കോഴിക്കോട്: കെ-റെയില്‍ സംബന്ധിച്ചു വീണ്ടും ആശങ്ക ഉയരുന്നു. കോഴിക്കോട് റെയില്‍വേ സ്റ്റേഷന് വികസനത്തിന്റെ ഭാഗമായി നിര്‍ദിഷ്ട കെ-റെയില്‍ സ്റ്റേഷന് സ്ഥലം ഒഴിച്ചിട്ടതാണ് ആശങ്കയ്ക്ക് അടിസ്ഥാനം. കേരളത്തിലെ ഏറ്റവും വലിയ വിസകന പദ്ധതിക്കാണു കോഴിക്കോട് സാക്ഷ്യം വഹിക്കുന്നത്. 472.96 കോടി രൂപ ചെലവില്‍ മൂന്ന് വര്‍ഷത്തിനകം രാജ്യാന്തര നിലവാരത്തില്‍ ആധുനികവല്‍ക്കരണം പൂര്‍ത്തീകരിക്കാനുള്ളതാണ് പദ്ധതി. ഇതില്‍ നാലാം പ്ലാറ്റുഫോമിനടുത്തായാണ് സില്‍വര്‍ ലൈനിന്റെ ഭൂഗര്‍ഭ സ്റ്റേഷന് നിര്‍മിക്കാന്‍ സ്ഥലം ഒഴിച്ചിട്ടത്.
കോഴിക്കോട്ടെത്തുന്നതിന് മുമ്പ് കല്ലായി പുഴയെത്തുമ്പോള്‍ ഭൂമിക്കടിയിലേക്കു മാറുന്ന വിധത്തിലാണ് അര്‍ധ അതിവേഗ റെയില്‍ പദ്ധതി വിഭാവനം ചെയ്തത്. കോഴിക്കോട് സ്‌റ്റേഷന്റെ പടിഞ്ഞാറ് ഭാഗത്തെ ടെര്‍മിനല്‍ കെട്ടിടത്തിനടുത്തായിട്ടായിരിക്കും ഇതിന്റെ സ്റ്റേഷന് നിലവില്‍ വരിക. കൊല്‍ക്കത്ത മെട്രോ സ്‌റ്റേഷനിലേത് പോലെ ഭൂമിക്കടിയിലെ സ്‌റ്റേഷനിലേക്ക് ഇറങ്ങി ചെല്ലാന്‍ പാകത്തില്‍ സൗകര്യമൊരുക്കും. ഈ മാസം റെയില്‍വേ മന്ത്രി അശ്വിന്‍ വൈഷ്്ണവ് കേരളം സന്ദര്‍ശിച്ച വേളയിലാണു കെ-റെയില്‍ പുനരുജ്ജീവിപ്പിക്കുന്നത് സംബന്ധിച്ച സൂചനയുയര്‍ന്നത്. അതിനും ഒരു മാസം മുമ്പ് മുഖ്യമന്ത്രി പിണറായി വിജയന്‍ ഡല്‍ഹിയില്‍ ചെന്ന് റെയില്‍വേ മന്ത്രിയെ കണ്ട് ചര്‍ച്ച നടത്തിയിരുന്നു.
രണ്ടു ലക്ഷം കോടി വായ്പയെടുത്ത്് നടപ്പാക്കുന്നതാണു കെ റെയില്‍ പദ്ധതി. തിരുവനന്തപുരം മുതല്‍ കാസര്‍കോട് വരെ അതിവേഗ റെയില്‍പാത പണിയാനാണ് ഏഴ് വര്‍ഷം മുമ്പ് കേരള റെയില്‍ ഡെവലപ്പ്‌മെന്റ് കോര്‍പറേഷന്‍ രൂപീകരിച്ചത്. 3500 ഏക്കര്‍ ഭൂമി ഏറ്റെടുത്താണ് പദ്ധതി നടപ്പാക്കുക. 80,000 മുതല്‍ ഒരു ലക്ഷം വരെ ആളുകള്‍ ഭവനരഹിതരാകുമെന്നാണ് ആശങ്ക. 132 കിലോ മീറ്റര്‍ പ്രദേശത്തെ നെല്‍വയലുകള്‍ അപ്രത്യക്ഷമാവും.
പത്ത് റെയില്‍വേ സ്‌റ്റേഷനുകള്‍ പണിയാന്‍ 2500 ഏക്കര്‍ വേറെയും വേണം. കെ-റെയില്‍ പര്യസങ്ങള്‍ക്കായി സംസ്ഥാന ഖജനാവിന് ഇതിനകം നഷ്ടം 100 കോടിയാണ്. ഈ പദ്ധതിയെ കൈയൊഴിഞ്ഞുവെന്ന കാര്യം പരസ്യമാക്കാതിരുന്നതായിരുന്നു. കേരള ഹൈക്കോടതിയില്‍ സര്‍ക്കാര്‍ അഭിഭാഷകന്‍ നിലപാട് അറിയിച്ചതോടെ എല്ലാം വ്യക്തമായി. സര്‍വേ ഉള്‍പ്പെടെ എല്ലാം കേരള സര്‍ക്കാരും നിര്‍ത്തി വെച്ചതായി ഹൈക്കോടതിയെ അറിയിച്ചിരുന്നു. ഇതോടെ മരവിച്ച നിലയിലായിരുന്ന കെ റെയില്‍ പദ്ധതിക്ക് വീണ്ടും ജീവന്‍ വെച്ച അവസ്ഥയാണ് ഇ്‌പ്പോള്‍ സംജാതമായത്.
പ്രായോഗികമല്ലെന്ന് കണ്ട് റെയില്‍വേ ഉപേക്ഷിച്ചതാണ് സില്‍വര്‍ ലൈനെന്ന സ്റ്റാന്‍ഡ് എലോണ്‍ റെയില്‍. ഇതിലൂടെ മറ്റു ട്രെയിനുകള്‍ കടത്തിവിടാന്‍ നിര്‍വാഹമില്ല. കാസര്‍കോട്-തിരുവനന്തപുരം കെ-ട്രെയിനുകള്‍ ഓടാന്‍ മാത്രമാണ് പുതിയ പാത പണിയുന്നത്. കേന്ദ്രം മുന്‍ നിലപാട് മാറ്റി അനുവാദം നല്‍കുന്ന കാര്യം പരിഗണിക്കാമെന്ന് പറയുന്നത് സ്റ്റാന്‍ഡേര്‍ഡ് ഗേജ് എന്ന രീതി മാറ്റണമെന്ന നിബന്ധന മുന്നോട്ടു വെച്ചാണ്. മറ്റു റെയില്‍പാതകളെ പോലെ ബ്രോഡ് ഗേജില്‍ പണിത് ഇതര ട്രെയിനുകളും ഓടിക്കാനാവണം.
ഏതായാലും റെയില്‍വേയുടെ നിലപാട് മാറ്റത്തെ ആശങ്കയോടെയാണ് കെ-റെയില്‍ വിരുദ്ധ സമിതിയുള്‍പ്പെടെയുള്ളവര്‍ കാണുന്നത്. പദ്ധതി യാഥാര്‍ഥ്യമാവുന്ന പക്ഷം, കോഴിക്കോട് ജില്ലയിലെ കാട്ടിലപ്പീടികയില്‍ മാത്രം അഞ്ഞൂറ് കുടുംബങ്ങളെ കുടിയൊഴിപ്പിക്കേണ്ടി വരും.
Comments