മാനന്തവാടി: വയനാട്ടില് വനത്തിനോടു ചേര്ന്ന കാപ്പിത്തോട്ടത്തില് കാപ്പിക്കുരു പറിക്കാന് പോയ ആദിവാസിസ്ത്രീയെ കടുവ കൊന്നു ശരീരഭാഗങ്ങള് തിന്നു. താറാട്ട് കോളനിയിലെ ഫോറസ്റ്റ് വാച്ചര് മീന്മുട്ടി അപ്പച്ചന്റെ ഭാര്യ രാധ(42) യാണ് കൊല്ലപ്പെട്ടത്. ഇന്ത്യന് ക്രിക്കറ്റ് താരം മിന്നുമണിയുടെ അമ്മാവന്റെ ഭാര്യയാണ്.
ഇന്നലെ രാവിലെ പത്തു മണിയോടെ മാനന്തവാടി പഞ്ചാരക്കൊല്ലിയിലാണ് സംഭവം. മാവോയിസ്റ്റ് സാന്നിധ്യമുള്ള പ്രദേശത്തു പട്രോളങ്ങിന്റെ ഭാഗമായി തണ്ടര്ബോള്ട്ട് സംഘം ട്രക്കിങ് നടത്തുന്നതിനിടെ പിലാക്കാവ് - മണിയന്കുന്ന് വനവുമായി അതിരിടുന്ന പ്രദേശത്ത് ചോരപ്പാടുകള് കണ്ടിരുന്നു. തുടര്ന്നു നടത്തിയ പരിശോധനയില് 150 മീറ്റര് മാറി വനപ്രദേശത്തു യുവതിയുടെ മൃതദേഹം കണ്ടൈത്തുകയായിരുന്നു.
സ്ത്രീയുടെ തലയുടെ പിന്ഭാഗം കടിച്ചെടുത്ത നിലയിലായിരുന്നു. പരിസരത്തു കടുവയുടെ കാല്പ്പാടുകളും കണ്ടതോടെ വനം വകുപ്പിനെയും പോലീസിനെയും വിവരമറിയിച്ചു. രാധയെ ഭര്ത്താവ് രാവിലെ ഒന്പത് മണിയോടെ തൊട്ടടുത്ത പ്രദേശത്ത് ബൈക്കില് ഇറക്കിയതായിരുന്നു. ഇടവഴിയിലൂടെ കടന്നാല് സ്വകാര്യ വ്യക്തിയുടെ കാപ്പിത്തോട്ടത്തിലെത്താം.
ഇവിടെവെച്ചു കടുവ കൊന്ന് വനത്തിലേക്കു വലിച്ചിഴച്ചു കൊണ്ടുപോയെന്നാണു നിഗമനം. തണ്ടര്ബോള്ട്ട് വിവരമറിയിച്ചതിന്റെ അടിസ്ഥാനത്തില് വനം വകുപ്പും പോലീസും സ്ഥലത്തെത്തി മൃതദേഹം തൊട്ടടുത്ത പ്രിയദര്ശിനി തേയിലത്തോട്ടം ഓഫീസ് പരിസരത്തേക്കു മാറ്റി.
ജില്ലയില് അടിക്കടിയുണ്ടാവുന്ന വന്യജീവി ആക്രമണത്തിന്റെ പശ്ചാത്തലത്തില് നാട്ടുകാര് ശക്തമായ പ്രതിഷേധവുമായി രംഗത്തെത്തി. സ്ഥലം എം.എല്.എയും മന്ത്രിയുമായ ഒ.ആര്. കേളു നാട്ടുകാരുമായി നടത്തിയ ചര്ച്ചകള്ക്കൊടുവില് രണ്ട് മണിക്കൂറോളം കഴിഞ്ഞാണ് മൃതദേഹം മെഡിക്കല് കോളജ് ആശുപത്രിയിലേക്ക് മാറ്റിയത്. പോസ്റ്റ്മോര്ട്ടം നടപടികള്ക്ക് ശേഷം മൃതദേഹം ബന്ധുക്കള്ക്ക് വിട്ടുനല്കി. മക്കള്: അനില്, അനീഷ്.
