ആലപ്പുഴ: കായംകുളം എംഎല്എ യു. പ്രതിഭയുടെ മകനെ കഞ്ചാവ് കേസില് പ്രതിയാക്കി എക്സൈസിന്റെ എഫ്ഐആര്. കഞ്ചാവ് കൈവശം വച്ചതിനും ഉപയോഗിച്ചതിനും രജിസ്റ്റര് ചെയ്ത കേസില് ഒമ്പതാം പ്രതിയാണ് പ്രതിഭയുടെ മകന് കനിവ്. ഇവരില്നിന്നും മൂന്ന് ഗ്രാം കഞ്ചാവും കഞ്ചാവ് കലര്ന്ന പുകയില മിശ്രിതവും പിടിച്ചെടുത്തിരുന്നു .
കനിവ് ഉള്പ്പെടെ ഒന്പത് പേരെയാണ് കേസില് പ്രതി ചേര്ത്തിരിക്കുന്നത്. ഒന്പത് പേരും ആലപ്പുഴ സ്വദേശികളാണ്. കുട്ടനാട് വിരിപ്പാല മുറിയില് വടക്കേപറമ്പ് വീട്ടില് സച്ചിന് എസ് (21) ആണ് കേസിലെ ഒന്നാം പ്രതി. വെട്ടിയിറത്ത് പറമ്പ് വീട്ടില് മിഥുനാ(24)ണ് രണ്ടാം പ്രതി. തോട്ടുകടവില് വീട്ടില് ജെറിന് ജോഷി (21) മൂന്നാം പ്രതിയും കേളംമാടം വീട്ടില് ജോസഫ് ബോബന് (22) നാലാം പ്രതിയുമാണ്. വടക്കേപറമ്പ് വീട്ടില് സഞ്ജിത്ത് (20), അഖിലം വീട്ടില് അഭിഷേക് (23), തൈച്ചിറയില് വീട്ടില് ബെന്സന്, കാളകെട്ടും ചിറ വീട്ടില് സോജന് (22) എന്നിവര് ക്രമേണ അഞ്ച്, ആറ്, ഏഴ്, എട്ട് പ്രതികളാണ്.ഇന്നലെ ഉച്ചയോടെയാണ് കനിവ് അടക്കമുള്ള ഒന്പതംഗ സംഘത്തെ എക്സൈസ് സര്ക്കിള് ഇന്സ്പെക്ടര് ജയരാജ് ആറിന്റെ നേതൃത്വത്തിലുള്ള സംഘം പിടികൂടിയത്.
അതേസമയം മകനെതിരെ ഉള്ളത് വ്യാജ വാര്ത്തയാണെന്ന വിശദീകരണവുമായി ഫേസ്ബുക്ക് ലൈവിലൂടെ പ്രതിഭ എംഎല്എ രംഗത്ത് എത്തിയിരുന്നു. മാധ്യമങ്ങള് കള്ളവാര്ത്ത നല്കിയെന്നും നിയമനടപടി സ്വീകരിക്കുമെന്നുമായിരുന്നു എംഎല്എ യുടെ വാദം. അനിടെയാണ് എഫ്ഐആര് വിവരങ്ങള് എക്സൈസ് പുറത്ത് വിട്ടത്. കഞ്ചാവുമായി മകനെ എക്സൈസ് പിടികൂടിയെന്ന വാര്ത്ത അടിസ്ഥാന രഹിതമാണെന്ന് യു പ്രതിഭ എംഎല്എ ഇന്നലെ പറഞ്ഞത്. മാധ്യമങ്ങളില് പ്രചരിക്കുന്ന വാര്ത്തകള് അടിസ്ഥാന രഹിതമാണെന്നും സംശയത്തിന്റെ അടിസ്ഥാനത്തിലാണ് മകനെ എക്സൈസ് പിടികൂടിയതെന്നും എംഎല്എ ഫേസ്ബുക്ക് വീഡിയോയിലൂടെവ്യക്തമാക്കിയിരുന്നു.
