സോള്‍: ദക്ഷിണ കൊറിയയില്‍ വിമാനം അപകടത്തില്‍പ്പെടുന്നതിനു മിനിറ്റുകള്‍ക്കുമുന്‍പുതന്നെ അവസാന നിമിഷങ്ങള്‍ അടുത്തുവെന്നു യാത്രക്കാര്‍ക്കു വ്യക്തമായിരുന്നുവെന്ന് റിപ്പോര്‍ട്ടുകള്‍. യാത്രക്കാരെ സ്വീകരിക്കാനായി വിമാനത്താവളത്തില്‍ എത്തിച്ചേര്‍ന്ന പ്രിയപ്പെട്ടവര്‍ക്ക് അവസാന സന്ദേശം പലരും അയച്ചിരുന്നുവെന്നാണു വിവരം. വിമാനത്തില്‍ യാത്ര ചെയ്ത ഒരാള്‍, സ്വീകരിക്കാനെത്തിയ ആള്‍ക്ക് അയച്ച അവസാന സന്ദേശത്തില്‍ ''ഞാനെന്റെ അവസാന വാക്കുകള്‍ പറയട്ടെ?'' എന്നാണുള്ളത്.
ഒരു പക്ഷി ചിറകില്‍ ഇടിച്ചിട്ടുണ്ട്. ഞങ്ങള്‍ക്ക് ലാന്‍ഡ് ചെയ്യാനാകുന്നില്ലെന്ന് ഒരാള്‍ ദക്ഷിണ കൊറിയയിലെ ഇന്‍സ്റ്റന്റ് മെസഞ്ചര്‍ ഓണ്‍ലൈന്‍ പ്ലാറ്റ്‌ഫോമായ കകാവു ടോക്കില്‍ കുറിച്ചതായി ദ് കൊറിയ ടൈംസ് റിപ്പോര്‍ട്ട് ചെയ്തു. അതേസമയം, അപകടത്തില്‍നിന്നു രക്ഷപ്പെട്ട 2 പേരിലൊരാള്‍ വിമാന ജീവനക്കാരനായ 33കാരന്‍ ലീ മോ ആണെന്നു സ്ഥിരീകരിച്ചു. വിമാനത്തിന്റെ പിന്നിലായിരുന്നു അപകടസമയം ലീ ഉണ്ടായിരുന്നത്. വിമാനം റണ്‍വേയില്‍ മുട്ടുന്നതുമാത്രം ഓര്‍മയുണ്ടെന്നാണു ലീ പറഞ്ഞത്.
ആശുപത്രിയില്‍ എത്തിച്ചപ്പോഴും എന്താണു സംഭവിച്ചതെന്ന് ലീ ചോദിക്കുന്നുണ്ടായിരുന്നു. മുവാന്‍ വിമാനത്താവളത്തില്‍ ലാന്‍ഡിങ്ങിനിടെ വിമാനം തകര്‍ന്നു തീപിടിച്ച് 179 പേര്‍ കൊല്ലപ്പെട്ടു. 181 പേരുമായി പറന്ന വിമാനത്തിലെ രണ്ടുപേരെ രക്ഷിച്ചു. തായ്‌ലന്‍ഡില്‍നിന്നു മടങ്ങിയ ജെജു എയറിന്റെ വിമാനമാണ് സൗത്ത് ജിയോല്ല പ്രവിശ്യയില്‍വച്ച് അപകടത്തില്‍പ്പെട്ടത്. വിമാനത്തിലുണ്ടായിരുന്ന 181 പേരില്‍ 175 പേര്‍ യാത്രക്കാരും ആറു വിമാന ജീവനക്കാരുമാണ്. ബെല്ലി ലാന്‍ഡിങ്ങിനുള്ള ശ്രമം പരാജയപ്പെട്ടതിനെത്തുടര്‍ന്ന് വിമാനം മതിലിലിടിച്ചു തീപിടിക്കുകയായിരുന്നു.
