കൊല്ക്കത്ത; കൊല്ക്കത്തയില് യുവഡോക്ടറെ ക്രൂരമായി കൊലപ്പെടുത്തിയ സംഭവത്തില് ഒരു മാസം പൂര്ത്തിയാകുമ്പോഴും ആരോഗ്യ പ്രവര്ത്തകരുടെ സുരക്ഷ ഉറപ്പാക്കാനുള്ള നടപടികള് പ്രഖ്യാപനങ്ങളിലൊതുങ്ങുന്നു. രാജ്യ തലസ്ഥാനത്തെ ആശുപത്രികളില് പോലും സിസിടിവി സ്ഥാപിക്കാനും വേണ്ടത്ര സുരക്ഷാ ഉദ്യോഗസ്ഥരെ നിയോഗിക്കാനുമുള്ള നടപടികള് എവിടെയുമെത്തിയില്ല. മലയാളികളടക്കമുള്ള ആരോഗ്യ പ്രവര്ത്തകര് ഭീതിയിലാണ് രാപ്പകല് ജോലി ചെയ്യുന്നത്.
കൊല്ക്കത്തയിലെ യുവ ഡോക്ടറുടെ കൊലപാതകത്തിനെതിരെ രാജ്യവ്യാപകമായി ആരോഗ്യ പ്രവര്ത്തകര് ഒറ്റക്കെട്ടായാണ് പ്രതിഷേധിച്ചത്. ആഴ്ചകള് നീണ്ട സമരം സുപ്രീംകോടതിയുടെ നിര്ണായക ഇടലപെടലുകള്ക്ക് വരെ കാരണമായി. എന്നാല് ഈ പ്രതിഷേധം കൊണ്ടൊന്നും അധികാരികള് ഉണര്ന്ന് പ്രവര്ത്തിച്ചില്ല. ആശുപത്രികളില് എല്ലായിടത്തും സിസിടിവി, രാത്രിയിലടക്കം പരിശീലനം ലഭിച്ച സുരക്ഷാ ഉദ്യോഗസ്ഥര്, വിശ്രമമുറികള്, പോലീസ് സുരക്ഷ ഇതെല്ലാം വേണമെന്നായിരുന്നു ആവശ്യം.
സുപ്രീംകോടതിയുടെ ഇടപെടലിന് പിന്നാലെ തിരക്കുപിടിച്ചുള്ള പ്രഖ്യാപനങ്ങളല്ലാതെ നടപടികള് ഒന്നും എവിടെയുമെത്തിയിട്ടില്ലെന്നാണ് ആരോഗ്യ പ്രവര്ത്തകര് പറയുന്നത്. രാജ്യതലസ്ഥാനത്തെ ആശുപത്രികളില് പോലും സിസിടിവി ക്യാമറകള് സ്ഥാപിക്കാനോ വേണ്ടത്ര സുരക്ഷാ ഉദ്യോഗസ്ഥരെ നിയോ?ഗിക്കാനോ ഇതുവരെ നടപടികളുണ്ടായിട്ടില്ല.
