വാഷിംഗ്ടണ്: ഡൊണാള്ഡ് ട്രംപ് പ്രസിഡന്റ് സ്ഥാനത്തേക്ക് രണ്ടാമൂഴത്തില് പ്രവേശിച്ചതിന് തൊട്ടുപിന്നാലെ പ്രധാനമന്ത്രി നരേന്ദ്രമോദി അമേരിക്കന് സന്ദര്ശനത്തിന് ഒരുങ്ങുന്നതായി റിപ്പോര്ട്ട്. മിക്കവാറും അടുത്ത മാസം തന്നെ ഇന്ത്യന് പ്രധാനമന്ത്രി വൈറ്റ് ഹൗസ് സന്ദര്ശിച്ചേക്കുമെന്ന് അമേരിക്കന് പ്രസിഡന്റ് ഡൊണാള്ഡ് ട്രംപാണ് വ്യക്തമാക്കിയിരിക്കുന്നത്.
തിങ്കളാഴച അദ്ദേഹം മാധ്യമങ്ങളോടാണ് പറഞ്ഞത്. ഇന്ത്യയുമായി ഞങ്ങള്ക്ക് നല്ല ബന്ധമാണ് ഉള്ളതെന്നും അദ്ദേഹവുമായി ദീര്ഘനേരം സംസാരിച്ചെന്നും മിക്കവാറും ഫെബ്രുവരിയില് വൈറ്റ് ഹൗസില് വരാന് പോകുകയാണെന്നും എയര്ഫോഴ്സ് വണ്ണില് വച്ച് യുഎസ് പ്രസിഡന്റ് ട്രംപ് മാധ്യമപ്രവര്ത്തകരോട് പറഞ്ഞു. രാവിലെ പ്രധാനമന്ത്രി മോദിയുമായി നടത്തിയ ഫോണ് കോളിലെ ചോദ്യത്തിന് മറുപടി പറയുകയായിരുന്നു അദ്ദേഹം.
അമേരിക്കന് പ്രസിഡന്റായുള്ള ആദ്യടേമില് ട്രംപിന്റെ അവസാന വിദേശയാത്ര ഇന്ത്യയിലേക്കായിരുന്നു. യുഎസ് പ്രസിഡന്റ് ട്രംപും പ്രധാനമന്ത്രി മോദിയും നല്ല സൗഹൃദബന്ധം പുലര്ത്തുന്നവരാണ്. 2019 സെപ്റ്റംബറില് ഹൂസ്റ്റണിലും 2020 ഫെബ്രുവരിയില് അഹമ്മദാബാദിലും നടന്ന രണ്ട് വ്യത്യസ്ത റാലികളില് ആയിരക്കണക്കിന് ആളുകളെ ഇരുവരും അഭിസംബോധന ചെയ്തു. 2024 നവംബറിലെ അതിശയകരമായ തിരഞ്ഞെടുപ്പ് വിജയത്തിന് ശേഷം യുഎസ് പ്രസിഡന്റ് ട്രംപുമായി സംസാരിച്ച മൂന്ന് മികച്ച ലോക നേതാക്കളില് പ്രധാനമന്ത്രി മോദിയും ഉള്പ്പെടുന്നു.
