തിരുവനന്തപുരം: കിടക്കയില് മൂത്രമൊഴിച്ചതിനു രണ്ടരവയസുകാരിയുടെ ജനനേന്ദ്രിയത്തില് നുള്ളിപ്പരുക്കേല്പ്പിച്ച ശിശുക്ഷേമസമിതി ആയമാര് അറസ്റ്റില്. ശിശുക്ഷേമസമിതി ജനറല് സെക്രട്ടറി ജി.എല്. അരുണ് ഗോപിയുടെ പരാതിയില് ആയമാരായ അജിത, മഹേശ്വരി, സിന്ധു എന്നിവര്ക്കെതിരേ പോക്സോ ചുമത്തി കേസെടുത്തു.
സംഭവം നടന്ന ആഴ്ചയില് ജോലിയിലുണ്ടായിരുന്ന ഏഴ് താത്കാലികജീവനക്കാരെ ശിശുക്ഷേമസമിതി പിരിച്ചുവിട്ടു. കുഞ്ഞിനെ ഉപദ്രവിച്ചതിന് അജിതയ്ക്കെതിരേയും വിവരം മറച്ചുവച്ചതിന് മറ്റ് രണ്ടുപേര്ക്കെതിരേയുമാണു കേസ്. ശിശുക്ഷേമസമിതിയില് 103 ആയമാരാണുള്ളത്. എല്ലാവരും കരാര് ജീവനക്കാരാണ്. കുഞ്ഞിനെ ഉപദ്രവിച്ച കേസിലെ മൂന്ന് പ്രതികളും വര്ഷങ്ങളായി ഇവിടെ ജോലിചെയ്യുന്നവരാണ്.
വൈദ്യചികിത്സയ്ക്കു വിധേയയാക്കിയ കുഞ്ഞിന്റെ ആരോഗ്യനില തൃപ്തികരമാണെന്ന് അധികൃതര് വ്യക്തമാക്കി. ചോദ്യം ചെയ്യലില് പ്രതികള് കുറ്റം സമ്മതിച്ചെന്നു മ്യൂസിയം പോലീസ് അറിയിച്ചു. അമ്മയുടെ മരണത്തിനു പിന്നാലെ അച്ഛന് ജീവനൊടുക്കിയതോടെയാണ് അഞ്ചുവയസും രണ്ടരവയസുമുള്ള പെണ്കുഞ്ഞുങ്ങളെ ശിശുക്ഷേമസമിതിയില് എത്തിച്ചത്.
കുട്ടിയുടെ പരുക്ക് സാരമുള്ളതല്ലെന്നും ശിശുക്ഷേമസമിതിയെപ്പറ്റി പരിഭ്രാന്തി പരത്തരുതെന്നും ജനറല് സെക്രട്ടറി അരുണ് ഗോപി അഭ്യര്ഥിച്ചു. സ്ഥിരമായി കുഞ്ഞിനെ പരിചരിച്ചിരുന്ന ആയമാരാണ് അറസ്റ്റിലായത്. കുഞ്ഞിന്റെ പരുക്ക് ശ്രദ്ധയില്പ്പെട്ട മറ്റൊരു ആയ അറിയിച്ചതനുസരിച്ച് അധികൃതര് പോലീസില് പരാതിപ്പെടുകയായിരുന്നു.
