ഇടുക്കി: മുള്ളരിങ്ങാട് കാട്ടാന ആക്രമണത്തില് മരിച്ച അമര് ഇലാഹിയുടെ ഖബറടക്കം ഇന്ന് നടക്കും. രാവിലെ 8.30 ന് മുള്ളരിങ്ങാട് ജുമാ മസ്ജിദിലാണ് ഖബറടക്കം. അമറിനോടുള്ള ആദരസൂചകമായും കാട്ടാനകളുടെ ആക്രമണങ്ങള് തടയുന്നതിലുള്ള വീഴ്ചകളിലും പ്രതിഷേധിച്ച് ഇന്ന് രാവിലെ 6 മുതല് വൈകിട്ട് 6 വരെ പൈങ്ങോട്ടൂര് ഗ്രാമ പഞ്ചായത്തില് ഹര്ത്താല് ആചരിക്കും.
എല്ഡിഎഫ്, യുഡിഎഫ്, എന്ഡിഎ മുന്നണികള് പ്രഖ്യാപിച്ച ഹര്ത്താല് തുടങ്ങി. പോസ്റ്റ്മോര്ട്ടം നടപടി പൂര്ത്തിയാക്കി അമറിന്റെ മൃതദേഹം പുലര്ച്ചെ ബന്ധുക്കള്ക്ക് കൈമാറിയിരുന്നു. ഇന്നലെ ഉച്ച തിരിഞ്ഞ് മൂന്ന് മണിയോടെയാണ് കാട്ടാനയുടെ ആക്രമണമുണ്ടായത്. 23 കാരനായ അമര് തേക്കിന്കൂപ്പില് പശുവിനെ അഴിക്കാന് പോയതായിരുന്നു. ഒപ്പമുണ്ടായിരുന്ന സുഹൃത്ത് ബ്ലാങ്കരയില് മന്സൂറിനും നേരേയും ഇഞ്ചക്കാട്ടില്നിന്ന് രണ്ട് കാട്ടാനകള് പാഞ്ഞടുത്തിരുന്നു. മന്സൂര് ഓടിരക്ഷപ്പെട്ടെങ്കിലും അമറിനെ ആന ചവിട്ടിക്കൊലപ്പെടുത്തി. ആന തട്ടിവീഴ്ത്തിയ മന്സൂറിന്റെ കാലിനു പരുക്കേറ്റു.
അമറിന്റെ വീടിന് 300 മീറ്റര് അകലെ ഇന്നലെ ഉച്ചകഴിഞ്ഞ് മൂന്നരയോടെയാണ് സംഭവം. ഓടിരക്ഷപ്പെടാന് ശ്രമിച്ചെങ്കിലും ആന തട്ടിവീഴ്ത്തി ചവിട്ടിയ അമര് തല്ക്ഷണം മരിച്ചു. മന്സൂറിനെയും ആന തട്ടിവീഴ്ത്തിയെങ്കിലും എഴുന്നേറ്റ് ഓടിരക്ഷപ്പെടാന് കഴിഞ്ഞു. മന്സൂറിനുനേരേ രണ്ടാമത്തെ ആനയാണു പാഞ്ഞെത്തിയത്. തൊടുപുഴയിലെ ജില്ലാ ആശുപത്രിയിലെത്തിച്ച അമറിന്റെ മൃതദേഹം ജില്ലാ കലക്ടറുടെ നിര്ദേശപ്രകാരം രാത്രിതന്നെ പോസ്റ്റ്മോര്ട്ടം നടത്തി ബന്ധുക്കള്ക്കു വിട്ടുനല്കി. മന്സൂര് ചികിത്സയിലാണ്.
വര്ഷങ്ങളായി മുള്ളരിങ്ങാട്ടും പരിസരങ്ങളിലും തുടര്ച്ചയായി കാട്ടാന ജനവാസമേഖലയിലിറങ്ങി കൃഷി നശിപ്പിക്കുന്നതു പതിവാണ്. കാട്ടാനശല്യം മൂലം രാപ്പകല് ഗതാഗത തടസവുമുണ്ട്. നാട്ടുകാര് നിരന്തരം ആവശ്യപ്പെട്ടിട്ടും മതിയായ വേലിക്കെട്ടുകള് സ്ഥാപിക്കാന് വനംവകുപ്പ് തയാറായില്ലെന്നു പരാതിയുണ്ട്. ഇതേത്തുടര്ന്ന് മുള്ളരിങ്ങാട് റേഞ്ച് ഓഫീസിലേക്കും കോതമംഗലം ഡി.എഫ്.ഒ. ഓഫീസിലേക്കും നാട്ടുകാര് നിരവധി തവണ പ്രതിഷേധപ്രകടനം നടത്തിയിരുന്നു.
അമറിന്റെ മാതാവ് ജമീല, സഹോദരി സഹാന ഷെരീഫ്. മൃതദേഹം സൂക്ഷിച്ചിരിക്കുന്ന തൊടുപുഴ കാരിക്കോട് ആശുപത്രിയില് ഡീന് കുര്യാക്കോസ് എം.പി, പി.ജെ. ജോസഫ് എം.എല്.എ. എന്നിവരെത്തി. വനംവകുപ്പിന്റെ അനാസ്ഥയ്ക്കെതിരേ മോര്ച്ചറിക്കു മുന്നില് എം.പിയുടെ നേതൃത്വത്തില് യു.ഡി.എഫ്. പ്രതിഷേധിച്ചു. വണ്ണപ്പുറം പഞ്ചായത്തില് ഇന്ന് യു.ഡി.എഫും എല്.ഡി.എഫും ഹര്ത്താല് ആഹ്വാനം ചെയ്തു.
