കിഴക്കമ്പലം: പണം കൊടുക്കാതെ ബിവറേജസ് ഔട്ട്ലെറ്റില്നിന്നു മദ്യവുമായി മുങ്ങാന് ശ്രമിച്ച പോലീസുകാരന് വനിതാ ജീവനക്കാരി ഉള്പ്പെടെയുള്ളവരെ മര്ദിച്ചു. പട്ടിമറ്റം ബിവറേജ്സ് ഔട്ട്ലെറ്റില് 22നു രാവിലെ 10.30 നാണ് സംഭവം. സംഭവത്തെത്തുടര്ന്ന് കളമശേരി പോലീസ് ക്യാമ്പിലെ ഡ്രൈവര് പട്ടിമറ്റം പുന്നോര്ക്കോട് കാച്ചുരുത്തിയില് ഗോപി(53)യെ കുന്നത്തുനാട് പോലീസ് അറസ്റ്റ് ചെയ്തു.
കൗണ്ടറിലുണ്ടായിരുന്ന യുവതിയെ കയറിപ്പിടിച്ചതിനും പൊതുമുതല് നശിപ്പിച്ചതിനുമാണ് കേസ്. മദ്യം വാങ്ങാനെത്തിയ ഗോപി കൗണ്ടറിലുണ്ടായിരുന്ന ജീവനക്കാരിയോട് മോശമായി പെരുമാറുകയും പണം നല്കാതെ മദ്യവുമായി ഓടാന് ശ്രമിക്കുകയുമായിരുന്നു. മറ്റ് ജീവനക്കാര് ഇടപ്പെട്ടതും പുറത്തിറങ്ങി ഒൗട്ട്ലെറ്റിന്റെ ഷട്ടര് താഴ്ത്തി രക്ഷപ്പെടാനായി ശ്രമം. തുടര്ന്ന്, തടഞ്ഞുനിര്ത്തിയ ജീവനക്കാരെ ഇയാള് അക്രമിച്ചു കടന്നുകളഞ്ഞു.
പോലീസ് സമീപ പ്രദേശങ്ങളില് അന്വേഷിച്ചെങ്കിലും പ്രതിയെ കണ്ടെത്താനായില്ല. വൈകിട്ട് വീട്ടില് ഉണ്ടെന്ന വിവരം ലഭിച്ചതിനെ തുടര്ന്ന് എത്തിയ പോലീസിനെ അക്രമിച്ച് രക്ഷപ്പെടാന് ശ്രമിച്ചെങ്കിലും ബലം പ്രയോഗിച്ച് കീഴ്പ്പെടുത്തുകയായിരുന്നു. കുടുംബവഴക്കിനെ തുടര്ന്ന് ഭാര്യ നല്കിയ പരാതിയിലും കേസെടുത്തിട്ടുണ്ട്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
