കൊച്ചി: നടി ഹണി റോസ് നല്കിയ സൈബര് അധിക്ഷേപ കേസ് അന്വേഷിക്കാന് പ്രത്യേക സംഘം. സെന്ട്രല് സിഐയുടെ നേതൃത്വത്തില് അന്വേഷണവും സെന്ട്രല് എസിപിക്ക് കേസിന്റെ മേല്നോട്ട ചുമതലയും നല്കി. ആവശ്യമെങ്കില് സംഘത്തെ വിപുലപ്പെടുത്തും. സെന്ട്രല് എസിപി ജയകുമാറിന്റെ നേതൃത്വത്തില് സൈബര് സെല് അംഗങ്ങള് ഉള്പ്പെടുന്ന ടീമാണ് കേസ് അന്വേഷിക്കുക. അശ്ലീല കമന്റിട്ട 20 പേരെ തിരിച്ചറിഞ്ഞിട്ടുണ്ട്. ഇവര്ക്കെതിരേ നടപടി തുടരാനുള്ള നീക്കത്തിലാണ് പോലീസ്.
കേസില് ഫെയ്സ്ബുക്കില് നിന്ന് കൊച്ചി പൊലീസ് വിവരങ്ങള് തേടി. മൊഴി നല്കിയ ഹണി റോസ് ഇന്സ്റ്റാഗ്രാമിലടക്കം തനിക്കെതിരെ വന്ന അധിക്ഷേപ കമന്റുകളുടെ സ്ക്രീന്ഷോട്ട് സഹിതം കൈമാറി. ബോബി ചെമ്മണ്ണൂരിനെ നോട്ടീസ് നല്കി വിളിപ്പിക്കുന്നതും പരിശോധിച്ചു വരികയാണ്. നടിക്ക് പിന്തുണയുമായി വിമന് ഇന് സിനിമ കളക്ടീവും രംഗത്ത് വന്നിട്ടുണ്ട്. ഹണി റോസിന്റെ ഫേസ്ബുക്ക് പോസ്റ്റ് പങ്കുവെച്ച് അവള്ക്കൊപ്പമെന്ന് കുറിച്ചാണ് ഡബ്ല്യുസിസി പിന്തുണ അറിയിച്ചിരിക്കുന്നത്.
'ബോബി ചെമ്മണ്ണൂര്, താങ്കള് എനിക്കെതിരെ തുടര്ച്ചയായി നടത്തിയ അശ്ലീല അധിക്ഷേപങ്ങള്ക്കെതിരെ ഞാന് എറണാകുളം സെന്ട്രല് പൊലീസ് സ്റ്റേഷനില് പരാതി കൊടുത്തിട്ടുണ്ട്. താങ്കളുടെ തന്നെ മാനസികനിലയുള്ള താങ്കളുടെ കൂട്ടാളികള്ക്കെതിരെയുള്ള പരാതികള് പുറകെ ഉണ്ടാവും. താങ്കള് താങ്കളുടെ പണത്തിന്റെ ഹുങ്കില് വിശ്വസിക്കൂ, ഞാന് ഭാരതത്തിലെ നിയമവ്യവസ്ഥയുടെ ശക്തിയില് വിശ്വസിക്കുന്നു' എന്നാണ് ഹണി റോസ് ഇന്സ്റ്റഗ്രാമില് ഇട്ട പോസ്റ്റില് പറയുന്നത്.
