സിനിമയിലും സീരിയലിലും വര്ഷങ്ങളായി തിളങ്ങി നില്ക്കുന്ന താരമാണ് ബീന ആന്റണി. ഒരു കാലത്ത് മലയാള സിനിമയില് സജീവ സാന്നിധ്യമായിരുന്ന താരം അടുത്തിടെയായി സീരിയല് ലോകത്താണ് തിളങ്ങി നില്ക്കുന്നത്. ഇന്നും താരത്തിന്റെ അഭിനയമികവിനെ മറി കടക്കുന്ന സീരിയല് താരങ്ങളില്ലെന്നു തന്നെ പറയാം. വില്ലത്തിയായും നായികയായും അമ്മ-സഹോദരി വേഷങ്ങളിലുമടക്കം സീരിയല് ലോകത്ത് ഒന്നിനൊന്ന് മികച്ച കഥാപാത്രങ്ങള് നല്കി ബീന ആന്റണി നിറഞ്ഞു നില്ക്കുകയാണ്.
സിനിമ-സീരിയല് അഭിനേതാവായ മനോജ് നായരെ പ്രണയത്തിലൂടെയാണ് ബീന ആന്റണി ജീവിതപങ്കാളിയാക്കിയത്. ഇവര്ക്ക് ഒരു മകനുമുണ്ട്. ബീനയും മനോജും അവരവരുടെ യൂട്യൂബ് ചാനല് വഴിയും തങ്ങളുടെ അഭിപ്രായങ്ങളും നിലപാടുകളുമൊക്കെ മുഖം നോക്കാതെ പങ്കുവയ്ക്കാറുമുണ്ട്. സോഷ്യല് മീഡിയയില് സജീവ സാന്നിധ്യമാണ് താരദമ്പതിമാര്.
ഇപ്പോഴിതാ മഞ്ഞുമ്മൽ ദേവാലയത്തിന് തന്റെ ജീവിതത്തിലുള്ള പ്രാധാന്യം വീഡിയോയിലൂടെയും കുറിപ്പിലൂടെയും പങ്കിട്ടിരിക്കുകയാണ് താരം. മുടന്തിയായി പോകുമെന്ന് പറഞ്ഞയിടത്തു നിന്ന് ജീവന് വപ്പിച്ചത് ഈ ദേവാലയമാണെന്ന് ബീന കുറിക്കുന്നു.
‘‘ഈ നിമിഷം എന്റെ ജീവിതത്തിൽ വലരെ വിലപ്പെട്ടതാണ്... ജനിച്ച അന്നു മുതൽ എന്ന് പറഞ്ഞാൽ, എന്റെ മാമ്മോദീസ മുങ്ങിയത് മുതൽ...മുടന്തിയായി പോകും എന്ന് ഡോക്ടർമാര് സംശയം പറഞ്ഞ എന്റെ കാലുകൾക്കു ജീവൻ വച്ചതും, അങ്ങനെ ഏറ്റവും വേഗത്തില് അതായത് പത്താം മാസം നടന്നു തുടങ്ങിയ എന്റെ കാലുകൾക്ക് ആരോഗ്യം തന്നതും എല്ലാം എന്റെ മാതാവാണ്...എന്റെ അമ്മയുടെ നിലവിളിയും നേര്ച്ചയും കാഴ്ചയുമാണ് എന്റെ ഈ ജീവിതം....മരണം വരെ ഇത് ഞാൻ മുടക്കില്ല... എന്റെ മഞ്ഞുമ്മൽ ദേവാലയം...’’ എന്ന ക്യാപ്ഷനൊപ്പം മാതാവിന് മാല ഇടുന്ന വീഡിയോയും ബീന ആന്റണി പങ്കുവച്ചിട്ടുണ്ട്.
