ബെൽജിയം ലൈംഗികത്തൊഴിലാളികൾക്ക് പ്രസവാവധി, ആരോഗ്യ ഇൻഷുറൻസ്, പെൻഷൻ എന്നിങ്ങനെയുള്ള ആനുകൂല്യങ്ങള് നല്കും. ഒരു രാജ്യം ലോകത്ത് ആദ്യമായാണ് ലൈംഗികത്തൊഴിലാളികളുടെ അവകാശങ്ങൾ അംഗീകരിക്കുന്നത്. 2022ൽ ലൈംഗിക തൊഴിൽ കുറ്റകൃത്യമല്ലാതാക്കിയ ശേഷം അവതരിപ്പിച്ച ഈ നിയമം, ലൈംഗിക തൊഴിലാളികൾക്ക് മറ്റ് തൊഴിലുകൾ പോലെ സംരക്ഷണം നൽകുന്നു.
ഹ്യൂമൻ റൈറ്റ്സ് വാച്ച് നേതാവ് എറിൻ കിൽബ്രിഡ് ലൈംഗിക തൊഴിലാളികളെ സംരക്ഷിക്കുന്നതിനുള്ള പുരോഗമനപരമായ നടപടി എന്നാണ് ഇത് സംബന്ധിച്ച് പ്രതികരിച്ചത്. ജോലി നിയമവിരുദ്ധമാണെങ്കിൽ സംരക്ഷിക്കാൻ നിയമവുമില്ല എന്നതിനാൽ ഈ നിയമം സുപ്രധാനമാണെന്ന് ബെൽജിയൻ യൂണിയൻ ഓഫ് സെക്സ് വർക്കേഴ്സ് പ്രസിഡന്റ് വിക്ടോറിയ പറഞ്ഞു. താൻ ബലാത്സംഗം ചെയ്യപ്പെട്ടെന്ന് ഒരിക്കൽ പരാതി നൽകിയപ്പോൾ ലൈംഗിക തൊഴിലാളികളെ ബലാത്സംഗം ചെയ്യാൻ കഴിയില്ല എന്നാണ് പോലീസ് ഓഫീസർ പറഞ്ഞതെന്ന് വിക്ടോറിയ വിശദീകരിച്ചു. മറ്റുള്ളവരെ പോലെ ജീവിക്കാൻ അവസരം നൽകുന്ന നിയമം എന്നാണ് അഞ്ച് കുട്ടികളുടെ അമ്മയായ സോഫി പ്രതികരിച്ചത്.
അതേസമയം രാജ്യത്തെ മറ്റൊരു വിഭാഗം രൂക്ഷവിമർശനവുമായി രംഗത്തെത്തി. ഇസല എന്ന സന്നദ്ധ സംഘടന പ്രവർത്തകയായ ജൂലിയ ക്രൂമിയർ പറയുന്നത് സ്ത്രീകളെ ചൂഷണം ചെയ്യുന്ന മേഖലയാണിതെന്നാണ്.
