ക്രിക്കറ്റില് നിന്ന് വിരമിച്ചെങ്കിലും ഇന്നും ക്രിക്കറ്റ് പ്രേമികളുടെ മനസ്സിലെ ആവേശമാണ് മുന് ഇന്ത്യന് ക്രിക്കറ്റ് താരം യുവരാജ് സിംഗ്. ഇന്ത്യന് ക്രിക്കിറ്റിന്റെ യുവരാജാവ് തന്നെയാണ് താരം. ഒരു പോരാളിയുടെ വീര്യത്തോടെ ബാറ്റ് കൊണ്ടും പന്തുകൊണ്ടും ഫീൾഡിംഗിലെ തന്റെ മിന്നും വേഗം എതിരാളികൾക്കെന്നും പേടിസ്വപ്നമായിരുന്നു യുവരാജ്. കളിക്കളത്തില് യുവരാജ് എന്നും ക്രിക്കറ്റ് ആരാധകരെ വിസ്മയിപ്പിച്ചിട്ടുണ്ട്. 2011 ലെ ഇന്ത്യയുടെ ലോകകപ്പ് വിജയത്തിൽ നിർണായ പങ്ക് വഹിച്ചത് യുവിയാണ്.
കളിക്കളത്തില് മാത്രമല്ല ക്യാന്സറെന്ന വില്ലന് പിടിമുറുക്കിയപ്പോഴും അതിനോട് പൊരുതി പൊരുതി കളിക്കളത്തിലേക്ക് തിരിച്ചെത്തി ജീവിതത്തിലും ക്രിക്കറ്റിലും യഥാർത്ഥ പോരാളിയായി യുവി മാറി. കായിക പാരമ്പര്യമുള്ള ഒരു പഞ്ചാബി കുടുംബത്തിലാണ് യുവി ജനിച്ചത്. ഏത് പ്രതിസന്ധി ഘട്ടത്തിലും ടീമിന് ആശ്രയിക്കാവുന്ന വിശ്വസ്ഥനായ കളിക്കാരനായിരുന്നു യുവി എന്ന് എല്ലാ സഹതാരങ്ങളും ഒറ്റസ്വരത്തില് പറഞ്ഞിട്ടുണ്ട്.
താരം തന്റെ ജീവിതസഖിയാക്കിയത് നടിയും മോഡലുമായ ഹേസൽ കീച്ചിനെയാണ്. പ്രണയത്തിലൂടെ ഒന്നായ ഇവര്ക്ക് ഒരാണ്കുട്ടിയും പെണ്കുട്ടിയുമാണുള്ളത്. കുഞ്ഞുങ്ങളുടെ വിശേഷവും ചിത്രങ്ങളുമെല്ലാം ഇവര് സോഷ്യല് മീഡിയയിലൂടെ പങ്കിടാറുണ്ട്.
ഇപ്പോഴിതാ യുവിയുടെ ജന്മദിനത്തില് ഹൃദയത്തില് ചാലിച്ച ആശംസകള് നേരുകയാണ് ഹേസൽ കീച്ച്. ഏറ്റവും നല്ല അച്ഛൻമാർ അവരുടെ പിഞ്ചുകുഞ്ഞിന് ഒരു കത്തിയാണ് നല്കുന്നത്...ഏറ്റവും നല്ല ഭർത്താവ്, അച്ഛൻ, സുഹൃത്ത്, മരുമകൻ, അളിയൻ, അമ്മാവൻ, ലോകത്തിലെ ഏറ്റവും മികച്ച ഹൈബർനേറ്റിംഗ് പാണ്ട എന്നിങ്ങനെയുള്ള യുവിക്ക് ജന്മദിനാശംസകൾ... നിങ്ങളുടെ സ്വപ്നങ്ങൾ സാക്ഷാത്കരിക്കുന്ന ഒരു വർഷം ആശംസിക്കുന്നു...’’ എന്നാണ് ഹേസല് മക്കള്ക്കും യുവിക്കുമൊപ്പമുള്ള ചിത്രത്തിനൊപ്പം കുറിച്ചത്.
