പെർത്ത് : ഏകദിന ക്യാപ്റ്റനായുള്ള അരങ്ങേറ്റ മത്സരത്തിൽ ശുഭ്മാൻ ഗില്ലിനു തോൽവിയോടെ തുടക്കം. ഇന്ത്യക്കെതിരായ ആദ്യ ഏകദിനത്തില് ഓസ്ട്രേലിയക്ക് ഏഴ് വിക്കറ്റ് ജയം. ഇടയ്ക്കിടെ കളി മഴ തുടര്ന്ന് 26 ഓവറാക്കി ചുരുക്കിയ മത്സരത്തില് ടോസ് നഷ്ടപ്പെട്ട് ബാറ്റിംഗിനെത്തിയ ഇന്ത്യ ഒമ്പത് വിക്കറ്റ് നഷ്ടത്തില് 136 റണ്സാണ് നേടിയത്. ഇന്ത്യ ഉയർത്തിയ 131 റൺസ് വിജയലക്ഷ്യം നാല് ഓവറും അഞ്ചും പന്തും ബാക്കിനിൽക്കെ മൂന്നു വിക്കറ്റ് നഷ്ടത്തിൽ ഓസ്ട്രേലിയ മറികടന്നു. ഓസീസ് ജയം ഏഴു വിക്കറ്റിന്. ജയത്തോടെ മൂന്നു മത്സരങ്ങളടങ്ങിയ ഏകദിന പരമ്പരയിൽ 1–0ന് ഓസീസ് മുന്നിലെത്തി.
മോശം തുടക്കമായിരുന്നു ഓസീസിന്. രണ്ടാം ഓവറില് തന്നെ ട്രാവിസ് ഹെഡിന്റെ (8) വിക്കറ്റ് ഓസീസിന് നഷ്ടമായി. അര്ഷ്ദീപിന്റെ പന്തില് ഹര്ഷിത് റാണയ്ക്ക് ക്യാച്ച് നല്കിയാണ് ഹെഡ് മടങ്ങിയത്. തുടര്ന്നെത്തിയ മാത്യൂ ഷോര്ട്ടിനും (8) അധികം ആയുസുണ്ടായിരുന്നില്ല. എട്ട് റണ്സെടുത്ത താരത്തെ അക്സര്, രോഹിത് ശര്മയുടെ കൈകളിലേക്ക് പറഞ്ഞയച്ചു. പിന്നീട് മാര്ഷ് - ഫിലിപ്പെ സഖ്യം 55 റണ്സെടുത്തു. ഈ കൂട്ടുകെട്ടാണ് വിജയത്തില് വഴിത്തിരിവായത്. ക്യാപ്റ്റന് മിച്ചല് മാര്ഷിന്റെ (52 പന്തില് പുറത്താവാതെ 46) ഇന്നിംഗ്സാണ് ഓസീസിനെ വിജയത്തിലേക്ക് നയിച്ചത്. ജോഷ് ഫിലിപ്പെ (37) നിര്ണായക പ്രകടനം പുറത്തെടുത്തു. മാറ്റ് റെന്ഷോ (24 പന്തില് 21) പുറത്താവാതെ നിന്നു.
ടോസ് നഷ്ടത്തിന് പിന്നാലെ ക്രീസിലിറങ്ങിയ ഇന്ത്യക്ക് മിച്ചല് സ്റ്റാര്ക്ക് എറിഞ്ഞ മൂന്നാം ഓവറിലെ നാലാം പന്ത് സ്ട്രൈറ്റ് ഡ്രൈവിലൂടെ ബൗണ്ടറി കടത്തി രോഹിത് പ്രതീക്ഷ നല്കി. എന്നാല് തൊട്ടടുത്ത ഓവറില് ഹേസല്വുഡിന്റെ എക്സ്ട്രാ ബൗണ്സ് രോഹിത്തിനെ ചതിച്ചു. ഓഫ് സ്റ്റംപ് ലൈനില് കുത്തി ഉയര്ന്ന പന്തില് ബാറ്റുവെച്ച രോഹിത്തിനെ (8) സ്ലിപ്പില് മാറ്റ് റെന്ഷാ കൈയിലൊതുക്കി. പിന്നാലെ കിംഗ് കോലി ക്രീസിലെത്തി. ഹേസല്വുഡിന്റെ നേരിട്ട ആദ്യ പന്തില് തന്നെ എല് ബി ഡബ്ല്യു അപ്പീല് അതിജീവിച്ചെങ്കിലും നേരിട്ട ആദ്യ ഏഴ് പന്തിലും കോലിക്ക് അക്കൗണ്ട് തുറക്കാനായില്ല. ഒടുവില് നേരിട്ട എട്ടാം പന്തില് മിച്ചല് സ്റ്റാര്ക്കിനെതിരെ ഫ്ലാഷി ഡ്രൈവിന് ശ്രമിച്ച കോലിയെ പോയന്റില് കൂപ്പര് കൊണോളി പറന്നു പിടിച്ചു. ഓസ്ട്രേലിയയില് കഴിഞ്ഞ 30 ഏകദിന ഇന്നിംഗ്സുകളില് കോലിയുടെ ആദ്യ ഡക്കാണിത്.
