ദില്ലി : മൂന്ന് പുതിയ വന്ദേഭാരത് ട്രെയിനുകള് കൂടി പ്രധാനമന്ത്രി നരേന്ദ്ര മോദി ഫ്ലാഗ് ഓഫ് ചെയ്തു. പുതിയ വന്ദേഭാരത് ട്രെയിനുകള് ഓടുന്നത് മീററ്റ് - ലക്നൗ, മധുര - ബെംഗളൂരു, ചെന്നൈ - നാഗര്കോവില് എന്നീ റൂട്ടുകളിലാണ്. അതിനാല് ഉത്തര്പ്രദേശ് , തമിഴ്നാട് , കര്ണാടക എന്നീ മൂന്ന് സംസ്ഥാനങ്ങളിലെ യാത്രക്കാര്ക്ക് വളരെ അധികം പ്രയോജനകരമായിരിക്കുമെന്ന് റെയില്വേ മന്ത്രാലയം അറിയിച്ചു.
തദ്ദേശീയമായി നിര്മ്മിച്ച വന്ദേ ഭാരത് ട്രെയിനില് ലോകോത്തര സൗകര്യങ്ങളും കവച് സാങ്കേതികവിദ്യ ഉള്പ്പെടെയുള്ള നൂതന സുരക്ഷാ സംവിധാനങ്ങളും സജ്ജീകരിച്ചിരിക്കുന്നുവെന്ന് റെയില്വേ അറിയിച്ചു. വന്ദേഭാരതിന് 360 ഡിഗ്രി തിരിയുന്ന ഇരിപ്പിടങ്ങള്, ഭിന്നശേഷി സൗഹൃദ ടോയ്ലറ്റുകള് തുടങ്ങിയ പ്രത്യേകതകളുമുണ്ട്. പ്രകൃതി രമണീയമായ നാഗര്കോവിലിനെ ചെന്നൈയുമായി ബന്ധിപ്പിക്കുന്ന ആദ്യ വന്ദേ ഭാരത് എന്ന നിലയില് ചെന്നൈ എഗ്മോര് - നാഗര്കോവില് വന്ദേ ഭാരത് ഫ്ലാഗ് ഓഫ് ചെയ്യുന്നതിന് ദക്ഷിണ റെയില്വേ വിപുലമായ ക്രമീകരണങ്ങള് ഏര്പ്പെടുത്തിയിരുന്നു.
തമിഴ്നാടിന് അനുവദിച്ച വന്ദേഭാരത് 726 കിലോമീറ്റര് സഞ്ചരിക്കും, കന്യാകുമാരി, തിരുനെല്വേലി, തൂത്തുക്കുടി, വിരുദുനഗര്, മധുരൈ, ഡിണ്ടിഗല്, ട്രിച്ചി, പെരമ്പലൂര്, കടലൂര്, വില്ലുപുരം, ചെങ്കല്പട്ട്, ചെന്നൈ എന്നീ 12 ജില്ലകളിലെ യാത്രക്കാര്ക്ക് ആധുനികവും വേഗതയേറിയതുമായ ട്രെയിന് യാത്രാനുഭവം നല്കും.
