പ്രശസ്ത തമിഴ്നടി രാധികാശരത് കുമാറിന്റെ വെളിപ്പെടുത്തലില് നടിയില് നിന്നും പ്രത്യേക അന്വേഷണസംഘം വിവരം ശേഖരിക്കും. തുടരന്വേഷണം അതിന് ശേഷം നടത്തും. സിനിമയിലെ കാസ്റ്റിംഗ് കൗച്ചിംഗ് അനുഭവങ്ങളുമായി ബന്ധപ്പെട്ട് ഒരു മലയാള സിനിമ സെറ്റില് കാരവാനില് നടിമാര് വസ്ത്രം മാറുന്ന ദൃശ്യങ്ങള് ഒളിക്യാമറയില് പകര്ത്തി പുരുഷന്മാര് ആസ്വദിക്കുന്നത് കണ്ടെന്നും തുടര്ന്ന് താന് കാരാവാനില് കയറാതെ ഹോട്ടലിലേക്ക് പോയെന്നുമായിരുന്നു രാധികയുടെ വെളിപ്പെടുത്തല്.
തെന്നിന്ത്യയിലെ മുതിര്ന്ന നടിമാരിലൊരാളായ രാധിക ശരത് കുമാര് മലയാളത്തിലെ സൂപ്പര്താരങ്ങളുടെ നായികയാകുകയും അടുത്തകാലത്ത് വരെ തമിഴിലും മലയാളത്തിലും ഒരു പോലെ അഭിനയിക്കാനെത്തുകയും ചെയ്തിരുന്നു. വട്ടംകൂടിയിരുന്ന് പുരുഷന്മാര് കാരവാനിനകത്തെ നടിമാരുടെ നഗ്നദൃശ്യങ്ങള് ആസ്വദിക്കുന്നത് കണ്ടതോടെ ശക്തമായി പ്രതികരിച്ചെന്ന് രാധിക പറഞ്ഞു. ചെരിപ്പൂരി അടിക്കുമെന്ന് അവരോട് പറഞ്ഞെന്നും ഭയം കാരണം കാരവന് ഉപയോഗിക്കാതെ ഹോട്ടലില് പോയാണ് വസ്ത്രം മാറിയതെന്നും പറഞ്ഞു.
നടിമാരുടെ ദൃശ്യങ്ങളടങ്ങിയ ഫോള്ഡറുകള് പോലുമുണ്ടെന്നാണ് നടിയുടെ വെളിപ്പെടുത്തല്. സെറ്റില് വസ്ത്രം മാറാനോ പ്രാഥമിക കര്ത്തവ്യങ്ങള് നിര്വ്വഹിക്കാനോ പോലും ആശങ്കയുണ്ടെന്നും സുരക്ഷിതമായി കാരവാനുകള് നല്കണമെന്നും ഒരു നടി ജസ്റ്റിസ് ഹേമ കമ്മറ്റിയ്ക്ക് നല്കിയ മൊഴിയില് പറഞ്ഞിരുന്നു. ഇതിനെ ശരി വെയ്ക്കുന്നതാണ് രാധികയുടെയും വെളിപ്പെടുത്തല്. കാരവാനില് വസ്ത്രം മാറുമ്പോള് നഗ്ന ദൃശ്യങ്ങള് പകര്ത്താന് സാധ്യതയുണ്ടെന്നും സ്വകാര്യതയില് ആശങ്കയുണ്ടെന്നും അതുകൊണ്ട് അവ ഒഴിവാക്കാറുണ്ടെന്നും നടിമാരും ഹേമകമ്മിറ്റിയോട് പറഞ്ഞിരുന്നു. രാധിക ഏറ്റവും ഒടുവിലായി മലയാളത്തില് ചെയ്തത് ദി ഗാംബിനോസ് എന്ന സിനിമയാണ്.
