തിരുവനന്തപുരം: പെരിന്തല്മണ്ണയിലെ സ്വര്ണക്കവര്ച്ച കേസില് വയലിനിസ്റ്റ് ബാലഭാസ്ക്കറിന്റെ ഡ്രൈവറായിരുന്ന അര്ജുന് അറസ്റ്റിലായതോടെ അപകടമരണക്കേസ് വീണ്ടും ചര്ച്ചയാകുന്നു. തുടക്കം മുതല് ഇതുമായി ബന്ധപ്പെട്ട ആരോപണം നിലവിലുണ്ടായിരുന്നെങ്കിലും ബാലഭാസ്ക്കറിന്റെ പിതവ് കെ.സി. ഉണ്ണി വീണ്ടും ഇൗ ആരോപണവുമായി രംഗത്ത് എത്തി. അപകട സമയത്ത് ബാലഭാസ്ക്കറിന്റെ ഡ്രൈവര് ആയിരുന്നു മലപ്പുറത്ത് സ്വര്ണക്കവര്ച്ച കേസില് അറസ്റ്റിലായ അര്ജുന്.
വിഷയം വീണ്ടും ശക്തമായി ഉന്നയിക്കാനാണ് അദ്ദേഹത്തിന്റെ തീരുമാനം. ഇതിന്റെ ഭാഗമായി അര്ജുന് അറസ്റ്റിലായ വിവരം ഉള്പ്പെടെ സി.ബി.ഐയുടെ ശ്രദ്ധയില്പ്പെടുത്തുമെന്ന് ഉണ്ണി അറിയിച്ചു. സത്യം പുറത്തു വരുമെന്നാണ് വിശ്വാസം. അര്ജുന് നേരത്തേയും ക്രിമിനല് കേസുകളില് പ്രതിയാണ്. ആരു ചാകുന്നു, ആരെ കൊല്ലുന്നു എന്നതല്ല അവരുടെ പ്രശ്നം. പണമുണ്ടാക്കുക എന്നതാണ്. മലപ്പുറത്ത് ജൂവലറി ഉടമയില്നിന്ന് മൂന്നു കിലോ സ്വര്ണം അവര് എടുത്തുകൊണ്ടു പോയി എന്നാണ് ഇപ്പോള് അറിയുന്നത്. പോലീസിന് ഇതുവരെ അവരെ പിടിക്കാനും കഴിഞ്ഞിട്ടില്ല. ഇതൊക്കെയാണ് അവരുടെ സ്ഥിരം ജോലി.
ബാലഭാസ്ക്കറിന്റെ മരണത്തില് ഒരു നീതിയും തങ്ങള്ക്കു ലഭിച്ചിട്ടില്ല. സി.ബി.ഐ രണ്ടാമതൊരു റിപ്പോര്ട്ട് കൊടുത്തിട്ടുണ്ട്. അത് എന്താണെന്നു പരിശോധിച്ചു മുന്നോട്ടു പോകും. ആദ്യ കേസ് പിന്വലിക്കാമെങ്കില് എം.എ.സി.ടി (മോട്ടര് ആക്സിഡന്റ് ക്ളെയിം ട്രൈബ്യൂണല്) കേസ് പിന്വലിപ്പിക്കാമെന്നാണ് അനേ്വഷണ ഉദ്യോഗസ്ഥര് പറയുന്നത്. അതു വേണ്ട കേസ് മുന്നോട്ടു പോകട്ടെ എന്നാണു മറുപടി നല്കിയത് ഉണ്ണി പറഞ്ഞു. അര്ജുന് കൊടുത്ത എം.എ.സി.ടി കേസ് തങ്ങള് തോറ്റു എന്ന നിലയിലാണ് പോലീസ് തന്നെ പറയുന്നത്. അപകടസമയത്തു വാഹനമോടിച്ചത് ബാലഭാസ്ക്കര് ആണെന്നും അര്ജുന് താന് നഷ്ടപരിഹാരം നല്കണമെന്നുമാണ് കേസ്. ഇന്ഷുറന്സ് കമ്പനിയല്ല മറിച്ച് താന് ഒരു കോടി നഷ്ടപരിഹാരം നല്കണമെന്നാണ് ആവശ്യം. ഒരു കാര്യവുമില്ലാത്ത കേസ് ഇപ്പോള് വലിയ തലവേദന ആയിരിക്കുകയാണ്. കള്ളക്കടത്ത് മാഫിയയെ സംരക്ഷിക്കാനുള്ള ശ്രമമാണ് നടക്കുന്നതെന്നും ഉണ്ണി പറഞ്ഞു.
അര്ജുന് മുമ്പും പല കേസുകളില് പ്രതിയായിരുന്നു. അപകടത്തിനുശേഷമാണ് ഇൗ കേസുകളെ കുറിച്ച് അറിയുന്നത്. അര്ജുന്റെ അറസ്റ്റോടെ കൊലപാതകമെന്ന സംശയം ബലപ്പെടുകയാണ്. സി.ബി.ഐയും സ്വാധീനങ്ങള്ക്ക് വഴങ്ങിയാണ് അനേ്വഷണം അവസാനിപ്പിച്ചതെന്നും ഉണ്ണി ആരോപിച്ചു. ഇൗ മാസം 21ന് ആയിരുന്നു പെരിന്തല്മണ്ണയില് കവര്ച്ച നടന്നത്. കേസുമായി ബന്ധപ്പെട്ട് നടത്തിയ അനേ്വഷണത്തിലാണ് ബാലഭാസ്ക്കറിന്റെ മരണസമയം വാഹനം ഓടിച്ചിരുന്നത് അര്ജുന് ആയിരുന്നെന്ന് കണ്ടത്തിയത്. അന്ന് പോലീസും ക്രൈംബ്രാഞ്ചും സി.ബി.ഐയും വാഹനാപകടത്തിലെ സംശയങ്ങളില് അര്ജുനെ ചോദ്യം ചെയ്തിരുന്നു.
അര്ജുനു സ്വര്ണക്കടത്ത് സംഘങ്ങളുമായി ബന്ധമുണ്ടെന്ന ആരോപണവും അന്ന് ശക്തമായിരുന്നു. ഇത് ബലപ്പെടുത്തുന്നതാണ് പെരിന്തല്മണ്ണയിലെ സ്വര്ണക്കവര്ച്ചയും അര്ജുന്റെ അറസ്റ്റും. ഇതിനു പുറമേ ചില കവര്ച്ച കേസുകളിലും അടിപിടി കേസുകളിലും അര്ജുന് പങ്കുണ്ടെന്ന് പോലീസ് കണ്ടെത്തിയിട്ടുണ്ട്. ഇൗ കവര്ച്ചാക്കേസില് ഉള്പ്പെട്ടിട്ടുള്ള മറ്റു പ്രതികളുമായുള്ള മുന് പരിചയം പിന്നീട് സ്വര്ണക്കവര്ച്ചയിലെ ഗൂഢാലോചനയിലേക്ക് എത്തുകയായിരുന്നു. എന്നാല് പുതിയ കേസിന് ബാലഭാസ്ക്കറിന്റെ മരണവുമായി ബന്ധമില്ലെന്നും ആ രീതിയില് അനേ്വഷണം ഇല്ലെന്നും പോലീസ് വ്യക്തമാക്കിയിട്ടുമുണ്ട്. നിലവില് റിമാന്ഡിലാണ് അര്ജുന്.
