തിരുവനന്തപുരം: എസ്.എസ്.എല്.സി.,-ഹയര് സെക്കന്ഡറി പരീക്ഷാ ഡ്യൂട്ടിയില്നിന്നു വ്യാപകമായി ഒഴിവായി അധ്യാപകര്. ഡ്യൂട്ടിയില്നിന്ന് ഒഴിവാക്കാന് മെഡിക്കല് സര്ട്ടിഫിക്കറ്റ് പ്രളയം. ഇതോടെ പരീക്ഷയും ഉത്തരക്കടലാസ് മൂല്യനിര്ണയവും എങ്ങനെ നടത്തുമെന്ന ആശങ്കയിലാണ് പലയിടത്തും വിദ്യാഭ്യാസ വകുപ്പ്.സര്വീസില് പ്രവേശിച്ചിട്ട് ഇതേവരെ മറ്റൊരു ഡ്യൂട്ടിയും നോക്കാത്തവര് തന്നെയാണ് ഇക്കുറിയും പരീക്ഷ, ഉത്തരക്കടലാസ് മൂല്യനിര്ണയ ഡ്യൂട്ടികളില്നിന്ന് ഒഴിവാകാന് ശ്രമിക്കുന്നത്.
ഇവരെ സഹായിക്കാന് വിദ്യാഭ്യാസ വകുപ്പിലെ ചില ഉദ്യോഗസ്ഥരുമുണ്ട്. പരീക്ഷ, ഉത്തരക്കടലാസ് മൂല്യനിര്ണയം, അവധിക്കാല പരിശീലനം തുടങ്ങി ഏതു ഡ്യൂട്ടിയും നോക്കുന്നത് സ്ഥിരമായി ഒരു വിഭാഗം അധ്യാപകര് മാത്രമാണ്. പെന്ഷന്റെ പടിവാതില്ക്കല് എത്തിയിട്ടും ഇതേവരെ ഒരു ഡ്യൂട്ടിയും ചെയ്യാത്ത നിരവധി അധ്യാപകര് സര്ക്കാര്, എയ്ഡഡ് മേഖലയില് നിരവധിയാണ്.
ഇതിനു പലര്ക്കും ഭരണപക്ഷ അനുകൂല സംഘടനയുടെ സഹായവും ലഭിക്കാറുണ്ട്.പരീക്ഷ ഡ്യൂട്ടിയില് ഉള്ളവര് തന്നെ ഉത്തരക്കടലാസ് മൂല്യനിര്ണയം നടത്തണമെന്നാണ് നിലവിലെ സ്ഥിതി. ബന്ധുക്കളും സുഹൃത്തുക്കളുമായ ഡോക്ടര്മാരുടെ മെഡിക്കല് സര്ട്ടിഫിക്കറ്റാണ് ഇത്തരക്കാര് സ്ഥിരമായി ഡ്യൂട്ടിയില്നിന്ന് ഒഴിവാക്കാന് ഹാജരാക്കുന്നത്. സംസ്ഥാനത്തെ 16 ലക്ഷം വിദ്യാര്ഥികളും അധ്യാപകരും പരീക്ഷയുടെ തിരക്കില് അമര്ന്നുകഴിഞ്ഞു. ഹൈസ്കൂളുകളില് വാര്ഷിക പരീക്ഷ നടക്കുകയാണ്.
പൊതു വിദ്യാഭ്യാസ വകുപ്പിലും പരീക്ഷാഭവനിലുമൊക്കെ എസ്.എസ്.എല്.സി.,-ഹയര് സെക്കന്ഡറി പരീക്ഷയ്ക്കുള്ള ഒരുക്കങ്ങള് പൂര്ത്തിയായി. ഈ മാസം മൂന്നു മുതല് 26 വരെയാണ് എസ്.എസ്.എല്.സി. പരീക്ഷ. ഹയര് സെക്കന്ഡറി പരീക്ഷയും അടുത്ത മൂന്നിനു തുടങ്ങും.
