പാലക്കാട്: കേരളം ഫലം അറിയാന് ഏറെ ആകാംഷയോടെ കാത്തിരുന്ന പാലക്കാട്ടെ സസ്പെന്സ് ത്രില്ലറിനൊടുവില് കോണ്ഗ്രസിന്റെ രാഹുല്മാങ്കൂട്ടത്തിന് വ്യക്തമായ മേല്ക്കൈ. വോട്ടെണ്ണല് അവസാനത്തിലേക്ക് കടക്കുമ്പോള് 10,000 വോട്ടുകളുടെ മേല്ക്കോയ്മ നേടിയ രാഹുല് മാങ്കൂട്ടത്തില് വിജയം ഏറെക്കുറെ ഉറപ്പിച്ചു. പല തവണ മാറി മറിഞ്ഞ ശേഷം ലീഡ് നില സ്ഥായിയായി തുടരുകയാണ്.
അവസാന നിമിഷം ബിജെപിയില് നിന്നും ചുവടുമാറ്റം പ്രഖ്യാപിച്ച് സന്ദീപ് വാര്യര് പലക്കാടുകാരുടെ സ്നേഹത്തിന് നന്ദി പറഞ്ഞു.യുഡിഎഫ് ക്യാമ്പില് പടക്കം പൊട്ടിച്ചും മധുരം വിതരണം ചെയ്തു കോണ്ഗ്രസ് പ്രവര്ത്തകര് ആഹ്ളാദം തുടങ്ങിക്കഴിഞ്ഞു. ബിജെപി ഏറെ പ്രതീക്ഷ വെച്ചിരുന്ന നഗരമേഖലകളില് വന് തിരിച്ചടിയാണ് ഏറ്റത്. ആദ്യ മണിക്കൂറില് ബിജെപിയുടെ സി. കൃഷ്ണകുമാറിനായിരുന്നു മുന്നേറ്റം പോസ്റ്റല് ഹോം വോട്ടുകളില് നിലനിര്ത്തിയ ലീഡ് പക്ഷേ രണ്ടാം റൗണ്ട് എണ്ണിക്കഴിഞ്ഞപ്പോഴേയ്ക്കും രാഹുല് തിരിച്ചുപിടിച്ചു.
യുഡിഎഫ് ക്യാമ്പ് ആഹ്ളാദം തുടങ്ങിയപ്പോള് തന്നെ അഞ്ചാം റൗണ്ട് എണ്ണിക്കഴിഞ്ഞപ്പോള് വീണ്ടും കൃഷ്ണകുമാര് മുന്നിലെത്തി. എന്നാല് പിന്നീട് രാഹുലിന്റെ കുതിപ്പ് വീണ്ടും കാണുകയായിരുന്നു. പതിയെ ലീഡ് നില മെച്ചപ്പെടുത്തിയ രാഹുല് മാങ്കൂട്ടത്തില് യുഡിഎഫിന് പാലക്കാട്ട് വന് വിജയത്തിന്റെ പ്രതീക്ഷ വീണ്ടും ജ്വലിപ്പിച്ചു. പരാജയം ബിജെപിയില് വന് കോലാഹലം സൃഷ്ടിച്ചേക്കും 7,000 വോട്ടുകളാണ് ബിജെപിയുടെ ചോര്ന്നത്.
അതേസമയം ഒരു തവണ പോലും എല്ഡിഎഫിന്റെ പി. സരിന് മത്സരത്തില് ഉണ്ടായിരുന്നില്ല. മൂന്നാം സ്ഥാനത്തേക്ക് പിന്തള്ളപ്പെട്ട എല്ഡഎഫ് സ്ഥാനാര്ത്ഥിയുടെ ചുവടുമാറ്റം പാര്ട്ടിക്ക് കാര്യമായ ഗുണമുണ്ടാക്കിയില്ല. തോല്വിയോടെ നിയമസഭയിലേക്ക് തിരിച്ചെത്താമെന്ന ബിജെപിയുടെ മോഹത്തിന് ഇത്തവണയും തിരിച്ചടി നേരിട്ടു. നഗരമേഖലകളില് ബിജെപിയ്ക്ക് കാര്യമായ ഗുണമുണ്ടാകാതെ പോയതാണ് തിരിച്ചടിയായത്.