ഇന്നലെ രാവിലെ ഒമ്പതു മണിയോടെയായിരുന്നു അപകടം. പക്ഷികളുമായി ഇടിച്ച് ലാന്‍ഡിങ് ഗിയറിന്റെ പ്രവര്‍ത്തനം തകരാറിലായതും പ്രതികൂല കാലാവസ്ഥയുമാണ് അപകടകാരണമെന്നു കരുതുന്നു. വിമാനം പൂര്‍ണമായും നശിച്ചെന്നും മരിച്ചവരെ തിരിച്ചറിയുക ബുദ്ധിമുട്ടാണെന്നും അധികൃതര്‍ അറിയിച്ചു. അപകടത്തിന് രണ്ട് മിനിറ്റ് മുമ്പ്, പൈലറ്റ് അധികൃതര്‍ക്ക് അപകടസന്ദേശം നല്‍കിയിരുന്നു.റണ്‍വേ ചെറുതായതാണ് അപകടകാരണമെന്ന സംശയം അധികൃതര്‍ തള്ളി. റണ്‍വേയുടെ നീളം 2,800 മീറ്ററാണെന്നും സമാന വലുപ്പത്തിലുള്ള വിമാനങ്ങള്‍ പ്രശ്‌നങ്ങളില്ലാതെ ഇറങ്ങിയിട്ടുണ്ടെന്നും അവര്‍ വ്യക്തമാക്കി.
വിമാനാപകടത്തില്‍ മാപ്പ് ചോദിക്കുന്നതായി ജെജു എയര്‍ പറഞ്ഞു. സംഭവത്തിന്റെ അപകടത്തിന്റെ പൂര്‍ണ ഉത്തരവാദിത്വം ഏറ്റെടുക്കുന്നുവെന്നും കമ്പനി സി.ഇ.ഒ: കിം ഇൗ ബേ അറിയിച്ചു. ദക്ഷിണ കൊറിയയിലെ ഏറ്റവും ചെലവ് കുറഞ്ഞ വിമാനക്കമ്പനികളിലൊന്നായ ജെജു എയറിന്റെ ചരിത്രത്തിലെ ആദ്യമായാണ് ഇത്ര വലിയ അപകടമുണ്ടാകുന്നത്. കസാക്കിസ്ഥാനില്‍ ബുധനാഴ്ച അസര്‍ബൈജാന്‍ എയര്‍ലൈന്‍സിന്റെ യാത്രാവിമാനം തകര്‍ന്ന് 38 പേര്‍ മരിച്ചതിനു പിന്നാലെയാണ് ഇപ്പോഴത്തെ അപകടം.
ദക്ഷിണ കൊറിയയുടെ വ്യോമയാന ചരിത്രത്തില്‍ ഏറ്റവുമധികംപേര്‍ കൊല്ലപ്പെട്ട വിമാനപകടങ്ങളിലൊന്നാണിത്. 1997ല്‍ ഗുവാമിലുണ്ടായ വിമാനാപകടത്തില്‍ 228 പേര്‍ കൊല്ലപ്പെട്ടിരുന്നു. വിമാനം പൂര്‍ണമായി തകര്‍ന്നെന്ന് മുവാന്‍ അഗ്‌നിരക്ഷാ വിഭാഗം അറിയിച്ചു. വിമാനത്തിന്റെ വാല്‍ ഭാഗം മാത്രമാണ് അവശിഷ്ടങ്ങള്‍ക്കിടയില്‍ തിരിച്ചറിയാന്‍ പാകത്തില്‍ കിടക്കുന്നത്.
പക്ഷിയിടിച്ചാണോ അപകടം എന്നത് ഉള്‍പ്പെടെയുള്ള കാര്യങ്ങള്‍ അനേ്വഷിക്കുന്നുണ്ടെന്ന് അധികൃതര്‍ വ്യക്തമാക്കി. വിമാനം ലാന്‍ഡ് ചെയ്യുന്നതിനു മുന്നോടിയായി എയര്‍ ട്രാഫിക് കണ്‍ട്രോളില്‍നിന്ന് പക്ഷികള്‍ പറക്കുന്നതായി മുന്നറിയിപ്പ് നല്‍കിയിരുന്നുവെന്നു ഗതാഗത മന്ത്രാലയം പറഞ്ഞു. വിമാനത്തിന്റെ ബ്ലാക് ബോക്‌സ് കണ്ടെടുത്തു. ഇതു പരിശോധിച്ചശേഷം അപകടകാരണം വ്യക്തമാകുമെന്നും മന്ത്രാലയത്തിലെ ഉദ്യോഗസ്ഥര്‍ അറിയിച്ചു.
Comments