പാലാ: ഗാന്ധിജിയുടെ ചിത്രം ബിയര് കുപ്പികളില് അച്ചടിച്ചത് എബി ജെ. ജോസിന്റെ ഒറ്റയാള് പോരാട്ടത്തിലൂടെ പിന്വലിച്ചത് മൂന്ന് രാജ്യങ്ങളില്. പാലായിലെ മഹാത്മാഗാന്ധി നാഷണല് ഫൗണ്ടേഷന് ചെയര്മാന് എബി ജെ. ജോസ് നടത്തിയ ഒറ്റയാള് പോരാട്ടത്തിന്റെ ഫലമായിട്ടാണ് ഈ നടപടികള്.
ഇന്ത്യയുടെ സൗഹ്യദ രാഷ്ട്രങ്ങളായ റഷ്യ, ഇസ്രായേല്, ചെക്ക് റിപ്പബ്ളിക്ക് എന്നീ രാജ്യങ്ങളിലായിരുന്നു ഗാന്ധിജിയുടെ ചിത്രം ബിയര് കുപ്പികളില് പ്രദര്ശിപ്പിച്ചിരുന്നത്. റഷ്യന് ബിയര് നിര്മാതാക്കളായ റിവോര്ട്ട് ബ്രൂവറിയാണ് ഏറ്റവും ഒടുവില് ബിയര് ക്യാനില് നിന്നും ഗാന്ധിജിയുടെ ചിത്രം പിന്വലിച്ചുള്ള അറിയിപ്പ് നല്കിയത്. ഗാന്ധിജിയുടെ ഒപ്പും ബിയര് ക്യാനില് നിന്നും ഇവര് ഒഴിവാക്കിയിട്ടുണ്ട്.
സംഭവം ശ്രദ്ധയില്പ്പെട്ട ഉടന്തന്നെ റഷ്യന് പ്രസിഡന്റ് വ്ലാദിമിര് പുടിന്, ഇന്ത്യയിലെ റഷ്യന് അംബാസിഡര് ഡെനിസ് അലിപ്പോവ് എന്നിവര്ക്കു പരാതികള് അയയ്ക്കുകയായിരുന്നു. നടപടികള്ക്കു കാലതാമസം നേരിട്ടതോടെ 5001 പ്രതിഷേധക്കാര്ഡുകള് റഷ്യന് എംബസിയിലേക്ക് അയച്ചു.
ഇതിനു പിന്നാലെ ഗാന്ധിജിയുടെ ചിത്രം ബിയര് ക്യാനില് നിന്നൊഴിവാക്കിയെന്നും സംഭവത്തില് ക്ഷമാപണം നടത്തിയുമുള്ള റിവോര്ട്ട് ബ്രൂവറി കമ്പനിയുടെ വികസന ഡയറക്ടര് ഗുഷിന് റോമന്റെ ഇ മെയില് സന്ദേശം എബി ജെ. ജോസിനു ലഭിച്ചു. 2019ല് ടികേ്ടാക്ക് വീഡിയോയിലൂടെയാണ് ഇസ്രായേലില് ഗാന്ധിയുടെ ചിത്രം മദ്യക്കുപ്പിയില് പതിപ്പിച്ചിട്ടുണ്ടെന്ന വിവരം എബി അറിയുന്നത്. മാല്ക്ക എന്ന കമ്പനിയുടേതായിരുന്നു മദ്യം. ഇസ്രായേലിന്റെ 70-ാമത് സ്വാതന്ത്ര്യദിനത്തോടനുബന്ധിച്ച് ലിമിറ്റഡ് എഡീഷനായി പുറത്തിറക്കിയ മദ്യക്കുപ്പികളിലാണ് ഗാന്ധിജിയുടെ ചിത്രം ചേര്ത്തിരുന്നത്.
കോട്ടും ബനിയനും കൂളിങ് ഗ്ളാസും ധരിപ്പിച്ചു ഗാന്ധിജിയെ കോമാളിയാക്കിയ നിലയിലുള്ള ചിത്രമായിരുന്നു മദ്യക്കുപ്പികളില് അച്ചടിച്ചിരുന്നത്. തുടര്ന്നു മദ്യത്തിനെതിരേ ജീവിതത്തിലൂടനീളം നിലപാട് സ്വീകരിച്ചിരുന്ന ഇന്ത്യന് രാഷ്ട്രപിതാവായ ഗാന്ധിജിയുടെ ചിത്രം മദ്യക്കുപ്പികളില് ചേര്ത്തത് അനാദരവാണെന്നു ചൂണ്ടിക്കാട്ടി ഇസ്രായേല് പ്രധാനമന്ത്രി ബെഞ്ചമിന് നെതന്യാഹു, പ്രധാനമന്ത്രി നരേന്ദ്രമോദി തുടങ്ങിയവര്ക്ക് എബി പരാതി അയച്ചു. വിഷയം ശ്രദ്ധയില്പ്പെട്ട ആം ആദ്മി പാര്ട്ടി എം.പി. ഇക്കാര്യം രാജ്യസഭയില് ഉന്നയിച്ചു.
