അമൃത്സര്: നാറ്റോ ആയുധങ്ങള് ഇന്ത്യയിലെ ഭീകരര്ക്കു ലഭിക്കുന്നതായി കണ്ടെത്തല്. യു.എസ്. സൈന്യം അഫ്ഗാനിസ്ഥാനില് ഉപേക്ഷിച്ചുപോയ ആയുധങ്ങളാണു പാകിസ്താന് വഴി ഇന്ത്യയിലെത്തുന്നത്. ഇതു പഞ്ചാബിലെയും ജമ്മു- കശ്മീരിലെയും ഭീകരര്ക്കാണു കൈമാറുന്നത്.
പാകിസ്താന് ആസ്ഥാനമായുള്ള കള്ളക്കടത്തുകാരന് ഹര്പ്രീത് സിങ്ങാണ് ആയുധ- മയക്കുമരുന്നു കടത്തിനു പിന്നിലെ പ്രധാന വ്യക്തികളിലൊരാളെന്നു പഞ്ചാബ് പോലീസ് അറിയിച്ചു. ഡ്രോണുകള് വഴിയാണ് ആയുധങ്ങളും മയക്കുമരുന്നും അതിര്ത്തി കടത്തുന്നത്.
ഹര്പ്രീത് ഒന്നിലധികം ക്രിമിനല് സംഘങ്ങള്ക്ക് ആയുധം കൈമാറുന്നതായി കണ്ടെത്തിയിട്ടുണ്ടെന്നു തരണ് തരണ് സീനിയര് പോലീസ് സൂപ്രണ്ട് (എസ്.എസ്.പി.) ഗൗരവ് തൂറ അറിയിച്ചു. പഞ്ചാബിലെ ഭീകരരുടെ സാന്നിധ്യം വര്ധിക്കുന്നതും ആയുധ-മയക്കുമരുന്നു കടത്തുമായി ബന്ധമുണ്ടെന്നാണു പോലീസിന്റെ നിലപാട്. ജമ്മു കശ്മീരില് ഭീകരരില്നിന്നു നാറ്റോ ഗ്രേഡ് ആയുധങ്ങളും വെടിക്കോപ്പുകളും പിടിച്ചെടുത്തിട്ടുണ്ട്.
2021 ല് അഫ്ഗാനിസ്ഥാനില്നിന്ന് യു.എസ്. സേനയുടെ പിന്മാറ്റമാണ് ആയുധക്കടത്തിനു സഹായകമായതെന്ന് അന്വേഷണ ഏജന്സികള് വ്യക്തമാക്കി. 59,776 കോടി രൂപ മൂല്യമുള്ള ആയുധങ്ങളാണ് യു.എസ്. ഉപേക്ഷിച്ചുപോയതെന്നാണു റിപ്പോര്ട്ടുകള്. അവയില് കൂടുതലും അന്നത്തെ അഫ്ഗാന് സൈന്യത്തിന്റെ നിയന്ത്രണത്തിലായിരുന്നു. അധികാരം പിടിച്ചതോടെ സൈനിക ഉപകരണങ്ങളില് ഭൂരിപക്ഷവും താലിബാന്റെ പിടിയിലായി. അവശേഷിക്കുന്നത് സായുധ സംഘങ്ങളും സ്വന്തമാക്കി. അവ താലിബാന്റെ പക്കല്നിന്നാണു ജെയ്ഷെ മുഹമ്മദ് (ജെഎം), ലഷ്കര്- ഇ-തൊയ്ബ തുടങ്ങിയ ഭീകര സംഘടനകളുടെ പക്കലെത്തി. അതു കശ്മീരിലെ ഭീകരര്ക്കും ലഭിച്ചു.
