മുംബൈ: മുംബൈയിലെ ഫ്ളാറ്റില് ആത്മഹത്യ ചെയ്ത നിലയില് കാണപ്പെട്ട 25 കാരി എയര് ഇന്ത്യ പൈലറ്റിന് കാമുകനില് നിന്ന് നിരന്തരമായ പീഡനവും അപമാനവും നേരിടേണ്ടി വന്നതായി റിപ്പോര്ട്ട്. പൊതുസ്ഥലത്ത് വെച്ച് അപമാനിക്കുന്നതിന് പുറമേ ഭക്ഷണശീലം മാറ്റാനും മാംസാഹാരം കഴിക്കുന്നത് നിര്ത്തിക്കാനും ശ്രമം നടത്തിയിരുന്നതായി വീട്ടുകാര്. സംഭവത്തില് 27 കാരനായ ആദിത്യ പണ്ഡിറ്റ് എന്ന യുവാവിനെതിരേ ആത്മഹത്യാപ്രേരണാ കുറ്റത്തിന് കേസെടുത്തിരിക്കുകയാണ്. സൃഷ്ടി തൂലി എന്ന പൈലറ്റാണ് മുംബൈയിലെ ഫ്ളാറ്റില് ആത്മഹത്യ ചെയ്തത്.
സൃഷ്ടിയുടെ അമ്മാവന് വിവേക് കുമാര് നരേന്ദ്രകുമാര് തുലിയുടെ പരാതിയുടെ അടിസ്ഥാനത്തില് പവായ് പോലീസ് ആണ് കേസെടുത്തിരിക്കുന്നത്. ആദിത്യ തന്റെ കാമുകിയോട് മോശമായി പെരുമാറിയതിന്റെ നിരവധി സംഭവങ്ങള് ഉദ്ധരിച്ചിട്ടുണ്ട്. കഴിഞ്ഞ വര്ഷം നവംബറില് ആദിത്യ തന്റെ മക്കള് റാഷിയെയും സൃഷ്ടിയെയും തന്റെ കാറില് ഡല്യിരുന്നതായി അമ്മാവന് പറഞ്ഞു. തുടര്ന്ന് കമിതാക്കള്ക്കിടയില് തര്ക്കം ഉണ്ടായപ്പോള് ആദിത്യ രാഷിയുടെ മുന്നിലിട്ട് സൃഷ്ടിയെ ചീത്തവിളിക്കുകയും ദേഷ്യത്തില് വാഹനം കൊണ്ട് മറ്റൊരു കാറില് ഇടിപ്പിക്കുകയും ചെയ്തു.
തന്റെ കാറിന് കേടുപാടുകള് സംഭവിച്ചെങ്കിലും ആദിത്യയ്ക്ക് അത് ബാധകമേ ആയില്ലെന്നും വിവേക് കുമാര് പറഞ്ഞു. ഈ വര്ഷം മാര്ച്ചിലും സൃഷ്ടിയെ ആദിത്യ അപമാനിക്കുന്ന സംഭവമുണ്ടായി. ഇരുവരും റാഷിയും അവളുടെ സുഹൃത്തുക്കളും ഒപ്പം ഗുരുഗ്രാമില് ഒരു അത്താഴത്തിന് ഒ്ത്തുകൂടി. സൃഷ്ടിയും മറ്റുള്ളവരും സസ്യേതര ഭക്ഷണം കഴിക്കണമെന്ന് നിര്ദ്ദേശിച്ചപ്പോള് ആദിത്യ സൃഷ്ടിയെ അപമാനിച്ചു. ഒരു തര്ക്കത്തിന് ശേഷം, ഇരുവരും സസ്യാഹാരം കഴിക്കാന് പോയി. എന്നാല് മിനിറ്റുകള്ക്ക് ശേഷം, ആദിത്യ തന്നെ റോഡില് ഉപേക്ഷിച്ച് വീട്ടിലേക്ക് പോയി എന്ന് പറഞ്ഞ് സൃഷ്ടി റാഷിയെ വിളിച്ചു.
