കൊച്ചി: നോട്ടു നിരോധനത്തിനു ശേഷം ഇരുപതിലേറെ മണിച്ചെയിന് തട്ടിപ്പു സംഘങ്ങള് സംസ്ഥാനത്തു സജീവമായെന്നു രഹസ്യാന്വേഷണ വിഭാഗം. ആളുകളെ ചേര്ത്താല് ലാഭം കിട്ടുമെന്ന രീതിയില് നടത്തുന്ന മണിച്ചെയിന് വ്യാപാരവും പെട്ടെന്നു പണം കിട്ടുമെന്ന വാഗ്ദാനം ചെയ്യുന്ന വ്യാപാരവും നിരോധിച്ചിരിക്കെയാണിത്. നോട്ടുനിരോധനത്തോടെ പ്രതിസന്ധിയിലായ ഇവര് വീണ്ടും കള്ളപ്പണം സ്വരൂപിക്കുന്നതിനാണ് പല പേരുകളില് തട്ടിപ്പുമായി ഇറങ്ങിയിരിക്കുന്നതെന്നാണു വിവരം.
ആളുകളെ ചേര്ക്കുന്നതിനു മാസംതോറും ലക്ഷക്കണക്കിനു രൂപയാണു വിവിധ കമ്പനികളുടെ വാഗ്ദാനം. പണം ഇരട്ടിപ്പു സംഘങ്ങള് സാധാരണക്കാരായ ജനങ്ങളെ കബളിപ്പിച്ച് കോടികള് തട്ടിയതിന്റെ പുതുമുഖമായി ഇത്തരക്കാര് സോഷ്യല് മീഡിയയെ കരുവാക്കുകയാണ്.
പരമ്പരാഗത രീതിയിലുള്ള മണിച്ചെയിന് മാര്ക്കറ്റിങ്ങും സജീവം. കൊച്ചി കേന്ദ്രീകരിച്ച് നടക്കുന്ന മള്ട്ടിലെവല് മാര്ക്കറ്റിങ് ഇങ്ങനെ: ഗുജറാത്തിലെ സൂറത്ത് ആസ്ഥാനമായി രജിസ്ട്രേഷനുള്ള പെന്റെ വേള്ഡ് എന്ന എം.എല്.എം സ്ഥാപനത്തില് അയ്യായിരം രൂപ നല്കിയാല് പ്രവേശനം നേടാം. പ്രതിഫലമായി ആയിരം രൂപയില് താഴെ വിലമതിക്കുന്ന ഒരു ജോഡി തുണിത്തരങ്ങള് ലഭിക്കും.
അയ്യായിരം മുടക്കി ഇതില് അംഗമാകുന്ന ഒരാള്ക്ക് ഇതു പോലെ അയ്യായിരം മുടക്കാന് തയാറുള്ള ഇരുപത്തിയഞ്ച് പേരെ കണ്ടെത്തി മള്ട്ടിലെവല് മാര്ക്കറ്റിങ്ങില് ചേര്ത്താല് മാത്രമേ മുടക്കു മുതല് തിരിച്ച് ലഭിക്കു. ഒരാള് അയ്യായിരം രൂപ വീതം മുടക്കി ഒരു ജോഡി ആളുകളെ കൊണ്ടുവരുമ്പോള് കമ്പനിക്ക് പതിനായിരം രൂപ ലഭിക്കും. ചേരുന്നവര്ക്ക് ഒരു ജോഡി തുണിത്തരവും കൊണ്ടുവന്ന ആള്ക്ക് നാനൂറ് രൂപയുമാണ് കമ്പനി പ്രതിഫലമായി നല്കുന്നത്.
ഇതിനെക്കുറിച്ചുള്ള വ്യക്തമായ (ബൈനറി പ്ലാന്)കണക്കുകള് കമ്പനി വെബ്സൈറ്റില് മറച്ചുവയ്ക്കുകയും പ്രതിഫലം അംഗങ്ങളുടെ ബാങ്ക് അക്കൗണ്ടില് നിക്ഷേപിക്കുകയുമാണ് രീതി. അധികൃതര്ക്ക് അംഗങ്ങളുടെ ബാങ്ക്അക്കൗണ്ടുകള് പരിശോധിച്ചാല് കമ്പനിയുടെ തട്ടിപ്പ് വ്യക്തമാകും. തോപ്പുംപടിയിലെ വസന്തവിഹാര് ലോഡ്ജ്, വൈറ്റിലയിലെ അനുഗ്രഹ ഹോട്ടല് എന്നിവിടങ്ങളില് പെന്റെ വേള്ഡ് കമ്പനിയുടെ മീറ്റിങ്ങുകള് നടക്കുന്നതിന്റെ വീഡിയോ ദൃശ്യങ്ങള് മംഗളത്തിനു ലഭിച്ചു.
ഫെയ്സ്ബുക്കില് അടുത്തിടെ സജീവമായ വെസ്റ്റിജ് എന്ന കമ്പനി വാഗ്ദാനം ചെയ്യുന്ന കുറഞ്ഞ വരുമാനം മാസംതോറും 25,000 രൂപയാണ്. ഫെയ്സ്ബുക്ക് വഴിയാണ് ഇവര് ആളുകളെ കണ്ടെത്തുന്നത്. അതിനു ശേഷം വാട്സ്ആപ്പില് ഗ്രൂപ്പ് തുടങ്ങി അതുവഴിയാണ് ബിസിനസ് നടത്തുന്നത്. ഗ്രൂപ്പില് വന് തുകയാണു വാഗ്ദാനം ചെയ്യുന്നത്. മുതല് മുടക്കില്ലാതെ ദൈനംദിന ആവശ്യങ്ങള്ക്ക് സാധനങ്ങള് വാങ്ങി ആളുകളെ ചേര്ക്കുന്നതാണ് ഇവരുടെ രീതി. ഡല്ഹി കേന്ദ്രമാക്കിയാണ് കമ്പനിയുടെ പ്രവര്ത്തനം.
പതിമൂന്നു വര്ഷത്തെ സേവന പാരമ്പര്യമുള്ള കമ്പനിയാണ് ഇതെന്നും അവകാശപ്പെടുന്നു. രാജ്യത്ത് 750 കോടി രൂപയുടെ ബിസിനസ് നടത്തിയെന്നും സംസ്ഥാനത്ത് പ്രവര്ത്തനം തുടങ്ങിയിട്ട് ഒരു വര്ഷമായെന്നും ഇവര് പറയുന്നു.
തമിഴ്നാട് ആസ്ഥാനമായി പ്രവര്ത്തിക്കുന്ന മറ്റൊരു ഓണ്ലൈന് മണിച്ചെയിന് കമ്പനിയില് ചേര്ന്നവര് രണ്ടുലക്ഷത്തിനു മുകളില് വരും. 8,000 രൂപ വിലമതിക്കുന്ന ഉത്പന്നങ്ങള് കമ്പനിയുടെ സൈറ്റില് നിന്ന് വാങ്ങിയാണ് അംഗത്വം എടുക്കുന്നത്. അംഗമാകുന്ന വ്യക്തി മറ്റൊരാളെ ചേര്ക്കുമ്പോള് 1000 രൂപയും തുടര്ന്ന് ഇത് ഇരട്ടിക്കുകയും ചെയ്യുമെന്നതാണ് കമ്പനിയുടെ അവകാശവാദം. മുന്കാല മണിച്ചെയിന് തട്ടിപ്പുകളുമായി ഇതിന് വലിയ സാമ്യമുണ്ട്.