അഫ്ഗാനിസ്ഥാനില് നാറ്റോ സൈന്യം ഉപേക്ഷിച്ച സ്റ്റീല് കോര് ബുള്ളറ്റുകളും നൈറ്റ് വിഷന് ഗ്ളാസുകളും കശ്മീര് ഭീകരര് ഉപയോഗിക്കുന്നതായി കണ്ടെത്തിയിട്ടുണ്ട്. ഇന്ത്യന് സുരക്ഷാ സേനയുമായുള്ള ഏറ്റുമുട്ടലുകളില് അമേരിക്കന് ആയുധങ്ങള് ഭീകരര് ഉപയോഗിച്ചതായി കണ്ടെത്തിയിട്ടുണ്ട്. പാകിസ്താന് പിന്തുണയുള്ള ഭീകരര്ക്ക് എം 4, എം 16, മറ്റ് യു.എസ്. നിര്മിത ആയുധങ്ങളും വെടിക്കോപ്പുകളും ഉണ്ടെന്ന് 2023 ജനുവരിയില് ഇന്റലിജന്സ് ഏജന്സികള് റിപ്പോര്ട്ട് ചെയ്തിരുന്നു. യു.എസ്. നിര്മിത അത്യാധുനിക എം 4 കാര്ബൈനുകളും എം 16 അസോള്ട്ട് റൈഫിളുകളും 2020 ന്റെ തുടക്കത്തില് തന്നെ കശ്മീരില് പ്രത്യക്ഷപ്പെട്ടിരുന്നു. കഴിഞ്ഞ മേയില് കശ്മീരില് തീര്ത്ഥാടകര് സഞ്ചരിച്ച ബസിനു നേരെയുണ്ടായ ബോംബ് ആക്രമണത്തില് ഉപയോഗിച്ചതും യു.എസ്. ആയുധങ്ങളാണ്.
കശ്മീരില് തീവ്രവാദികള് സ്റ്റിക്കി ബോംബുകള് ഉപയോഗിക്കുന്നത് സമീപകാല സംഭവവികാസമാണെന്നും 2021 ഓഗസ്റ്റില് യു.എസ്. നേതൃത്വത്തിലുള്ള സഖ്യസേന രാജ്യം വിടുന്നതിന് മുമ്പ് അഫ്ഗാനിസ്ഥാനിലെ ഭീകരര്ക്കുനേരേ നാറ്റോ സേനയ്ക്കെതിരേ ഇത്തരം ബോംബുകള് ഉപയോഗിച്ചിരുന്നുവെന്നും റിപ്പോര്ട്ടില് പറയുന്നു. യു.എസ്., ഓസ്ര്ടിയ, തുര്ക്കി എന്നിവിടങ്ങളില്നിന്നുള്ള ആയുധങ്ങള് കശ്മീരിലെ സുരക്ഷാ സേന പിടിച്ചെടുത്തതായി ദ് ട്രിബ്യൂണ് ജൂലൈയില് റിപ്പോര്ട്ട് ചെയ്തിരുന്നു.
ആയുധക്കടത്തില് വൈദഗ്ധ്യം നേടിയ സംഘടിത ക്രിമിനല് ശൃംഖലകള്ക്ക് പാക് പിന്തുണ ലഭിക്കുന്നതായി ആരോപണമുണ്ട്. ഈ ശൃംഖലകളില് പലപ്പോഴും ആയുധങ്ങളുടെ വില്പ്പനയും ഗതാഗതവും ക്രമീകരിക്കുന്ന ബ്രോക്കര്മാര് ഉള്പ്പെടുന്നു. അവര്ക്കു പാക് രഹസ്യാന്വേഷണ ഏജന്റുമാരുടെ പിന്തുണയുണ്ട്. ഡ്രോണുകള് ഉപയോഗിച്ച് ഇന്ത്യയിലേക്ക് ആയുധങ്ങള് കടത്തിയതില് പാക് പങ്ക് തെളിഞ്ഞിട്ടുണ്ട്.
ആഗോള ആയുധ വ്യാപാരം എന്നത് സങ്കീര്ണനിറഞ്ഞ മേഖലയാണ്. കള്ളക്കടത്ത് ആയുധങ്ങള് കൈകാര്യം ചെയ്യുന്നതിന് പേരുകേട്ട ആയുധ ചന്തകള് നിലവിയുണ്ട്. ഈ സാഹചര്യത്തിലാണു നാറ്റോ ആയുധങ്ങള് മറ്റു രാജ്യങ്ങള്ക്കും ഭീഷണിയാണ്.
