കണ്ണൂര്: മുന് എ.ഡി.എം. നവീന് ബാബുവിന്റെ ആത്മഹത്യയുമായി ബന്ധപ്പെട്ട വിവാദ പെട്രോള് പമ്പിന് സ്ഥലം പാട്ടത്തിന് നല്കിയതു പുനഃപരിശോധിച്ചേക്കുമെന്നു പള്ളിക്കമ്മിറ്റി ഭാരവാഹികള്. വിവാദങ്ങളുടെ പശ്ചാത്തലത്തില് കരാര് പുനഃപരിശോധിക്കാന് ഇടവക പൊതുയോഗത്തില് ചര്ച്ചചെയ്യും.
തളിപ്പറമ്പ്- ശ്രീകണ്ഠപുരം സംസ്ഥാന പാതയില് നെടുവാലൂര് പള്ളിയുടെ ഉടമസ്ഥതയിലുള്ള 40 സെന്റ് സ്ഥലമാണു പമ്പ് സ്ഥാപിക്കാനായി പാട്ടത്തിനെടുത്തത്. പമ്പ് ഉടമ ടി.വി പ്രശാന്തനാണ് ചേരന്കുന്ന് സെന്റ് ജോസഫ് പള്ളിയുമായാണ് കരാര് ഒപ്പിട്ടത്. 40സെന്റ് സ്ഥലം പ്രതിമാസം 40,000 രൂപ നിരക്കില് ഒരുവര്ഷം മുമ്പാണ് പാട്ടത്തിനെടുത്തത്. പമ്പ് അനുവദിക്കാന് വേണ്ടി നവീന് കൈക്കൂലി വാങ്ങിയെന്ന് പ്രശാന്തന് ആരോപിച്ചിരുന്നു. എന്നാല്, എ.ഡി.എം. സത്യസന്ധനാണെന്നും ഉടന് എന്.ഒ.സി. കിട്ടുമെന്നും പ്രശാന്തന് പറഞ്ഞതായി പള്ളി വികാരി പ്രതികരിച്ചു.
സെന്റിന് മാസം 1000 രൂപ നിരക്കിലാണ് കരാര്. പെട്രോള് പമ്പ് തുടങ്ങാന് ആവശ്യത്തിന് സാമ്പത്തിക സ്ഥിതിയില്ലാത്ത പ്രശാന്തന് ചില ഉന്നതരുടെ ബിനാമിയാണെന്ന് ആക്ഷേപമുണ്ട്. എന്നാല്, ഇതേക്കുറിച്ച് തങ്ങള്ക്ക് അറിവില്ലെന്ന് പള്ളി ഭാരവാഹികള് പറഞ്ഞു.
