ന്യൂഡല്ഹി: കേരളം ഉള്പ്പെടെ വിവിധ സംസ്ഥാനങ്ങളിലായി നൂറുകണക്കിന് അംഗങ്ങളും ഓഫീസുകളും പോപ്പുലര് ഫ്രണ്ട് ഓഫ് ഇന്ത്യക്ക് (പി.എഫ്.ഐ) ഉള്ളതായി ഇ.ഡിയുടെ കണ്ടെത്തല്. നാലുവര്ഷത്തെ അനേ്വഷണത്തിനുശേഷം ഇ.ഡി. തയാറാക്കിയ ഫയലുകളിലാണ് ഇതു സംബന്ധിച്ച രേഖകളുള്ളത്. കേരളം, കര്ണാടക, തമിഴ്നാട്, തെലങ്കാന, ഡല്ഹി, രാജസ്ഥാന്, മഹാരാഷ്ട്ര, ബീഹാര്, പശ്ചിമ ബംഗാള്, അസം, ജമ്മു കശ്മീര്, മണിപ്പുര് എന്നിവിടങ്ങളില് പി.എഫ്.ഐക്ക് സ്വത്തുവകകള് ഉള്ളതായി ഫയലുകള് വ്യക്തമാക്കുന്നു.
പി.എഫ്.ഐയുടെ വിദ്യാര്ഥി വിഭാഗമായ കാമ്പസ് ഫ്രണ്ട് ഓഫ് ഇന്ത്യയുടെ ജനറല് സെക്രട്ടറി കെ.എ. റൗഫ് ഷെരീഫിനെ 2020 ഡിസംബറില് ഇ.ഡി. അറസ്റ്റ് ചെയ്തിരുന്നു. പി.എഫ്.ഐയുടെ സാമ്പത്തിക സ്രോതസുകളും ശൃംഖലകളും കണ്ടെത്താനുള്ള വിവിധ ഏജന്സികളുടെ അനേ്വഷണത്തിനു തുടക്കമിട്ടത് ഇതോടെയാണ്. പട്നയിലെ റാലിക്കിടെ പ്രധാനമന്ത്രി മോദിയുടെ ജീവനെടുക്കാന് 2022 ല് പി.എഫ്.ഐ. പദ്ധതിയിട്ടിരുന്നു. ഇതേത്തുടര്ന്ന് നിയമവിരുദ്ധ പ്രവര്ത്തനങ്ങള് തടയല് നിയമപ്രകാരം ഈ സംഘടനയെ നിരോധിച്ചു. എന്നാല് സിംഗപ്പൂരിലും അഞ്ചു ഗള്ഫ് രാജ്യങ്ങളിലും മറ്റുമായി കുറഞ്ഞത് 13,000 അംഗങ്ങള് പി.എഫ്.ഐക്കുണ്ട്. അവിടെ അജ്ഞാത ദാതാക്കളില്നിന്ന് പണം സ്വരൂപിച്ച് ഹവാല വഴി ഇന്ത്യയിലേക്ക് അയയ്ക്കുന്നുവെന്ന് ഇ.ഡിയുടെ ഫയലില് പറയുന്നു. ഇവ ട്രസ്റ്റുകളുടെയും അനുബന്ധ സ്ഥാപനങ്ങളുടെയും 29 ബാങ്ക് അക്കൗണ്ടുകളില് നിക്ഷേപിക്കുകയാണു ചെയ്യുന്നത്.
ഏതാനും വര്ഷത്തിനിടെ ഏജന്സികള് പി.എഫ്.ഐയുടെ 26 ഉന്നത ഭാരവാഹികളെ അറസ്റ്റ് ചെയ്യുകയും ഇന്ത്യയിലും വിദേശത്തുമുള്ള സ്വത്തുക്കള് പിടിച്ചെടുക്കുകയും ചെയ്തിട്ടുണ്ട്. കേരളത്തില് ഒരു തീവ്രവാദ ക്യാമ്പും കണ്ടെത്തി. ഡല്ഹി കലാപം, ഹാഥ്റസിലെ അസ്വസ്ഥത, പ്രധാനമന്ത്രി മോദിയെ വധിക്കാനുള്ള ശ്രമം എന്നിവയ്ക്കു പിന്നില് പി.എഫ്.ഐയാണെന്ന് ഇ.ഡി. പറയുന്നു. അറസ്റ്റിലായവരില് സി.എഫ്.ഐ. ദേശീയ ജനറല് സെക്രട്ടറി റൌഫ് ഷെരീഫ്, ഖത്തര് കേന്ദ്രമാക്കി പി.എഫ്.ഐയില് പ്രവര്ത്തിക്കുന്ന ഷഫീഖ് പയത്ത്, ഡല്ഹി പി.എഫ.്ഐ. പ്രസിഡന്റ് പര്വേസ് അഹമ്മദ്, സിംഗപ്പൂരില്നിന്ന് പി.എഫ്.ഐക്കുവേണ്ടി ഹവാല ഇടപാട് നടത്തുന്ന സാഹുല് ഹമീദ് എന്നിവര് ഉള്പ്പെടുന്നു.
കണ്ണൂര് ജില്ലയിലെ നാരത്തില് പി.എഫ്.ഐയുടെ ആയുധ പരിശീലന ക്യാമ്പ് കണ്ടെത്തിയതായും ഫിസിക്കല് എജ്യുക്കേഷന് ക്ലാസുകളുടെ മറവില് അവിടെ സ്ഫോടകവസ്തുക്കളും ആയുധങ്ങളും ഉപയോഗിക്കാന് പ്രവര്ത്തകര്ക്കു പരിശീലനം നല്കുന്നുണ്ടെന്നും അനേ്വഷണ ഏജന്സി പറയുന്നു. പി.എഫ്.ഐയും അനുബന്ധ സംഘടനകളും കൂടി ഇതുവരെ 94 കോടിയിലധികം രൂപ സമാഹരിച്ചതായാണു കണ്ടെത്തല്. ഇതില് 57 കോടി രൂപയുടെ 35 സ്വത്തുക്കള് ഇ.ഡി. കണ്ടുകെട്ടി. കുവൈത്ത്, ഒമാന്, ഖത്തര്, സൗദി അറേബ്യ, യു.എ.ഇ. എന്നിവിടങ്ങളില് സംഘടന സജീവമാണ്.
