കൊച്ചി: നടി ഹണി റോസിനെതിരേ സൈബര് അധിക്ഷേപം നടത്തിയ കേസില് ജയിലില് കഴിയുന്ന വ്യവസായി ബോബി ചെമ്മണ്ണൂരിന്റെ ജാമ്യാപേക്ഷ ഹൈക്കോടതി ഇന്ന് പരിഗണിക്കും. ഹണി റോസിന്റെ പരാതിയില് എറണാകുളം സെന്ട്രല് പൊലീസ് രജിസ്റ്റര് ചെയ്ത കേസില് റിമാന്ഡിലാണ് ബോബി ചെമ്മണ്ണൂര്. ജാമ്യം നേടാനായാല് ബോബി ചെമ്മണ്ണൂരിന് ഇന്ന് തന്നെ പുറത്തിറങ്ങാനാവും.
ഭാരതീയ ന്യായ സംഹിതയിലെ വിവിധ വകുപ്പുകള് അനുസരിച്ച് ജാമ്യം ലഭിക്കാത്ത കുറ്റങ്ങളാണ് ബോബി ചെമ്മണ്ണൂരിനെതിരെ ചുമത്തിയത്. കേസില് ജാമ്യം നല്കരുതെന്ന നിലപാടായിരിക്കും പോലീസ് എടുക്കുക. ജാമ്യം നല്കിയാല് പരാതിക്കാരിയെ ഭീഷണിപ്പെടുത്താനും സാക്ഷികളെ സ്വാധീനിക്കാനും സാധ്യതയുണ്ടെന്നും തെളിവ് നശിപ്പിക്കുമെന്നാണ് പൊലീസിന്റെ വാദം.
പരാതിക്കാരിയെ പിന്നാലെ നടന്ന അവഹേളിക്കുന്ന പ്രസ്താവന നടത്തിയതായും ചൂണ്ടിക്കാട്ടും. ജസ്റ്റിസ് പി വി കുഞ്ഞികൃഷ്ണന് അധ്യക്ഷനായ സിംഗിള് ബെഞ്ചാണ് ജാമ്യാപേക്ഷ പരിഗണിക്കുന്നത്. ബോബി ചെമ്മണ്ണൂരിന് ഒരു പ്രത്യേക പരിഗണനയും നല്കാനാവില്ല എന്നാണ് ഹൈക്കോടതി നേരത്തെ വ്യക്തമാക്കിയത്. നിലവില് കാക്കനാട് ജില്ലാ ജയിലിലാണ് ബോബി ചെമ്മണ്ണൂര് ഉളളത്.
