മൂലമറ്റം: ചേലാകര്മത്തെത്തുടര്ന്ന് രക്തം വാര്ന്ന് നവജാതശിശു മരിച്ച സംഭവത്തില് രണ്ടുപേര് അറസ്റ്റില്. പേരാമംഗലം സ്വദേശി ഇബ്രാഹിം(63), സഹായി റിഷാദ് (39) എന്നിവരെയാണ് കാഞ്ഞാര് പോലീസ് അറസ്റ്റ് ചെയ്തത്.
കാഞ്ഞാറിലെ ഒരു കുടുംബത്തിലെ 67 ദിവസം പ്രായമുള്ള ഇരട്ടക്കുട്ടികളിലൊരാളാണ് മരിച്ചത്. ജില്ലാ സെഷന്സ് കോടതിയില് ഹാജരാക്കിയ പ്രതികളെ റിമാന്ഡ് ചെയ്തു. 2024 ജനുവരി രണ്ടിനാണ് സംഭവം നടന്നത്. ചര്മം നീക്കിയതിനെത്തുടര്ന്ന് ശക്തമായ രക്തസ്രാവമുണ്ടായി.
കുഞ്ഞിനെ അടിവാടിലെ ഒരു ആശുപത്രിയിലും പിന്നീട് തൊടുപുഴയിലെ സ്വകാര്യ ആശുപത്രിയിലുമെത്തിച്ചു. ചികിത്സയില് കഴിയവെ കുഞ്ഞിന് ശ്വാസതടസമുണ്ടായി. തുടര്ന്ന് കോലഞ്ചേരി മെഡിക്കല് കോളജിലെത്തിച്ചെങ്കിലും രക്ഷിക്കാനായില്ല.
നാലിന് വൈകിട്ട് ഏഴോടെ കുഞ്ഞ് മരിച്ചു. പോലീസ് അന്വേഷണം നടത്തിയെങ്കിലും ആദ്യ ഘട്ടത്തില് കേസ് എടുത്ത് പ്രതികളെ അറസ്റ്റ് ചെയ്തിരുന്നില്ല. പിന്നീട് പോലീസിന്റെ രഹസ്യാന്വേഷണ വിഭാഗവും അന്വേഷണം നടത്തി ഉന്നത ഉദ്യോഗസ്ഥര്ക്ക് റിപ്പോര്ട്ട് സമര്പ്പിച്ചു.
ഇതിനിടെ പ്രതികള് മുന്കൂര് ജാമ്യത്തിന് ശ്രമിച്ചെങ്കിലും ലഭിച്ചില്ല. സംഭവം കൂടുതല് ചര്ച്ചയായതോടെയാണ് പോലീസ് നടപടിയിലേക്ക് നീങ്ങിയത് എന്നാണ് സൂചന.
