കൊച്ചി: ലൈംഗിക അധിക്ഷേപ കേസില് ബോബി ചെമ്മണ്ണൂരിനെതിരെ കുറ്റപത്രം സമര്പ്പിച്ചു. ലൈംഗിക അധിക്ഷേപത്തിന് പുറമേ പിന്തുടര്ന്ന് ശല്യം ചെയ്തതിന്റെ വകുപ്പും ചുമത്തി എറണാകുളം മജിസ്ട്രേറ്റ് കോടതിയിലാണ് കുറ്റപത്രം സമര്പ്പിച്ചത്. ഹൈക്കോടതി ജാമ്യം അനുവദിച്ചതിനെ തുടര്ന്നാണ് കാക്കനാട് ജയിലില് റിമാന്ഡില് കഴിഞ്ഞിരുന്ന ബോബി ചെമ്മണ്ണൂര് പുറത്തിറങ്ങിയത്.
നടിക്കെതിരെ നിരന്തരം ദ്വയാര്ത്ഥ പ്രയോഗങ്ങള് നടത്തിയെന്നാണ് കുറ്റപത്രത്തില് പറയുന്നത്. നടിയെ അധിക്ഷേപിക്കുക എന്ന ഉദ്ദേശത്തോടെയാണ് ദ്വയാര്ത്ഥ പ്രയോഗങ്ങളെന്നും കുറ്റപത്രത്തിലുണ്ട്. അഭിമുഖങ്ങളുടെ വീഡിയോ ക്ലിപ്പുകളും, നടിയുടെ രഹസ്യമൊഴിയും, സാക്ഷി മൊഴികളും നിര്ണായകമാണ്. നടിയുടെ പരാതിയില് കൊച്ചി സെന്ട്രല് പൊലീസാണ് കേസടുത്തത്.
സമൂഹമാധ്യമങ്ങളിലൂടെ പലര്ക്കുമെതിരെ നടത്തിയ ലൈംഗികാധിക്ഷേപത്തിന്റെ തെളിവുകളും അന്വേഷണ സംഘം ശേഖരിച്ചിട്ടുണ്ട്. നേരത്തെ, നടി നല്കിയ ലൈംഗികാധിക്ഷേപ കേസില് ബോബി ചെമ്മണൂര് അറസ്റ്റിലായിരുന്നു. പിന്നീട് ജാമ്യം കിട്ടി ജയില് മോചിതനായ ശേഷം പരസ്യമായി മാപ്പ് ചോദിച്ച് ബോബി ചെമ്മണ്ണൂര് രംഗത്തെത്തിയിരുന്നു. മാര്ക്കറ്റിങ്ങിനായി പലതും പറയാറുണ്ടെന്നും അറിഞ്ഞുകൊണ്ട് ആരെയും ദ്രോഹിച്ചിട്ടില്ലെന്നുമായിരുന്നു പ്രതികരണം. എങ്കില്പോലും ആര്ക്കെങ്കിലും എപ്പോഴെങ്കിലുമൊക്കെ തന്റെ വാക്കുകള് കൊണ്ട് വിഷമിച്ചിട്ടുണ്ടെങ്കില് അവരോടൊക്കെ മാപ്പ് ചോദിക്കുന്നു എന്നും ബോബി ചെമ്മണ്ണൂര് പ്രതികരിച്ചിരുന്നു.
