എരുമേലി : ഇതര സംസ്ഥാനക്കാരായ ധോലക്ക്, ചെണ്ട, മുത്തുമാല വില്പനക്കാരെ താമസിപ്പിച്ചിടത്ത് മലിനീകരണം രൂക്ഷമായതായി പരാതി. പരിശോധന നടത്തിയ പഞ്ചായത്ത് അധികൃതര് മുറികള് വാടകയ്ക്ക് നല്കിയ ഉടമയ്ക്ക് അയ്യായിരം രൂപ പിഴ ചുമത്തുകയും മാലിന്യങ്ങള് നീക്കണമെന്ന് നിര്ദേശിക്കുകയും ചെയ്തു. മലിനീകരണം തുടര്ന്നാല് കേസെടുക്കുമെന്ന് പഞ്ചായത്ത് സെക്രട്ടറി അറിയിച്ചു. എരുമേലിയില് പാര്ക്കിംഗ് സ്ഥലത്തെ മാലിന്യങ്ങള് നീക്കാത്തതിനെതിരെ സ്വകാര്യ പാര്ക്കിങ് ഗ്രൗണ്ടിന്റെ ഉടമയ്ക്ക് അയ്യായിരം രൂപ പിഴ ചുമത്തിയതായും സെക്രട്ടറി അറിയിച്ചു.
എരുമേലി, മുക്കൂട്ടുതറ, കണമല, കാളകെട്ടി എന്നീ സ്ഥലങ്ങളിലെ ഹോട്ടലുകളിലും പൊതുവിപണികളിലും നടത്തിയ പരിശോധനകളില് അമിത വില ഈടാക്കിയ രണ്ട് ഹോട്ടലുകളില് നിന്ന് പതിനായിരം രൂപ പിഴ ഈടാക്കി. കലക്ടര് രൂപീകരിച്ച സ്പെഷ്യല് സ്ക്വാഡ് ആണ് പരിശോധന നടത്തിയത്. വിലവിവരപട്ടിക പ്രദര്ശിപ്പിക്കാതിരിക്കുക, വിവിധ ലൈസന്സുകള് എടുക്കാതെയും പ്രദര്ശിപ്പിക്കാതെയുമിരിക്കുക, വൃത്തിഹീനമായ ഇടങ്ങളില് ഭക്ഷണപദാര്ത്ഥങ്ങള് തയ്യാറാക്കുകയും, വിളമ്പുകയും ചെയ്യുക, മുതലായ ക്രമക്കേടുകള് കണ്ടെത്തിയ സ്ഥാപനങ്ങള്ക്കെതിരെ നടപടികള് സ്വീകരിക്കുന്നതിന് കലക്ടര്ക്ക് റിപ്പോര്ട്ട് നല്കുമെന്ന് പരിശോധനാ സംഘം അറിയിച്ചു.
താലൂക്ക് സപ്ലൈ ഓഫീസര് ജി. അഭിജിത്തിന്റെ നേതൃത്വത്തില് നടത്തിയ പരിശോധനകളില് റവന്യൂ ഡപ്യൂട്ടി തഹസില്ദാര് വി. വി മാത്യൂസ്, ലീഗല് മെട്രോളജി ഇന്സ്പെക്ടര് അനു ഗോപിനാഥ്, ലീഗല് മെട്രോളജി അസിസ്റ്റന്റ് മനോജ്, റേഷനിംഗ് ഇന്സ്പെക്ടര് ടി. സയര്, സജീവ് കുമാര്, വര്ഗീസ് എന്നിവര് പങ്കെടുത്തു. വെജിറ്റേറിയന് ഭക്ഷണത്തിന് നിശ്ചയിച്ചിട്ടുള്ള വില മാത്രമേ ഈടാക്കാവൂ എന്നും എല്ലാ ഹോട്ടലുകളിലും വില വിവരം അയ്യപ്പ ഭക്തര്ക്ക് കാണാവുന്ന വിധം പ്രദര്ശിപ്പിക്കണം എന്നും താലൂക്ക് സപ്ലെ ഓഫീസര് അറിയിച്ചു.
എരുമേലി മുസ്ലിം പള്ളിയുടേയും, വലിയമ്പലത്തിന്റെയും സമീപത്ത് സ്ഥാപിച്ചിട്ടുള്ള പരാതിപെട്ടികളിലും, കാഞ്ഞിരപ്പള്ളി താലൂക്ക് സപ്ലൈ ഓഫീസിലെ 04828 202543 നമ്പര് ഫോണിലും അയ്യപ്പ ഭക്തര്ക്ക് പരാതികള് അറിയിക്കാം. പഞ്ചായത്തിന്റെ എം.സി.എഫില് നാളുകളായി ശേഖരിച്ചു വെച്ച പ്ലാസ്റ്റിക്, പാഴ് അജൈവ വസ്തുക്കള് ആറര ടണ് ലോഡ് കയറ്റി വിട്ടെന്ന് പഞ്ചായത്ത് പ്രസിഡന്റ് മറിയാമ്മ സണ്ണി അറിയിച്ചു. വേര്തിരിച്ചു സൂക്ഷിച്ചു വെച്ചിരുന്ന ഇവ ബെയ്ലിംഗ് യൂണിറ്റ് ഉപയോഗിച്ച് ചെറുതാക്കി ക്രമീകരിച്ച് ആണ് ലോഡാക്കിയത്. എംസിഎഫില് കഴിഞ്ഞയിടെ പുതിയ ബെയ്ലിംഗ് യൂണിറ്റ് സ്ഥാപിച്ചിരുന്നു.
അടുത്ത ലോഡ് ഉടനെ കയറ്റിവിടുമെന്ന് പഞ്ചായത്ത് അധികൃതര് പറഞ്ഞു. കണ്ണൂരില് പ്രവര്ത്തിക്കുന്ന ഇല എന്ന ഏജന്സിയുമായി ഇതിന് കരാര് വെച്ചിട്ടുണ്ട്. ലോഡ് കയറ്റി വിടുന്നതിലൂടെ പഞ്ചായത്തിന് വരുമാനം ലഭിക്കും. എം.സി.എഫില് ഇടമില്ലാതെ വന് തോതില് ലെഗസി ഉള്പ്പടെ മാലിന്യങ്ങള് നിറഞ്ഞത് ഏജന്സിക്ക് കൈമാറാനാണ് തീരുമാനം.
