ന്യൂഡല്ഹി: മുംബൈ-നാഗ്പൂര് സമൃദ്ധി ഹൈവേയില് റോഡില് 50 ലധികം വാഹനങ്ങളുടെ ടയര് പഞ്ചറായി വഴിയില് കിടന്നത് പരിഭ്രാന്തി പരത്തി. വഴിയില് വീണ ഇരുമ്പ് ബോര്ഡിന് മുകളിലൂടെ കയറിയിറങ്ങിയ വാഹനങ്ങളാണ് വഴിയില് കുടുങ്ങിയത്. ഡിസംബര് 29 ന് രാത്രി 10 മണിയോടെ വാഷിം ജില്ലയിലെ മലേഗാവിനും വനോജ ടോള് പ്ലാസയ്ക്കും ഇടയിലാണ് സംഭവം.
വാഹനങ്ങള് വഴിയില് കിടന്നതോടെ വലിയ ഗതാഗതക്കുരുക്കും ഉണ്ടായി. നാല് ചക്ര വാഹനങ്ങളെയും ചരക്ക് ട്രക്കുകളെയും പ്രശ്നം ബാധിച്ചു. ഏറെ നേരം കഴിഞ്ഞിട്ടും യാതൊരു സഹായവും ലഭിക്കാത്തതിനാല് യാത്രക്കാര് ഒറ്റരാത്രി് ദേശീയപാതയില് കുടുങ്ങി. അബദ്ധത്തില് ബോര്ഡ് വീണതാണോ അതോ മനപ്പൂര്വം എറിഞ്ഞതാണോയെന്ന് പരിശോധിച്ചുവരികയാണ്.
അതിവേഗ ഇടനാഴിയിലെ സുരക്ഷ ചോദ്യം ചെയ്യപ്പെടുന്ന സമയത്താണ് ഈ സംഭവവും റിപ്പോര്ട്ട് ചെയ്തിരിക്കുന്നത്. ജൂണില് ജല്ന ജില്ലയിലെ സമൃദ്ധി ഹൈവേയില് കഡ്വാഞ്ചി ഗ്രാമത്തിന് സമീപം സമൃദ്ധി മഹാമാര്ഗില് രണ്ട് കാറുകള് കൂട്ടിയിടിച്ച് ആറ് പേര് മരിക്കുകയും നാല് പേര്ക്ക് പരിക്കേല്ക്കുകയും ചെയ്തിരുന്നു.
സമൃദ്ധി മഹാമാര്ഗ് മഹാരാഷ്ട്രയിലെ ഭാഗികമായി പ്രവര്ത്തനക്ഷമമായ ആറുവരിപ്പാതയും 701 കിലോമീറ്റര് നീളമുള്ള ആക്സസ് നിയന്ത്രിത അതിവേഗ പാതയുമാണ്. മുംബൈയെയും സംസ്ഥാനത്തെ മൂന്നാമത്തെ വലിയ നഗരമായ നാഗ്പൂരിനെയും ബന്ധിപ്പിക്കുന്ന രാജ്യത്തെ ഏറ്റവും ദൈര്ഘ്യമേറിയ ഗ്രീന്ഫീല്ഡ് റോഡ് പദ്ധതികളില് ഒന്നാണിത്. 55,000 കോടി രൂപ ചെലവിലാണ് ഇത് നിര്മ്മിച്ചത്.
