ലക്നൗ: രാമ സംസ്ക്കാരത്തിന് പകരം റോമന് സംസ്ക്കാരം വളര്ത്തിയ ആകസ്മിക ഹിന്ദുവാണ് രാഹുല്ഗാന്ധിയെന്നും അദ്ദേഹത്തിന് ഒരിക്കലും അയോദ്ധ്യയിലെ രാമക്ഷേത്രം അംഗീകരിക്കാനാകില്ലെന്ന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ്. ഹരിയാനയില് നടന്ന തെരഞ്ഞെടുപ്പ് റാലിയില് സംസാരിക്കുകയായിരുന്നു യോഗി. അയോദ്ധ്യയില് പ്രധാനമന്ത്രി നരേന്ദ്രമോദി രാമക്ഷേത്രം ഉയര്ത്തിയപ്പോള് 500 വര്ഷത്തെ കാത്തിരിപ്പ് 2024 ജനുവരി 22 നാണ് അവസാനിച്ചത്. ലോകം മുഴുവന് ചരിത്രനിമിഷം ആഘോഷിച്ചപ്പോള് കോണ്ഗ്രസ് മാത്രം അതില് പങ്കുചേര്ന്നില്ല.
ഇതില് ഉയര്ന്നുകാണുന്നത് റോമന് സംസ്ക്കാരവും രാമ സംസ്ക്കാരവും തമ്മിലുള്ള വൈരുദ്ധ്യമാണ്. രാഹുല്ഗാന്ധിയുടെ പേര് പ്രത്യേകമായി പരാമര്ശിച്ചില്ലെങ്കിലും മാതൃവഴിയുള്ള രാഹുലിന്റെ പൈതൃകത്തെയാണ് യോഗി ലക്ഷ്യമിട്ടത്. രാമ സംസ്ക്കാരത്തില് ജനിച്ചുവളര്ന്ന ഒരാള് രാമ സംസ്ക്കാരത്തിന് വേണ്ടിയും രാമന്റെ നാമം ഉയര്ത്തിപ്പിടിക്കുന്നതിന് വേണ്ടിയും നിരന്തരം പോരാടും. എന്നാല് റോമന് സംസ്ക്കാരം വളര്ത്തിയ ഒരു ആകസ്മിക ഹിന്ദുവിന് അയോദ്ധ്യയിലെ ശ്രീരാമന്റെ ചൈതന്യം കണ്ണില് പെടില്ല. രാമന്റെ നാമം ഉയര്ത്താത്ത ഒരാളെക്കൊണ്ട് നമുക്ക് ഒരു ഉപയോഗവുമില്ല. ഹിന്ദുവിനെ അപമാനിക്കുകയും സനാതന ധര്മ്മത്തെ വിമര്ശിക്കുകയും വിദേശത്ത് ഭരണഘടനാ സ്ഥാപനങ്ങളുടെ അടിത്തറ മാന്തുകയും ചെയ്യുന്നയാള് സ്വന്തം വിശ്വാസ്യതയെ തന്നെ ചോദ്യം ചെയ്യുകയാണെന്നും പറഞ്ഞു.
കോണ്ഗ്രസ് അധികാരത്തില് വന്നാല് അവര് രാജ്യശത്ത ഒറ്റുകൊടുക്കുമെന്നും പാവപ്പെട്ടവരുടെ ക്ഷേമത്തിനും വികസനത്തിനും പകരം തങ്ങളുടെ ആളുകളെ കുത്തിനിറയ്ക്കാന് ശ്രമിക്കുമെന്നും പറഞ്ഞു. കോണ്ഗ്രസ് വന്നാല് അവര് രാജ്യത്തെ വിഭവങ്ങളില് ആദ്യ അവകാശം അവര് മുസ്ളീങ്ങള്ക്ക് നല്കും. എന്നാല് പ്രധാനമന്ത്രി വിശ്വസിക്കുന്നത് വിഭവങ്ങളില് ആദ്യ പരിഗണന പാവപ്പെട്ടവര്ക്കും പാര്ശ്വവല്ക്കരിക്കപ്പെട്ടവര്ക്കും ദളിതര്ക്കും സമൂഹത്തില് പിന്നോക്കം നില്ക്കുന്നവര്ക്കുമാകും നല്കുക എന്നും പറഞ്ഞു.
പ്രധാനമന്ത്രി രാജ്യം നിര്മ്മിക്കുകയാണ്. എന്നാല് 60-65 വര്ഷം ഭരിച്ച കോണ്ഗ്രസാകട്ടെ രാഷ്ട്രത്തെ കൊള്ളയടിക്കുകയും. അവര് സ്വിസ് ബാങ്ക് ഉള്പ്പെടെ വിദേശത്തേക്ക് പണം അയച്ചു. കോവിഡ് 19 ന്റെ കാലത്ത് ബിജെപി സേവന സന്നദ്ധ പ്രവര്ത്തനങ്ങളുമായി നീങ്ങിയപ്പോള് രാഹുല്ഗാന്ധിയെ ഒരിടത്തും കണ്ടില്ല. രാജ്യം പ്രതിസന്ധി നേരിട്ടപ്പോള് രാഹുല് ഓര്ത്തത് ഇറ്റലിയിലെ മുത്തശ്ശിയെക്കുറിച്ച് ആണെന്നും ഇന്ത്യയെകുറിച്ച് അല്ലെന്നും അദ്ദേഹം പറഞ്ഞു.
