കണ്ണൂര്: ജനറല് നഴ്സിംഗ് ജോലിക്ക് പ്ളസ്ടൂവിന് സയന്സ് പഠിക്കാത്തവരെ പരിഗണിക്കേണ്ടതില്ലെന്ന പിഎസ് സി യുടെ നിലപാട് സംസ്ഥാനത്തെ ആയിരങ്ങള്ക്ക് തിരിച്ചടിയാകുന്നു. സംസ്ഥാനത്തിനകത്തും വിദ്യാഭ്യാസ വായ്പയെടുത്തും കടം വാങ്ങിയും അന്യസംസ്ഥാനത്തും പോയി കഷ്ടപ്പെട്ട് പഠിച്ചെത്തിയ അനേകം ഉദ്യോഗാര്ത്ഥികളെയാണ് തീരുമാനം പ്രതിസന്ധിയിലാക്കുന്നത്.
ഇത്തരം തസ്തികകളില് സയന്സിതര പ്ളസ്ടൂക്കാരെയും പരിഗണിക്കണമെന്ന നഴ്സിംഗ് അസോസിയേഷന്റെയും ആരോഗ്യവകുപ്പിന്റെയും നിര്ദേശങ്ങള് പിഎസ് സി ഇതുവരെ പരിഗണിച്ചിട്ടില്ലെന്നാണ് റിപ്പോര്ട്ടുകള്. ഇതോടെ സ്റ്റാഫ് നഴ്സ് ഗ്രേഡ് 2 തസ്തികയിലേക്ക് പിഎസ് സി ക്ഷണിച്ച വിജ്ഞാപനത്തില് അപേക്ഷിക്കാന് കഴിയാതെ അനേകം ഉദ്യോഗാര്ത്ഥികള്ക്ക് അവസരം നഷ്ടമാകും. തസ്തികയ്ക്ക് അപേക്ഷ സമര്പ്പിക്കേണ്ട കാലാവധി ഫെബ്രുവരി 2 നാണ് എന്നിരിക്കെ ഇക്കാര്യത്തില് സര്ക്കാര് ഉത്തരവ് വന്നിട്ടില്ല എന്ന കാരണത്തില് പിഎസ് സി കൈമലര്ത്തുകയാണ്.
കേരളത്തിലെ 19 സര്ക്കാര് നഴ്സിംഗ് സ്കൂളുകളില് നിന്നും 184 സ്വകാര്യ നഴ്സിംഗ് കോളേജുകളില് നിന്നുമായി ആയിരക്കണക്കിന് വിദ്യാര്ത്ഥികളാണ് ഓരോ വര്ഷവും പഠിച്ചിറങ്ങുന്നത്. ഇവരില് സയന്സ് വിഷയം പഠിച്ചവരും പഠിക്കാത്തവരുമുണ്ട്. നഴ്സിംഗ് പഠിക്കാന് സയന്സ് ഐശ്ചികവിഷയമായി പഠിച്ചിരിക്കണമെന്ന് നേരത്തേ കേരളാ നഴ്സിംഗ് കൗണ്സില് പറഞ്ഞിരുന്നെങ്കിലും 2012 ല് ഇതിന് ഭേദഗതി വരുത്തിയിരുന്നു. അതേസമയം ഇന്ത്യന് നഴ്സിംഗ് കൗണ്സില് നിയമപ്രകാരം ഏതു വിഷയത്തില് പ്ളസ് ടൂ പാസ്സാകുന്നതും നഴ്സിംഗ് പഠിക്കുന്നതിന് തടസ്സമാകുന്നില്ല.
ഇപ്പോള് കേരളാ നഴ്സിംഗ് കൗണ്സിലിന്റെ അംഗീകാരമുള്ള കോഴ്സുകള് തന്നെയാണ് സയന്സിതര പ്ളസ് ടൂക്കാരും പഠിക്കുന്നത്. പിഎസ് സി യുടെ നിബന്ധന വന് തിരിച്ചടിയായി മാറിയതോടെ വന്തുക കോഴ്സ് പഠിക്കുകയും മറ്റൊരു വലിയ തുക ഇതരകാര്യങ്ങള്ക്കുമായി മുടക്കേണ്ടി വരികയും ചെയ്ത ഉദ്യോഗാര്ത്ഥികള് ഇപ്പോള് കോടതിയെ സമീപിക്കാന് ഒരുങ്ങുകയാണ്.
