ന്യൂഡല്ഹി: ജനങ്ങള് ആവര്ത്തിച്ച് നിരസിക്കുന്നവര് പാര്ലമെന്റിനെയും ജനാധിപത്യത്തെയും അനാദരിക്കുന്നുവെന്ന് പ്രധാനമന്ത്രി നരേന്ദ്രമോദി. പാര്ലമെന്റും എംപിമാരുമാണ് ഭരണഘടനയുടെ പ്രധാന ഭാഗങ്ങളെന്നും പാര്ലമെന്റില് ആരോഗ്യകരമായ ചര്ച്ചകള് നടക്കണമെന്നും കൂടുതല് ആളുകള് ചര്ച്ചകള്ക്ക് സംഭാവന നല്കണമെന്നും അദ്ദേഹം പറഞ്ഞു.
മഹാരാഷ്ട്ര നിയമസഭാ തെരഞ്ഞെടുപ്പില് ബിജെപി നേതൃത്വം നല്കുന്ന എന്ഡിഎ വന്വിജയം നേടിയിരുന്നു. ഇതിന് പിന്നാലെ നടക്കുന്ന ശീതകാല സമ്മേളനത്തിന് മുന്നോടിയായി നടത്തിയ പ്രസംഗത്തിലായിരുന്നു പ്രധാനമന്ത്രി ഇക്കാര്യം പറഞ്ഞത്. ജനങ്ങളുടെ ശബ്ദം പാര്ലമെന്റില് ഉയര്ത്താന് കോണ്ഗ്രസിന് കഴിഞ്ഞിട്ടില്ലെന്നും അധികാരക്കൊതിയന്മാരെ ജനം തെരഞ്ഞെടുപ്പില് തള്ളിയെന്നും പറഞ്ഞു.
''നിര്ഭാഗ്യവശാല്, ചിലര് സ്വന്തം രാഷ്ട്രീയ നേട്ടങ്ങള്ക്കായി, വിരലിലെണ്ണാവുന്ന ആളുകള്ക്കിടയില് ഗുണ്ടായിസം സൃഷ്ടിച്ച് പാര്ലമെന്റിനെ നിയന്ത്രിക്കാന് നിരന്തരം ശ്രമിച്ചുകൊണ്ടിരിക്കുകയാണെന്നും പാര്ലമെന്റിന്റെ ശീതകാല സമ്മേളനത്തില് ആരോഗ്യകരമായ ചര്ച്ചകള് ഉണ്ടാകുമെന്ന് പ്രതീക്ഷിക്കുന്നതായും പറഞ്ഞു. ഭരണഘടന അംഗീകരിച്ചതിന്റെ 75-ാം വര്ഷത്തിന്റെ ആരംഭം ഉള്പ്പെടെ നിരവധി കാരണങ്ങളാല് 'പ്രത്യേക'മാണെന്നും അദ്ദേഹം പറഞ്ഞു. ശീതകാല സമ്മേളനം ഡിസംബര് 20 വരെ തുടരുമെന്ന് പ്രതീക്ഷിക്കുന്നു.