തനിക്ക് ഈ ബന്ധം ഏറെ ബുദ്ധിമുട്ടുണ്ടാക്കുന്നതാണെന്ന് സൃഷ്ടി പലപ്പോഴും പറഞ്ഞിരുന്നെങ്കിലും ഏറെ സ്നേഹിക്കുന്നതിനാല് ആദിത്യയെ ഉപേക്ഷിക്കാന് കഴിയുന്നില്ലെന്നും റാഷിയോട് സൃഷ്ടി പതിവായി പറഞ്ഞിരുന്നെന്നും വിവേക് കുമാര് പറയുന്നു. ദിവസങ്ങള്ക്ക് ശേഷം മറ്റൊദരു സംഭവത്തില് ആദിത്യയ്ക്ക് ഒരു കുടുംബ ചടങ്ങില് പങ്കെടുക്കാനുണ്ടായിരുന്നു സൃഷ്ടി തനിക്കൊപ്പം വേണമെന്നും അയാള് ശഠിച്ചു. അന്ന് കാമുകി വിമാനത്തില് പൈലറ്റാകേണ്ടതുണ്ടെന്ന് അറിഞ്ഞിട്ടും പരിപാടിയില് പങ്കെടുക്കാന് ഇയാള് നിരന്തരം സമ്മര്ദ്ദം ചെലുത്തുകയായിരുന്നു. മറ്റൊരു തര്ക്കം പൊട്ടിപ്പുറപ്പെട്ടപ്പോള്, ആദിത്യ സൃഷ്ടിയുടെ ഫോണ് നമ്പര് പത്തുപന്ത്രണ്ട ദിവസത്തേക്ക് തടഞ്ഞു.
ഇത് സൃഷ്ടിക്ക് വലിയ സമ്മര്ദ്ദമുണ്ടാക്കി. നിസാര കാരണങ്ങളാല് ആദിത്യ തന്നെ പൊതുസ്ഥലത്ത് അപമാനിക്കുകയും നമ്പര് ബ്ലോക്ക് ചെയ്യുകയും ചെയ്യുന്നതിനാല് സൃഷ്ടി എപ്പോഴും വിഷമിച്ചിരുന്നതായി പരാതിയില് പറയുന്നു. രണ്ട് വര്ഷം മുമ്പ് യുവതി ഡല്ഹിയില് കൊമേഴ്സ്യല് പൈലറ്റ് കോഴ്സിന് പഠിക്കുന്നതിനിടെയാണ് ഇരുവരും കണ്ടുമുട്ടിയതും പ്രണയത്തിലായതും.
തിങ്കളാഴ്ചയാണ് അന്ധേരിയിലെ മാറോള് ഏരിയയിലെ കനകിയ റെയിന് ഫോറസ്റ്റ് കെട്ടിടത്തിലെ വാടക ഫ്ലാറ്റില് സൃഷ്ടിയുടെ മൃതദേഹം കണ്ടെത്തിയത്. ഡേറ്റ കേബിളില് തൂങ്ങിമരിച്ചെങ്കിലും ആത്മഹത്യാക്കുറിപ്പൊന്നും കണ്ടെടുക്കാനായില്ലെന്ന് പോലീസ് പറഞ്ഞു. ഭാരതീയ ന്യായ സന്ഹിതയുടെ സെക്ഷന് 108 പ്രകാരമാണ് ആദിത്യയെ ചൊവ്വാഴ്ച അറസ്റ്റ് ചെയ്തത്. കോടതിയില് ഹാജരാക്കിയ ഇയാളെ നവംബര് 29 വരെ പോലീസ് കസ്റ്റഡിയില് വിട്ടു.
(ആത്മഹത്യ ഒന്നിനും പരിഹാരമല്ല. മാനസീകപിന്തുണ ആവശ്യമുള്ളപ്പോള് വിദഗ്ദ്ധരെ സമീപിക്കുക)
