന്യൂ സംഘം നടത്തിയ പരിശോധനയില് വീടുകള്ക്കും സമീപ പ്രദേശങ്ങളിലും ഭൂമി വിണ്ടുകീറിയതായും മണ്ണിടിച്ചില് സാധ്യത ഉള്ളതായി കണ്ടെത്തുകയും ഇവിടെയുള്ള ആളുകളെ മൂന്നാര് മൗണ്ട് കാര്മല് ബസിലിക്കയില് പ്രവര്ത്തിച്ചിരുന്ന ദുരിതാശ്വാസ ക്യാമ്പിലേക്ക് മാറ്റുകയും ചെയ്തിരുന്നു.
എം.ജി കോളനിയിലെയും അന്തോണിയാര് കോളനിയിലെയും ഉള്പ്പെടെ പത്തോളം കുടുംബങ്ങളെയാണ് ക്യാമ്പിലേക്ക് മാറ്റിയത്. ഇതില് എട്ടു കുടുംബങ്ങള് വിധവകള് ഗൃഹനാഥന്മാരായവരാണ്. ഇവര്ക്ക് ആശ്രയിക്കാന് മറ്റ് ഇടങ്ങളില്ലെന്നിരിക്കെ മഴ കുറഞ്ഞു എന്ന കാരണം പറഞ്ഞ് ജില്ലാ കലക്ടര് ദുരിതാശ്വാസ ക്യാമ്പുകള് പിരിച്ചുവിടാന് നിര്ദേശം നല്കി. ഇതേ തുടര്ന്ന് ക്യാമ്പ് അവസാനിപ്പിക്കുകയും അവിടെ കഴിഞ്ഞിരുന്ന ദുരിതബാധിതര്ക്ക് ബദല് സംവിധാനം ഒരുക്കാതെ വരികയും ചെയ്തു. ഇതാണ് പ്രതിഷേധത്തിന് കാരണമായത്.
മണ്ണിടിച്ചല് ഭീഷണിയുള്ള സ്ഥലത്തേക്ക് പോകാന് കഴിയില്ലെന്നും അപകടാവസ്ഥയിലായ വീടുകളില് സുരക്ഷ ഉറപ്പാക്കാതെ താമസിക്കാന് കഴിയില്ലെന്നും ഇതിന് സര്ക്കാര് ബദല് സംവിധാനങ്ങള് ഒരുക്കണമെന്നും ആവശ്യപ്പെട്ടാണ് ദുരിതബാധിതര് മൂന്നാറിലെ ഗാന്ധി പ്രതിമയ്ക്ക് മുന്പില് പ്രതിഷേധ സമരവുമായി എത്തിയത്. മൂന്നാറിലെ സാഹചര്യങ്ങള് മനസിലാക്കാതെ കലക്ടര് എടുത്ത തീരുമാനം മൂന്നാറിലുള്ള സബ് കലക്ടര് എങ്കിലും മനസിലാക്കണമെന്നാണ് പ്രതിഷേധക്കാരുടെ ആവശ്യം. ബദല് സംവിധാനങ്ങള് ഒരുക്കാതെ പിന്മാറിലെന്നാണ് സമരക്കാര് പറയുന്നത്. രാത്രിയിലും പ്രായഭേദമന്യേ മുഴുവനാളുകളും പ്രതിഷേധ സമരം തുടരുകയാണ്.
