കോഴിക്കോട്; വിവാഹ അഭ്യര്ത്ഥന നിരസിച്ചതിനെ തുടര്ന്ന് കോഴിക്കോട് അത്തോളിയില് വീട്ടമ്മയെ കൊലപ്പെടുത്താന് ശ്രമിച്ച കേസില് പ്രതി അറസ്റ്റില്. പ്രതി വി മഷൂദിനെ അത്തോളി പോലീസാണ് അറസ്റ്റ് ചെയ്തത്. വെള്ളിയാഴ്ച രാത്രി 10 മണിയോടെ അസ്വാഭാവികമായി ഒരാള് കുനിയില് കടവ് റോഡ് ടര്ഫിന് സമീപം നില്ക്കുന്നതായി പോലീസിന് രഹസ്യ വിവരം ലഭിച്ചു. പോലീസ് സ്ഥലത്ത് എത്തി പ്രതിയെ കസ്റ്റഡിയിലെടുത്തു. ഇന്ന് രാവിലെ പരാതിക്കാരിയായ വീട്ടമ്മയെ പ്രതിയുടെ ഫോട്ടോ കാണിച്ചു, അവര് തിരിച്ചറിഞ്ഞു. തുടര്ന്ന് പ്രതിയുടെ അറസ്റ്റ് രേഖപ്പെടുത്തി. സംഭവം നടന്ന സ്ഥലത്ത് എത്തിച്ച് തെളിവെടുപ്പ് നടത്തി. ബ്ലേഡ് കൊണ്ടാണ് മുറിവേല്പ്പിച്ചതെന്ന് പ്രതി പോലീസിന് മൊഴി നല്കി. കൃത്യം നടത്തിയ സ്ഥലത്ത് നിന്നും 50 മീറ്റര് അകലെ റോഡില് നിന്ന് ബ്ലെയ്ഡ് കണ്ടെത്തി. ഇക്കഴിഞ്ഞ വ്യാഴാഴ്ച വൈകീട്ട് 7.30 ഓടെയാണ് കേസിനാസ്പദമായ സംഭവം നടന്നത്.
