മുണ്ടക്കയം: പൊതുവേദിയില് പരസ്യമായി കൊമ്പുകോര്ത്ത് പൂഞ്ഞാര് എംഎല്എയും മുന് എംഎല്യും തമ്മില് വാക്പോര്. ചാനലുകളിലും സാമൂഹ്യമാധ്യമങ്ങളിലും സംഭവത്തിന്റെ വീഡിയോ വൈറലായി മാറിയിരിക്കുകയാണ്. പൂഞ്ഞാര് തെക്കേക്കരയില് ഒരു സ്വകാര്യ ആശുപത്രിയുടെ ഉദ്ഘാടന ചടങ്ങില് കേന്ദ്രസഹമന്ത്രി ജോര്ജ്ജ്കുര്യന്റെ സാന്നിദ്ധ്യത്തിലായിരുന്നു പരസ്യമായി ഇരുവരും പോരടിച്ചത്. കഴിഞ്ഞ തെരഞ്ഞെടുപ്പില് പി.സി. ജോര്ജ്ജ് പൂഞ്ഞാറില് സെബാസ്റ്റ്യന് കുളത്തുങ്കലിനോടായിരുന്നു പരാജയപ്പെട്ടത്.
പ്രസംഗത്തിനിടയില് മുണ്ടക്കയം ആശുപത്രിയില് ഡോക്ടറെ നിയോഗിക്കണമെന്ന പി.സി. ജോര്ജ്ജിന്റെ പരാമര്ശത്തിന് തൊട്ടുപിന്നാലെ പൂഞ്ഞാര് എംഎല്എ സെബാസ്റ്റിയന് കുളത്തുങ്കല് ഇതിനെ എതിര്ത്ത് രംഗത്തു വരികയായിരുന്നു. ആശുപത്രിയില് ഡോക്ടറെ അനുവദിക്കണമെന്ന് ആവശ്യപ്പെട്ടുള്ള നിവേദനം കൊടുത്ത വാര്ത്ത മാധ്യമങ്ങളില് കണ്ടപ്പോള് വിഷമം തോന്നിയെന്നായിരുന്നു പി.സി. ജോര്ജ്ജ് പറഞ്ഞത്. എന്നാല് ആവശ്യമുള്ള കാര്യം പറഞ്ഞാല് മതിയെന്നും മറ്റുള്ള കാര്യങ്ങള് പറയാനുള്ള വേദിയല്ല ഇതെന്നും എംഎല്എ പറഞ്ഞപ്പോള് തനിക്കിഷ്ടമുള്ളത് പറയുമെന്ന് പി.സി. ജോര്ജ്ജ് മറുപടി പറഞ്ഞു. എന്നാല് ഇത് അതിനുള്ള വേദിയല്ലെന്ന് എംഎല്എ തിരിച്ചടിച്ചു.
സംഘാടകര് ഇരുവരേയും സാന്ത്വനിപ്പിക്കാന് ശ്രമിച്ചെങ്കിലൂം എംഎല്എ യോ പി.സി. ജോര്ജ്ജോ അത് കേട്ടില്ല. പൂഞ്ഞാറിലെ ആശുപത്രിയിലും ഉച്ചകഴിഞ്ഞ് ഒ.പി.യില്ലെന്നും അതിനും നടപടിവേണമെന്നും തന്നെ കണ്ടുകിട്ടിയിട്ട് വേണ്ടെ ഇതൊക്കെ ഒന്നു പറയാനെന്നുമായിരുന്നു പി.സി. ജോര്ജ്ജിന്റെ പരിഹാസം. വിമര്ശിക്കാന് വേറെയൊരു വികസന വേദിയുണ്ടാക്കമെന്ന് സെബാസ്റ്റ്യന് കുളത്തുങ്കല് പറഞ്ഞു. ആശുപത്രിയുടെ ഉദ്ഘാടനമാണെന്നും അത് പറഞ്ഞിട്ട് പോകാനും എംഎല്എ പിസി ജോര്ജിനോട് പറഞ്ഞു. പൂഞ്ഞാര് സര്ക്കാര് ആശുപത്രിയില് ഡോക്ടറെ വേണമെന്ന് എംഎല്എയോടല്ലാതെ വേറെയാരോടാണ് പറയേണ്ടതെന്ന് പിസി ജോര്ജ് തിരിച്ചടിക്കുകയും ചെയ്തു.
