തിരുവനന്തപുരം: നറുക്കെടുപ്പിന് നാലു നാള് മാത്രം മുന്നില് നില്ക്കവേ സംസ്ഥാന ഭാഗ്യക്കുറിയുടെ 2024 തിരുവോണം ബമ്പര് വില്പ്പന 63 ലക്ഷത്തിലേക്ക്. അച്ചടിച്ച് എത്തിച്ച മുഴുവന് ടിക്കറ്റുകള്ക്കും ശക്തമായ വരവേല്പ്പാണ് സമൂഹത്തില് ലഭിച്ചത്. ആകെ 70 ലക്ഷം ടിക്കറ്റുകളാണ് ഭാഗ്യക്കുറി വകുപ്പ് വില്ക്കാന് നല്കിയത്. ഏഴുലക്ഷത്തോളം ടിക്കറ്റുകള് മാത്രമാണ് ഇനി വിപണിയിലുള്ളതും.
വരുന്ന നാലു ദിവസം കൂടി മാത്രം അവശേഷിക്കെ ഇതു മുഴുവന് വിറ്റുപോകുമെന്ന ഉറച്ച പ്രതീക്ഷയാണ് വകുപ്പിനുള്ളത്. 25 കോടി രൂപ ഒന്നാം സമ്മാനവും ഒരു കോടി രൂപ വീതം 20 പേര്ക്ക് നല്കുന്ന രണ്ടാം സമ്മാനവും 50 ലക്ഷം രൂപ മൂന്നാം സമ്മാനവും യഥാക്രമം 5 ലക്ഷവും 2 ലക്ഷവും നാലും അഞ്ചും സമ്മാനങ്ങളും 500 രൂപ അവസാന സമ്മാനവുമായാണ് തി തിരുവോണം ബമ്പര് ജനങ്ങള്ക്ക് മുമ്പിലുള്ളത്.
തിരുവനന്തപുരം ജില്ലയില് ഒരു ലക്ഷം ടിക്കറ്റില് താഴെ മാത്രമേ വിറ്റഴിക്കപ്പെടാനുള്ളു. കൊല്ലം ജില്ലയില് അവശേഷിക്കുന്നത് 23,000 ടിക്കറ്റുകളും മാത്രം. പത്തനംതിട്ടയില് 12,000 ടിക്കറ്റുകള് മാത്രമേ ഇനി വിപണിയിലുള്ളു. കോട്ടയത്ത് 23,000 ടിക്കറ്റുകളും ആലപ്പുഴയില് 15,000 ടിക്കറ്റുകളുമാണ് അവശേഷിക്കുന്നത്.
കേരളത്തില് മാത്രമാണ് സംസ്ഥാന ഭാഗ്യക്കുറിയുടെ വില്പ്പനയെന്നും പേപ്പര് ലോട്ടറിയായി മാത്രമാണ് വില്ക്കുന്നതെന്നും കാട്ടി അവബോധ പ്രചാരണം വകുപ്പ് ഊര്ജിതപ്പെടുത്തിയിട്ടുണ്ട്. ഹിന്ദി, തമിഴ്, കന്നഡ, തെലുങ്ക് ഭാഷയില് വ്യാജ ലോട്ടറിക്കെതിരേയുള്ള ബോധവത്കരണവുമായി വകുപ്പ് മുന്നോട്ട് പോവുകയാണ്.
