റായ്പൂര്: ഛത്തീസ്ഗഡില് വ്യാജ എസ്.ബി.ഐ. ശാഖ സ്ഥാപിച്ച് വന് തട്ടിപ്പ്. നിരവധിപ്പേര്ക്കു പണം നഷ്ടമായി. റായ്പൂരില്നിന്ന് 250 കിലോമീറ്റര് അകലെ ശക്തി ജില്ലയിലെ ഛപോര ഗ്രാമത്തിലാണു തട്ടിപ്പ് നടന്നത്. തട്ടിപ്പുകാര് അവിടെ അനധികൃത നിയമനങ്ങള്, വ്യാജ പരിശീലന സെഷനുകള് എന്നിവ നടത്തിയതായും കണ്ടെത്തി.
10 ദിവസം മുമ്പാണു ഛപോരയില് എസ്.ബി.ഐ. ബ്രാഞ്ച് തുറന്നത്. യഥാര്ത്ഥ ബാങ്കില് ആവശ്യമായതെല്ലാം അവിടെ ഉണ്ടായിരുന്നു. ആറ് 'ജീവനക്കാരാണ്' ആദ്യഘട്ടം അവിടെ ഉണ്ടായിരുന്നത്. തട്ടിപ്പിനെക്കുറിച്ച് അറിയാതെ ഗ്രാമവാസികള് അക്കൗണ്ടുകള് തുറക്കാനും ഇടപാടുകള് നടത്താനും 'ബാങ്ക്' സന്ദര്ശിക്കാന് തുടങ്ങി. പുതുതായി 'നിയമിതരായ' ജീവനക്കാരും ബാങ്കില് ജോലി നേടിയതിന്റെ ആവേശത്തിലായിരുന്നു.
അടുത്തുള്ള എസ്.ബി.ഐയുടെ ദാബ്ര ബ്രാഞ്ചിലെ മാനേജര്ക്കുണ്ടായ സംശയമാണു തട്ടിപ്പുകാര്ക്ക് വിനയായത്. സെപ്റ്റംബര് 27 ന് പോലീസും എസ്.ബി.ഐ. ഉദ്യോഗസ്ഥരും ബാങ്കിലെത്തുംവരെ എല്ലാം സാധാരണ നിലയിലായിരുന്നു. വൈകാതെ ഇങ്ങനെ ഒരു ബ്രാഞ്ച് തന്നെ ഇല്ലെന്ന് എസ്.ബി.ഐ. അറിയിച്ചു. നിയമനങ്ങള് വ്യാജമാണെന്നും അവര് വ്യക്തമാക്കി.
വ്യാജ എസ്.ബി.ഐ. ശാഖയുടെ മാനേജരായി വേഷമിട്ട രേഖ സാഹു, മന്ദിര് ദാസ്, പങ്കജ് എന്നിവരുള്പ്പെടെ തട്ടിപ്പില് ഉള്പ്പെട്ട നാലു പേരെ തിരിച്ചറിഞ്ഞിട്ടുണ്ടെന്നും പോലീസ് അറിയിച്ചു. രേഖ സാഹുവും കൂട്ടരുമാണു മറ്റ് ജീവനക്കാരെ 'നിയമിച്ചത്'. ഇവര് നല്കിയ പരസ്യത്തിന്റെ അടിസ്ഥാനത്തിലാണു മാനേജര്, മാര്ക്കറ്റിംഗ് ഓഫീസര്, കാഷ്യര്, കമ്പ്യൂട്ടര് ഓപ്പറേറ്റര് തസ്തികളില് ആളുകളെത്തിയത്. റിക്രൂട്ട് ചെയ്ത എല്ലാവര്ക്കും തട്ടിപ്പുകാര് പരിശീലനവും നല്കി. തൊഴില് ലഭിച്ചവര് തട്ടിപ്പുകാര്ക്ക് രണ്ട് മുതല് ആറു ലക്ഷം രൂപവരെ നല്കിയതായി കണ്ടെത്തിയിട്ടുണ്ട്.
ഗ്രാമവാസിയായ തോഷ് ചന്ദ്രയുടെ ഉടമസ്ഥതയിലുള്ള കെട്ടിട സമുച്ചയത്തിലാണു വ്യാജ എസ്.ബി.ഐ. ശാഖ സ്ഥാപിച്ചത്. പ്രതിമാസം 7,000 രൂപയായിരുന്നു വാടക. ''പല ഗ്രാമവാസികളും പുതിയ ശാഖയെക്കുറിച്ച് ആവേശഭരിതരായിരുന്നു, ബാങ്ക് പൂര്ണമായും പ്രവര്ത്തനക്ഷമമായാല് വായ്പ എടുക്കുന്നതിനെക്കുറിച്ച് പോലും ആലോചിച്ചിരുന്നു.'' പ്രാദേശിക കടയുടമ യോഗേഷ് സാഹു പറഞ്ഞു.
