ജോര്ജിയ: അമേരിക്കയിലെ സ്കൂളിലുണ്ടായ വിദ്യാര്ത്ഥികള്ക്കും അദ്ധ്യാപകര്ക്കും നേരെ സ്കൂള് വിദ്യാര്ത്ഥി നടത്തിയ വെടിവെപ്പില് നാല് മരണം. ഒമ്പത് പേര്ക്ക് പരിക്കേറ്റതായും വിവരമുണ്ട്. രണ്ട് വിദ്യാര്ത്ഥികളും രണ്ട് അധ്യാപകരുമാണ് കൊല്ലപ്പെട്ടത്.
വെടിവെച്ചയാളെ പൊലീസ് അറസ്റ്റ് ചെയ്തിട്ടുണ്ട്. പരിക്കേറ്റവരെ ആശുപത്രിയിലേക്ക് മാറ്റിയിട്ടുണ്ട്. ഇതേ സ്കൂളിലെ വിദ്യാര്ത്ഥി പതിനാലുകാരനായ കോള്ട്ട് ഗ്രേയാണ് വെടിവെപ്പ് നടത്തിയതെന്ന് പൊലീസ് അറിയിച്ചു. ആക്രമണത്തിന് പിന്നിലെ കാരണം വ്യക്തമല്ല.
അറ്റ്ലാന്റയില് നിന്ന് 80 കിലോമീറ്റര് അകലെയുള്ള സ്കൂളിലാണ് വെടിവെപ്പുണ്ടായത്. കഴിഞ്ഞ ദിവസം പ്രാദേശിക സമയം രാവിലെ 10.23നാണ് വെടിവെപ്പുണ്ടായത്. ആക്രമണത്തിന് ഏതുതരം തോക്കാണ് ഉപയോഗിച്ചതെന്നോ എന്തിനായിരുന്ന ആക്രമണമെന്നോ വ്യക്തമല്ല.
പരിക്കേറ്റവരെ ഹെലികോപ്റ്ററിലാണ് ആശുപത്രിയിലേക്ക് മാറ്റിയത്. സംഭവം നടന്നയുടനെ സുരക്ഷാ ഉദ്യോഗസ്ഥരെ സ്കൂളിലേക്ക് അയച്ചിരുന്നു. കസ്റ്റഡിയിലെടുത്ത 14കാരനെതിരെ കൊലപാതക കുറ്റം ചുമത്തുമെന്നും പൊലീസ് വ്യക്തമാക്കിയിട്ടുണ്ട്.