സംഭവത്തില് രാജ്യസഭ ഒന്നടങ്കം പ്രതിഷേധിച്ചു. രാജ്യസഭാ അധ്യക്ഷന് കൂടിയായ ഉപരാഷ്ട്രപതി എം. വെങ്കയ്യ നായിഡു അടിയന്തര നടപടി സ്വീകരിക്കാന് വിദേശകാര്യമന്ത്രി ഡോ. എസ്. ജയശങ്കറിന് നിര്ദ്ദേശം നല്കി. ഇതേത്തുടര്ന്ന് ഇന്ത്യ നടത്തിയ നയതന്ത്ര ഇടപെടലിലൂടെ ഇസ്രായേല് മദ്യകമ്പനി ഖേദം പ്രകടിപ്പിച്ചു ചിത്രം പിന്വലിക്കുകയായിരുന്നു. ഈ സംഭവം പുറത്തുവന്നതോടെ ചെക്ക് റിപ്പബ്ലിക്കില് വിനോദസഞ്ചാരത്തിനു പോയ മലയാളികള് അവിടെയും മദ്യക്കുപ്പികളില് ഗാന്ധിജിയുടെ ചിത്രവും പേരും ഉപയോഗിക്കുന്നത് കണ്ടു.
ഇക്കാര്യം അവര് എബി ജെ. ജോസിനെ അറിയിച്ചു. തുടര്ന്ന് ചെക്ക് റിപ്പബ്ലിക്കില് നിന്നും ഇതുമായി ബന്ധപ്പെട്ട വിവരങ്ങള് ശേഖരിച്ച് ചെക്ക് റിപ്പബ്ലിക് പ്രധാനമന്ത്രി ആന്ഡ്രജ് ബാബെയ്സ് ഉള്പ്പെടെയുള്ളവര്ക്ക് ഗാന്ധിജിയുടെ ചിത്രം മദ്യക്കുപ്പികളില് അച്ചടിച്ച് പിവോവര് ക്രിക് എന്ന കമ്പനി അനാദരിച്ചതായി കാണിച്ച് പരാതി നല്കി. പിന്നീട് എബി ജെ. ജോസ് ഡല്ഹിയിലെ ചെക്ക് റിപ്പബ്ലിക് എംബസിയുമായി നിരന്തരം സമ്പര്ക്കം പുലര്ത്തി ചെക്ക് റിപ്പബ്ളിക്കിലെ വിദേശകാര്യ മന്ത്രാലയം വഴി നടപടി എടുപ്പിക്കുകയായിരുന്നു.
ഗാന്ധിജിയുടെ ചിത്രത്തോടുകൂടിയ മദ്യത്തിന്റെ ഉത്പാദനം നിര്ത്തിവച്ചതായും വിപണിയിലുള്ളവ 2019 ആഗസ്റ്റ് 31നകം പിന്വലിച്ച് വില്പ്പന അവസാനിപ്പിക്കുകയും ചെയ്യുമെന്ന് ചെക്ക് എംബസി കോണ്സുലാറായിരുന്ന മിലന് ദോസ്താല് എബി ജെ. ജോസിനെ ഫോണില് വിളിച്ചും ഇ മെയില് സന്ദേശം വഴിയും അറിയിക്കുകയായിരുന്നു. ഗാന്ധി നിന്ദയ്യെക്കെതിരെ നിരവധി ഒറ്റയാള് പോരാട്ടങ്ങള് എബി നടത്തിയിട്ടുണ്ട്.
പൂജ ശകുന് പാണ്ഡെ ഗാന്ധിജിയുടെ ഫോട്ടോയില് പ്രതീകാരമായി വെടിയുതിര്ത്ത് രക്തം ഒഴുക്കിയതിനെതിരെയും എബി ഒറ്റയാള് പ്രതിഷേധവുമായി രംഗത്തു വന്നിരുന്നു. ഗാന്ധിജിയുടെ 150-ാം ജന്മവാര്ഷികത്തോടനുബന്ധിച്ച് പാലായില് മഹാത്മാഗാന്ധി നാഷണല് ഫൗണ്ടേഷന്റെ ആഭിമുഖ്യത്തില് ഗാന്ധിജിക്ക് ആദരവൊരുക്കാന് ഗാന്ധിസ്ക്വയറും പ്രതിമയും എബി ജെ. ജോസിന്റെ നേതൃത്വത്തില് പാലാ മൂന്നാനിയില് നഗരസഭ അനുവദിച്ച സ്ഥലത്ത് സ്ഥാപിച്ചിട്ടുണ്ട്. കേരള ഗവര്ണറായിരുന്ന ആരിഫ് മുഹമ്മദ് ഖാനാണ് പ്രതിമ അനാവരണം ചെയ്തത്.
